Exodus 31

Kikuyu Bible (IBUKU RĨRĨA ITHERU RĨA NGAI)

← Chapter 30 Jump to: Chapter 32 →

1Nake Jehova akĩarĩria Musa, akĩmwĩra atĩrĩ,

2Ta rora wone atĩ nĩnjĩtĩte Bezaleli wa Uri mũrũ wa Huri, wa mũhĩrĩga wa Juda, ngamũgweta rĩĩtwa;

3na nĩndĩmũiyũrĩtie roho wa Ngai ũhoro-inĩ wa ũũgĩ, na wa kũhiũha kũigua maũndũ, na wa kũmamenya wega, o na wa kũũhĩgĩrĩra mawĩra ma mĩthemba yothe,

4nĩguo athugundage mawĩra ma ũũgĩ ma kũrutwo na thahabu, na betha, o na gĩcango,

5o na ngamũiyũria roho ũcio wa Ngai ũhoro-inĩ wa wacũhia wa tũhiga twa gũthecererũo indo-inĩ, na wa wai wa mĩtĩ, o na wa gũtuĩka mũruti wĩra wa mĩthemba yothe.

6Na atĩrĩrĩ, niĩ mwene nĩ’thurĩte Oholiabu, mũrũ wa Ahisamaku, wa mũhĩrĩga wa Dani, agĩe hamwe nake wĩra-inĩ ũcio; na rĩrĩ, ngoro cia andũ arĩa othe ogĩ nĩndiciiyũrĩtie ũũgĩ, nĩ getha mathondeke indo icio ciothe ngwathĩte;

7nacio nĩcio hema-ya-gũtũnganwo, na ithandũkũ rĩa ũira, na gĩikaro-gĩa-tha kĩrĩa kĩrĩ igũrũ rĩarĩo, o na indo ciothe cia gwĩkĩrũo hema-inĩ ĩo;

8na metha yayo, hamwe na indo ciayo, na mũtĩ wa kũigĩrĩrũo matawa wa thahabu therie, na indo ciaguo ciothe, o na kĩgongona gĩa gũcinĩrũo mahuti marĩa manungaga wega;

9na kĩgongona kĩrĩa gĩcinagĩrũo nyamũ iria irutagwo cia mahaki ma njino, hamwe na indo ciakĩo ciothe, na kĩnyũngũ gĩa gwĩthambĩrũo hamwe na kũgũrũ gwakĩo;

10na nguo iria itumĩtwo wega irĩ riri, na nguo iria nyamũre cia Haruni, mũthĩnjĩri-Ngai, o na nguo cia ariũ ake, iria marutaga wĩra wa athĩnjĩri-Ngai mehumbĩte;

11na maguta marĩa maitanagĩrĩrio, o na ũbumba wa mahuti marĩa manungaga wega ma handũ harĩa hatheru. Nĩ wega maũndũ macio mothe mekwo o ta ũrĩa ũhoro ũrĩa wothe ngwathĩte ũtariĩ.

12Nake Jehova agĩcoka akĩarĩria Musa, akĩmwĩra atĩrĩ,

13Ningĩ coka warĩrie ciana cia Isiraeli ũciĩre atĩrĩ, No mũhaka mũtũũre mũmenyereire mũthenya wa thabatũ; nĩ gũkorũo mũthenya ũcio nĩguo rũũri rũa gũtũũra gatagatĩ gaitũ na inyuĩ njiaro-inĩ cianyu ciothe, nĩ getha mũmenyage atĩ niĩ nĩ niĩ Jehova ũrĩa ũmwamũrĩte akamũtheria.

14Tondũ ũcio menyagĩrĩrai mũthenya ũcio wa thabatũ, tondũ nĩ mwamũre harĩ inyuĩ; mũndũ o wothe ũrĩa ũkaũthũkia ndarĩ hingo atakoragwo; nĩ gũkorũo mũndũ o wothe ũrĩa ũkaruta wĩra wa mũthemba o na ũrĩkũ mũthĩ ũcio, nĩakaingatwo athengio kũrĩ andũ ao.

15Wĩra ũrĩrutagwo o mĩthenya ĩtandatũ; no rĩrĩ, mũthenya wa mũgwanja nĩũtuĩtwo thabatũ ya kũhurũka o kũhurũka ki, kũrĩa kwamũrĩirũo Jehova; mũndũ o wothe ũrĩa ũkaruta wĩra wa mũthemba o na ũrĩkũ mũthenya ũcio ndarĩ hingo atakoragwo.

16Tondũ ũcio ciana cia Isiraeli irĩikaraga imenyereire mũthenya ũcio wa thabatũ iũririkanage njiaro-inĩ ciacio ciothe, ũtuĩke wa kĩrĩkanĩro kĩrĩa tũrĩkanĩire nacio, kĩrĩa gĩtagacoka gũthira o rĩ, no rĩ.

17Nĩ ũndũ mũthenya ũcio nĩguo rũũri rũrĩa rũgũtũũra gatagatĩ gaitũ na Isiraeli tene na tene; nĩ gũkorũo Jehova ombire igũrũ na thĩ matukũ atandatũ, akĩhurũka mũthenya wa mũgwanja, akĩnogoka.

18Nake Jehova aarĩkia kwaranĩria na Musa kĩrĩma-inĩ gĩa Sinai-rĩ, akĩmũnengera ihengere iria igĩrĩ cia ũira, nacio nĩ ihengere cia mahiga ciandĩkĩtwo na kĩara kĩa Ngai.

← Chapter 30 Jump to: Chapter 32 →