Hosea 12

Kalenjin Bible Revised (BUKUIT NE TILIIL Sireet ne Dutero Kanon)

← Chapter 11 Jump to: Chapter 13 →

1Paegei Ephraim usoonet, ak kosuboti usoonetap kong'asiis; tesei kotugul lembechek ak ng'emisyet; ak koyomisegei kobooto Assyria, ak keip mwanik koba Misiri.

2Ibeligei kogeny Kamuktaindet ne Toroor ak Judah, ak kobir Jakobo ko uu ortinwekyik; yaakyin ineendet ko uu poisyonikyik.

3Ki nam kwaryatap ng'eetap kamet komi moo; ak ki tinyei kimnateet kobooto Kamuktaindet ko kagoeet:

4ee, ki tinyei kimnateet koterteer malaikaiyat, ak ki iterteer. Ki riir, ak kosa ineendet: kinyoorchi `ineendet Bethel, ak ki ng'alaalwech eng' olooto;

5ineendet Kamuktaindet ne po Toroornatet ne po lugoosyek; Kamuktaindet ne Toroor ko kainennyi.

6Iweekyigei anyun Kamuktaindeng'ung': riip rireenet ak kirwooget, ak igen Kamuktaindeng'ung' kotugul.

7Chemung'araindet ineendet, mi eunnyi tuguugap lembech che kegerisye che po ng'aalseet: chamei kochiile piich.

8Ak ki mwa Ephraim kole iman, kaaegu mogoryot, kaanyooru mogornateet; ma tuun nyooru icheek yaityet ne kitengekto, eng' poisyonikyuk tugul.

9Ago aa Kamuktaindet ne Toroor Kamuktaindeng'ung' kobooch emetap Misiri; taagoonin kogeny imeny emaisyek, ko uu eng' peetuusyegap igoorto ne ki king'at.

10Ki ang'alaalji maotik, ak ki ates ng'ang'utik; ak ki aboisyee kalewenaik eng' poisyetap maotik.

11Tos mi tengek Gilead? Puch piikwak tugul; enyei kiruugik eng' Gilgal: kapkorosusyekwak ko uu koik che kagiruruuch eng' mbar ne ibatat.

12Ak kimwechi Jakobo emetap Aram, ak ki otis Israel agobo osotyot, ak ki iyagis si kobiit konyoor osotyot.

13Ak ki imoong' Kamuktaindet ne Toroor Israel eng' emetap Misiri eng' maotyot, ak kiriiboot maotyot ineendet.

14Kitagis miising' Ephraim: nooto anyun tebee korotiikyik ineendet, ak koweekyi Kiptaiyandennyi ineendet teweernatennyi.

← Chapter 11 Jump to: Chapter 13 →