Judges 21

Kikuyu Bible (IBUKU RĨRĨA ITHERU RĨA NGAI)

← Chapter 20 Jump to:

1Na rĩrĩ, andũ a Isiraeli, hĩndĩ ĩrĩa maarĩ Mizipa, nĩmehĩtire mwĩhĩtwa makiuga atĩrĩ, Gũtirĩ mũndũ o na ũmwe witũ ũkanengera mũndũ wa mũhĩrĩga wa Benjamini mwarĩ, atuĩke mũka.

2Nao andũ a Isiraeli magĩthiĩ magĩkinya Beth-eli magĩikara kuo mbere ya Ngai nginya o hwaĩ-inĩ, nao makĩanĩrĩra makĩrĩra mũno mũno.

3Magĩkiuga atĩrĩ, Hĩ! Jehova, Ngai wa Isiraeli, nĩ kĩ gĩatũma ũndũ ũyũ woneke ũmũthĩ harĩ Isiraeli, atĩ hagĩe mũhĩrĩga ũmwe ũkwagwo thĩinĩ wa Isiraeli?

4Na gũgĩkinya atĩrĩ, atĩ rũciũ rũrũ rũngĩ, andũ makĩroka gũũkĩra rũcinĩ tene, magĩaka kĩgongona hau, makĩruta indo cia mahaki ma njino, o na magongona ma ũiguano.

5Nacio ciana cia Isiraeli ikĩũria atĩrĩ, Mĩhĩrĩga-inĩ yothe ya Isiraeli-rĩ, nĩ andũ arĩkũ mataambatire hĩndĩ ĩrĩa kwonganĩtwo mbere ya Jehova? Nĩ ũndũ nĩciehĩtĩte mwĩhĩtwa mũnene ũkoniĩ mũndũ ũrĩa ũtagakorũo aambatĩte agathiĩ harĩ Jehova kũu Mizipa, ikiuga atĩrĩ, Ti-itherũ no mũhaka mũndũ ũcio akoragwo.

6Nacio ciana cia Isiraeli igĩkĩĩrira nĩ ũndũ wa mũrũ wa ithe wacio Benjamini, ikiuga atĩrĩ, Ũmũthĩ nĩharĩ mũhĩrĩga ũmwe wamũkĩte, ũkeherio biũ, thĩinĩ wa Isiraeli.

7Rĩu-rĩ, tũgũgĩĩka atĩa nĩ getha andũ arĩa matigarĩte tũmonere aka, kuona atĩ nĩtwehĩtĩire mbere ya Jehova, tũkiuga atĩ tũtikamanengera airĩtu aitũ mamahikie?

8Nao magĩkiuga atĩrĩ, Mĩhĩrĩga-inĩ ya Isiraeli-rĩ, nĩ mũndũ ũrĩkũ ũtaambatire he Jehova kũu Mizipa? Gũgĩkĩonwo atĩ gũtirĩ mũndũ o na ũmwe woimĩte Jabeshi-gileadi agathiĩ ũũngano-inĩ ũcio hau maambĩte hema ciao.

9Nĩ gũkorũo hĩndĩ ĩrĩa andũ maataragwo, nĩkwonirũo atĩ hatirĩ mũndũ o na ũmwe wa arĩa maatũire Jabeshi-gileadi wĩ ho.

10Nakĩo kĩrĩndĩ kĩu gĩkĩrekia andũ njamba mũno ngiri ikũmi na igĩrĩ kuo; gĩkĩmaatha atĩrĩ, Thiĩi mũkahũre andũ acio othe matũire Jabeshi-gileadi mũmanine na hiũ cia njora, hamwe na atumia, o na twana tũrĩa tũnini.

11Naguo ũndũ ũrĩa mũgwĩka nĩ ũyũ, atĩ mũnine o kũnina biũ mũndũ mũrũme o wothe, o na mũndũ-wa-nja o wothe ũrĩa wanakomwo nake nĩ mũndũ mũrũme.

12Na rĩrĩ, thĩinĩ wa andũ acio maatũũraga Jabeshi-gileadi-rĩ, hagĩkĩoneka airĩtu magana mana arĩa matarĩ monana na mũndũ mũrũme na ũndũ wa gũkomwo nao nĩwe; magĩkĩmatwara kĩraaro-inĩ kĩao kũu Shilo, rĩrĩa rĩrĩ bũrũri wa Kanaani.

13Nakĩo kĩrĩndĩ kĩu gĩothe gĩkĩrekia andũ makaarie na ciana cia Benjamini icio ciarĩ rũaro-inĩ rũa ihiga rũa Rimoni, maare ũhoro nacio kũgĩe thayũ.

