Judges 14

Kikuyu Bible (IBUKU RĨRĨA ITHERU RĨA NGAI)

← Chapter 13 Jump to: Chapter 15 →

1Na rĩrĩ, Samusoni agĩgĩikũrũka agĩkinya Timina, akĩona mũndũ-wa-nja kũu Timina wa airĩtu a Afilisiti.

2Agĩgĩcoka akĩambata akĩhe ithe na nyina ũhoro ũcio, akĩmera atĩrĩ, Nĩndona mũndũ-wa-nja kũu Timina wa airĩtu a Afilisiti; tondũ ũcio ngũrĩrai we atuĩke mũtumia wakwa.

3Nao ithe na nyina makĩmũũria atĩrĩ, Hĩ, kaĩ gũtarĩ mũndũ-wa-nja o na ũmwe thĩinĩ wa airĩtu a mũhĩrĩga witũ, kana thĩinĩ wa rũrĩrĩ ruitũ ruothe, atĩ nĩkĩo ũgũthiĩ kũgũra mũndũ-wa-nja wa Afilisiti, o acio mataruaga? Nake Samusoni agĩkĩĩra ithe atĩrĩ, Ngũrĩra o ro ũcio; nĩ ũndũ nĩangenetie mũno.

4No rĩrĩ, ithe na nyina matioĩ atĩ ũndũ ũcio uumĩte kwĩ Jehova, nĩ ũndũ nĩ gũcaria aacaragia ha kũrutia Afilisiti amokĩrĩre. Na rĩrĩ, ihinda rĩu, Afilisiti nĩo maathaga Isiraeli.

5Samusoni agĩgĩikũrũka Timina me na ithe na nyina, nao magĩkinya mĩgũnda-inĩ ya mĩthabibu ya kũu Timina; na atĩrĩrĩ, kĩana kĩa mũrũthi gĩkĩmũraramĩra.

6Naguo roho wa Jehova ũgĩkĩmũkora na hinya mũnene mũno, nake agĩgĩtarũranga o ta ũrĩa angĩatarũrangire kori, na ndaarĩ na kĩndũ guoko; no rĩrĩ, ndaigana kwĩra ithe kana nyina ũrĩa ekĩte.

7Samusoni agĩgĩikũrũka, akĩaria na mũndũ-wa-nja ũcio, nake akĩmũkenia mũno.

8Nake aaikaranga agĩcoka gũthiĩ kũmũgĩra, na arĩ njĩra-rĩ, agĩkerũra arore kĩimba kĩrĩa kĩa mũrũthi; na atĩrĩrĩ, hagĩkorũo he mũrumbĩ wa njũkĩ watũũrĩte mwĩrĩ ũcio wa mũrũthi thĩinĩ, na hakagĩa ũũkĩ.

9Nake akĩũnyita na moko, agĩthiĩ na njĩra akĩũrĩaga, agĩgĩkinya harĩ ithe na nyina, akĩmahe, nao makĩũrĩa; no ndaigana kũmera atĩ ũũkĩ ũcio aũrutĩte mwĩrĩ wa mũrũthi thĩinĩ.

10Nake ithe agĩikũrũka agĩthiĩ kwĩ mũndũ-wa-nja ũcio; nake Samusoni akĩrugithia gĩathĩ kũu; nĩ gũkorũo ũguo nĩguo aanake maamenyerete gwĩka.

11Na gũgĩkinya atĩrĩ, atĩ hĩndĩ ĩrĩa maamuonire, makĩmũtwarithĩria aanake mĩrongo ĩtatũ a gũthiĩ thiritũ nake maikare nake.

12Nake Samusoni agĩkĩmera atĩrĩ, Ta rekei ndĩmũgwatie ndaĩ; na rĩrĩ, mwona mwandugũrĩra ndaĩ ĩo yakwa mĩthenya-inĩ ĩno mũgwanja ya gĩathĩ gĩkĩ, na mũmĩmenye-rĩ, nĩngũmũhe nguo cia gatani mĩrongo ĩtatũ, o na nguo ingĩ mĩrongo ĩtatũ cia kũgarũrĩra;

13no rĩrĩ, mwaremwo nĩ kũmĩrugũra-rĩ, nĩmũkũ’he nguo mĩrongo ĩtatũ cia gatani, o na nguo ingĩ mĩrongo ĩtatũ cia kũgarũrĩra. Nao magĩkĩmwĩra atĩrĩ, Ta gĩtũgwatie ndaĩ ĩo yaku tũmĩigue.

14Nake agĩkiuga ũũ: Nyamũ ndĩani thĩinĩ, hagĩkiuma irio thĩinĩ wayo, O nayo nyamũ ĩrĩa ĩrĩ hinya mũno, hagĩkiuma mũrĩo thĩinĩ wayo. Nao matiigana kũhota kũrugũra ndaĩ ĩo ihinda rĩa mĩthenya ĩtatũ.

15Na gũgĩkinya atĩrĩ, atĩ mũthenya wa kũhingia matukũ mũgwanja-rĩ, andũ acio makĩĩra mũka wa Samusoni atĩrĩ, Ringĩrĩria mũthuriguo atũrugũrĩre ndaĩ ĩo, tũtigagũcine na mwaki, wee mwene o na nyũmba ya thoguo; anga mũtwĩtĩte gũkũ mũũke mũtũtahe? Githĩ ũguo tiguo?

16Nake mũka wa Samusoni akĩmũrĩrĩra, akiuga atĩrĩ, Wee nĩũ’thũũrĩte na ndũnyenda; ũgwatĩtie ciana cia andũ aitũ ndaĩ na ndũndugũrĩre ndaĩ ĩo. Nake agĩkĩmwĩra atĩrĩ, Njagĩte kũrugũrĩra baba na maitũ, wee nĩwe ngũrugũrĩra?

17Nake akĩmũrĩrĩra matukũ macio mũgwanja ma gĩathĩ kĩu; na gũgĩkinya atĩrĩ, atĩ mũthenya ũcio wa kũhingia matukũ mũgwanja-rĩ, akĩmũrugũrĩra ndaĩ ĩo, nĩ ũndũ nĩaamũhatĩrĩirie mũno; nake mũndũ-wa-nja ũcio agĩcoka akĩrugũrĩra ciana cia andũ ao ndaĩ ĩo.

18Na rĩrĩ, mũthenya wa mũgwanja wakinya, o riũa rĩtanathũa-rĩ, andũ acio a itũũra rĩu makĩmwĩra ũũ: Nĩ kĩ gĩkĩrĩtie ũũkĩ kũgĩa mũrĩo? Ningĩ-rĩ, nĩ kĩ gĩkĩrĩtie mũrũthi kũgĩa hinya? Nake agĩkĩmera atĩrĩ, Hĩ! Korũo mũtinarĩma na mori yakwa-rĩ, Mũtingĩarugũra ndaĩ ĩo yakwa.

19Naguo roho wa Jehova ũkĩmũkora na hinya mũno, agĩgĩikũrũka agĩkinya Ashikeloni, akĩhũra andũ mĩrongo ĩtatũ o kuo, akĩmatunya nguo ciao, agĩkĩhe andũ acio maarugũrire ndaĩ ĩo nguo icio aagwetete cia kũgarũrĩra. Agĩgĩcinwo nĩ marakara mũno, akĩambata, akĩinũka gwa ithe mũciĩ.

20No rĩrĩ, mũka ũcio wa Samusoni agĩkĩheo mũndũ ũmwe wa thiritũ yake, o ũcio aatuĩte mũratawe.

← Chapter 13 Jump to: Chapter 15 →