Ecclesiastes 8

Kikuyu Bible (IBUKU RĨRĨA ITHERU RĨA NGAI)

← Chapter 7 Jump to: Chapter 9 →

1Mũndũ ũrĩa ũngĩkĩonwo ta arĩ mũũgĩ-rĩ, nĩ ũrĩkũ? Ningĩ-rĩ, nũ ũngĩkĩmenya gũtaũranĩra ũndũ? Ũũgĩ wa mũndũ nĩguo ũtũmaga ũthiũ wake ũkenge, o na gũthita gwake gĩthiithi gũkagarũrũka.

2Iguaga rĩathani rĩa mũthamaki, o ũkĩririkanaga mwĩhĩntwa ũrĩa mwĩhĩte harĩ Ngai.

3Tiga kũhiũha kwehera harĩ we; ndũkeringĩrĩrie gwĩka ũndũ mũũru: nĩ ũndũ we ekaga maũndũ marĩa mothe ekenagĩra.

4Nĩ gũkorũo uuge wa mũthamaki ũrĩ hinya, nũ ũngĩkĩhota kũmũũria ũũ: Ũreka atĩa?

5Mũndũ o wothe ũrĩa ũiguaga watho ndakona ũndũ mũũru, nayo ngoro ya mũndũ mũũgĩ nĩĩkũũranaga ihinda rĩrĩa cira ũgakinya.

6Nĩ gũkorũo hatirĩ ũndũ o na ũrĩkũ ũtarĩ na ihinda rĩaguo rĩa cira; nĩ ũndũ thĩna ũrĩa ũtangaga andũ nĩũmanenehagĩra mũno;

7nĩ gũkorũo gũtirĩ mũndũ ũũĩ maũndũ marĩa makamũkora: nũ ũngĩkĩmũmenyithia ũrĩa gũgatuĩka thutha?

8Gũtirĩ mũndũ ũngĩhota gwatha rũhuho, arũgirie rũhurutane; o na kana ahote gwatha mũthenya wa gĩkuũ: mbaara-rĩ, ndĩrĩ mũndũ ũngĩhĩtania nayo; naguo waganu ndũngĩhonokia mũndũ ũrĩa ũũthĩgĩtie.

9Ũndũ ũcio wothe nĩndĩwonete, na niĩ ngĩkĩĩheana mawĩra-inĩ mothe marĩa marutagwo gũkũ thĩ kwaraga riũa; he hĩndĩ mũndũ agĩaga na ũhoti wa gwatha ũrĩa ũngĩ, agagĩĩthũkia we mwene.

10Ningĩ ngĩona andũ arĩa aaganu magĩthikwo, na magĩkinya mbĩrĩra-inĩ; o nao arĩa mekĩte maũndũ mega, ngĩona makiuma handũ harĩa hatheru, nao makĩriganĩra itũũra-inĩ: o naguo ũndũ ũcio no wa tũhũ.

11Tondũ wa ũrĩa iherithia rĩa gwĩka maũndũ moru rĩtaherithanagio narua-rĩ, ciana cia Adamu ikĩragĩrĩria o gwĩka ũũru.

12O na mwĩhia angĩĩhia maita igana, o na aingĩhie matukũ ma muoyo wake-rĩ, ti-itherũ nĩngũmenya na ma atĩ andũ arĩa metigagĩra Ngai, no-o makona maũndũ mega, o acio mamwĩtigagĩra me mbere yake;

13no rĩrĩ, maũndũ ma mũndũ ũrĩa mwaganu matikaagĩrĩra o na atĩa, o na kana aingĩhie matukũ ma muoyo wake, o macio matariĩ ta kĩĩruru; nĩ gũkorũo ndetigagĩra arĩ mbere ya Ngai.

14Nĩkũrĩ ũndũ ũmwe wa tũhũ wĩkagwo gũkũ thĩ; naguo nĩ ũyũ, atĩ nĩkũrĩ andũ athingu makoragwo nĩ maũndũ ta marĩa makoraga andũ aaganu: ningĩ nĩkũrĩ andũ aaganu makoragwo nĩ maũndũ ta marĩa makoraga andũ arĩa athingu; na ngĩkiuga atĩ ũndũ ũcio naguo no wa tũhũ.

15Ngĩcoka ngĩkĩgathĩrĩria gĩkeno, nĩ ũndũ hatirĩ ũndũ ũngĩ mwega mũndũ angĩĩka gũkũ thĩ kwaraga riũa, ũhĩtũkanĩte na kũrĩa, na kũnyua, o na gwĩkenia ngoro yake; naguo ũndũ ũcio atũũre arũmanĩrĩire naguo mĩĩtungumanĩrie-inĩ yake matukũ mothe ma muoyo wake, marĩa aheetwo nĩ Ngai gũkũ thĩ kwaraga riũa.

16Rĩrĩa ndageririe na ngoro kwĩruta ũũgĩ, o na kũrora mĩhang’o ĩrĩa ĩhang’agwo gũkũ thĩ, (nĩ ũndũ nĩkũrĩ ũtonaga toro na maitho make mũthenya kana ũtukũ);

17hĩndĩ ĩo nĩndakĩbarire wĩra wa Ngai wothe, ngĩona atĩ mũndũ ndangĩhota kwĩonera wĩra ũrĩa ũrutagwo gũkũ thĩ kwaraga riũa: nĩ ũndũ o na angĩĩnogia akĩũcaria atĩa kana atĩa, ndakawona; ĩĩ, ti-itherũ o na mũndũ mũũgĩ angĩenda kũũmenya, ndangĩhota kũwona.

← Chapter 7 Jump to: Chapter 9 →