Hosea 7

Kalenjin Bible Revised (BUKUIT NE TILIIL Sireet ne Dutero Kanon)

← Chapter 6 Jump to: Chapter 8 →

1Ye kata amache asoop Israel, kotook anyun tengektap Ephraim ak yaityetap Samaria; amu poisyee lembechek: ak kwo oriit choriindet, ak kong'emisyei lugeetap rebiik eng' saang'.

2Ama ibwaati eng' mugulelwekwak kole abwaati yaityennywa tugul: yiemei icheek anyun poisyonikwak; mi tainnyu chooto.

3Iboiboi laitoryat eng' yaityennywa, ak koboiboi pounik eng' lembechekwak.

4Icheek tugul ko piik che yaei ibeetapkei; uu kapkoima ole ilaali peelindetap magatiinik; ma iywokyin maat kobooch kityo kokwonykwonyi magatyat agoi koguut.

5Ki eeiso pounik kot kobogityo miising' eng' maiyek eng' peetuutap laitoryannyo; ki chuul eunnyi kobooto chotiik.

6Amu Ki kochop mugulelwekwak koigei kapkoima, kota kosaptoi icheek: ruei peelindetap magatiinik kemout komugul; lalei karon ko uu maat ne liplibeni.

7Peelei piich icheek tugul ko uu kapkoima ak koamei kirwoogikwak; ki kobutyo laitorinikwak tugul: ma mi eng' icheek ne kuura.

8Puruchigei Ephraim ak pororyosyek; Ephraim ko magatyat ne ma kiwechwech.

9Ki koam kipsagarek kimnateennyi ama naei, ee, mi kalwalek alage yu, komi alage yuun eng' ineendet ama naei.

10Ak paoryani menoteetap Israel eng' tainnyi: agot ngo uu nooto koma weekyigei Kamuktaindet ne Toroor Kamuktaindennywa, anan kocheeng' ineendet eng' chuuto tugul.

11Uu Ephraim cheptuget ne perber, ne ma tinyei kaguiyet: kuurei Misiri, pendi Assyria.

12Ye pa, aitoochi icheek mestennyu ne uu regereiywot; atururu ko uu toriitigap parak: atigooni ko uu ye ki kogas tuiyennywa.

13Pwo eng' icheek! Amu ki koombeniot kometaa: ingonyonji icheek ng'emisyet! Amu ki kongelelja: agot nganda amache atyach icheek, ko ki komwa kora lembechek agobo anee.

14Ama riircho eng' mugulelwekwak, ago iteitos eng' itogusyekwak: iyumigei agobo peek ak divaik; ingeleljino.

15Agot nganda ki aneet icheek ak agimiit eunekwak, kochobei yaityet agobo anee.

16Weektogei, ago ma weekyingei ineendet ne mi parak; uu kwanget ne itustusoot: kibarei pounikwak eng' rotwetap chok amu nereegegap ng'elyebwekwak: egu niito chotisyennywa eng' emetap Misiri.

← Chapter 6 Jump to: Chapter 8 →