Hosea 1

Kalenjin Bible Revised (BUKUIT NE TILIIL Sireet ne Dutero Kanon)

Jump to: Chapter 2 →

1Ni ng'olyootap Kamuktaindet ne Toroor ne ki nyoonji Hosea weeriitap Beri eng' peetuusyegap Uzziah, Jotham, Ahaz, ak Hezekiah che ki laitorinigap Judah, ak eng' peetuusyegap Jeroboam weeriitap Joash laitoryatap Israel.

2Ye kingo ng'alaalji `Kamuktaindet ne Toroor Hosea eng' tai, koleenji `Kamuktaindet ne Toroor Hosea, “Ui imutyigei chepkugoniot koek osotyong'ung', ak lagogap kugoinatet, amu yaei emet kugoinatet ne oo kometoi Kamuktaindet ne Toroor.”

3Ki wo anyun ak kotun Gomer cheptap Diblaim, ak ki manach ak kosikyi ineendet weeriit.

4Ki leenji `Kamuktaindet ne Toroor ineendet, “Kuuree kainennyi Jezreel amu ne matyanit ayaaktochini mugetuut kootap Jehu agobo korotigap Jezreel, ak ageesu pounatetap kootap Israel.

5Eng' peetuunooto ko tuun airie kwangetap Israel eng' atebweetap Jezreel.”

6Ak ki manach kogeny ak kosich chepto. Ak ki leenji `Kamuktaindet ne Toroor ineendet, “Kuuree kainennyi Lo-ruhama amu ma ariiree kootap Israel anan anyochi kaat eng' kiy age tugul.

7Ago ariiree kootap Judah ak agoochi katerteerisyet icheek kobun eutap Kamuktaindet ne Toroor Kamuktaindennywa. Ma saruunee kwanget, anan rotwetap chok, anan lugeet, anan paraisisyek, anan piik che ketei paraisisyek.”

8Kingo kagolugee Lo-ruhama, komanach kogeny ak kosich weeriit.

9Ak ki le Kamuktaindet ne Toroor, “Kuuree kainennyi Lo-ami amu ma oo piikyuk, ama aegu Kamuktaindeng'wong'.”

10Ago tenitu piigap Israel ng'aniegap nyanja che ma kimuuchi kirogendoe kiy anan kiit; ak eng' ole ki kimwachine icheeget keele, “Ma oo piikyuk”, ko tuun ki leenjin, “Oo weeriigap Kamuktaindet ne sabei.”

11Iyumigei piigap Judah ak piigap Israel, ak kolewenjigei kandoindet agenge; ak paraitu ak konyoor keljiin eng' emonooto; amu egu peetuut ne oo peetuutap Jezreel.

Jump to: Chapter 2 →