14Hĩndĩ ĩo Abenjamini magĩkĩhũndũka magĩcoka kwao; nao Aisiraeli magĩkĩmahe airĩtu acio maahonoketie makamatiga muoyo thĩinĩ wa andũ-a-nja a Jabeshi-gileadi; no rĩrĩ, o na harĩa mekire ũguo-rĩ, matiamahingirie aka.

15Nao andũ a Isiraeli magĩgĩcakaĩra Abenjamini nĩ ũndũ wa ũrĩa Jehova aatũmire hagĩe mwamũ thĩinĩ wa mĩhĩrĩga ya Isiraeli.

16Hĩndĩ ĩo athuri a kĩrĩndĩ gĩa Isiraeli magĩkiuga atĩrĩ, Tũgwĩka atĩa nĩ getha andũ arĩa maatigara tũmonere aka, kuona atĩ andũ-a-nja othe nĩmaaninirũo thĩinĩ wa Benjamini?

17Magĩkiuga atĩrĩ, No mũhaka andũ arĩa maahonokirio thĩinĩ wa Abenjamini magĩe na njiaro, nĩ getha hatikagĩe mũhĩrĩga o na ũmwe ũhuurĩtwo ũkeherio thĩinĩ wa Isiraeli.

18No rĩrĩ, ithuĩ tũtingĩmahe aka thĩinĩ wa airĩtu aitũ; nĩ ũndũ ciana cia Isiraeli nĩciehĩtire ikiuga ũũ: Mũndũ ũrĩa ũkahe Mũbenjamini mwarĩ atuĩke mũka-rĩ, arogwatwo nĩ kĩrumi kĩa Ngai.

19Ningĩ magĩcoka makiuga ũũ: Atĩrĩrĩ, nĩkũgĩaga gĩathĩ kĩa Jehova mwaka o mwaka kũu Shilo, itũũra rĩrĩa rĩrĩ mwena wa gathigathini wa Beth-eli, o na mwena wa gũthini wa Lebona.

20Magĩgĩatha ciana cia Benjamini, magĩciĩra atĩrĩ, Thiĩi mũkoherie andũ mĩgũnda-inĩ ya mĩthabibu,

21mũcũthĩrĩrie muone kana hihi airĩtu a Shilo nĩmariumagara magĩũka kũina nyĩmbo iria irĩinwo kuo; na hĩndĩ ĩo mũgakiuma mĩgũnda-inĩ ya mĩthabibu, nake mũndũ o mũndũ wanyu enyitĩre mũka wa airĩtu acio a Shilo, mũcoke mwĩthiĩre bũrũri wanyu wa Benjamini.

22Na nĩgũgatuĩka atĩrĩ, atĩ hĩndĩ ĩrĩa maithe mao, kana ariũ a ithe wao, magoka kũrĩ ithuĩ matũrehere ũhoro ũcio mamũthitake, tũgakĩmera atĩrĩ, Twĩtĩkĩrĩrei ũhoro ũcio, twamũthaitha, nĩ ũndũ tũtianyitĩire mũndũ o mũndũ wa andũ acio othe mũka tũkĩrũa mbaara; o na ningĩ nĩ ũndũ ti inyuĩ inyuene mwamaneanire harĩ aanake acio, tondũ korũo ũguo nĩguo mwekire-rĩ, nĩmũngĩagĩrĩirũo nĩ gũcokererũo nĩ ũndũ ũcio, ũtuĩke rĩĩhia.

23Nacio ciana cia Benjamini igĩgĩĩka o ro ũguo, ikĩĩnyitĩra aka o ta ũrĩa ciaiganaga thĩinĩ wa airĩtu arĩa maakorirũo makĩina, igĩthiĩ nao; nacio igĩgĩcoka bũrũri wacio, igĩcokereria matũũra ma cio, igĩtũũra kuo.

24Nacio ciana cia Isiraeli igĩkiuma kũu, igĩĩthiĩra, mũndũ o mũndũ agĩcoka mũhĩrĩga-inĩ wake, o na kũrĩa andũ a nyũmba yao maatũire; ningĩ mũndũ o mũndũ wao akiuma kũu, agĩthiĩ gũikara gĩthaka kĩrĩa aagaĩte.

25Namo matukũ macio, gũtiarĩ mũthamaki wa gũthamakĩra Isiraeli; no rĩrĩ, andũ othe, mũndũ o mũndũ ekaga o ta ũrĩa onaga kwagĩrĩire we mwene.

← Chapter 20 Jump to: