Hosea 11

Kalenjin Bible Revised (BUKUIT NE TILIIL Sireet ne Dutero Kanon)

← Chapter 10 Jump to: Chapter 12 →

1Ki achame Israel kota ko ming'in, ak ki aguur weeriinnyu komong' eng' Misiri.

2Kinga testai aguur icheek, ko testai koistoenagei; ki eng'ji Baalik, ak kobeelji nyamdutik kanamonik che ki kiwai.

3Ago ki anee ne ki aneet Ephraim kowendot; ki aganabate eng' eunekyuk; ago ki ma nai kole ki asoobi icheek.

4Ki achuutune icheek poroonigap chii, kobooto rogoonigap chamyet; ak ki auu eng' icheek icheeget che istoi chogit eng' tagilgilikwak, ak ki ande amitwogik tainnywa.

5Ma weekyingei ineendet emetap Misiri; ago egu `Assyrianindet laitoryandennyi, amu ki eesyo icheek koweigei.

6Ak kobutyi rotwetap chok nganasookyik, ak kogees temeleiywekyik, ak koam icheek, amu kirwoogutikwak.

7Kagobegechi piikyuk kochuchuigei kometaa: agot ngo kuurso icheek koguurchi icheek ineendet ne mi parak, koma piitu ne itoroori ineendet.

8Amuktoi ano ameteen, inyee Ephraim? Amuktoi ano asaruun, inyee Israel? Amuktoi ano ayain iige Adma? Amuktoi ano ayain iige Seboim? Kagowalak muguleldanyu, kagorira moo.

9Ma yae koroomnatetap nereegekyuk, ma weeksei ang'eme Ephraim: amu aa Kamuktaindet, ma aa chii; Ineendet ne Tiliil ne mi kwenung'ung': machute nganaseet.

10Pendoti icheek kosuboti Kamuktaindet ne Toroor, ne poriseni ko uu ng'etundo: amu poriseni ineendet, ak kobwa lagok kobotanionu kobunu cherongo.

11Pwoonei kobotanionu ko uu toriityon ne mang'une Misiri, ak ko uu cheptuget ne mang'une emetap Assyria: ak agoochi icheek komeny kooriikwak, mwaei Kamuktaindet ne Toroor.

12Yiemena Ephraim lembechek, koyiemena kootap Israel ng'aalseet: ago pounisyei Judah kora kobooto Kamuktaindet, ak koyanaat eng' Ineendet ne Tiliil.

← Chapter 10 Jump to: Chapter 12 →