Deuteronomy 17

Kalenjin Bible (BUKUIT NE TILIL)

← Chapter 16 Jump to: Chapter 18 →

1Ameeng’ji Jehovah Kamuktaindeng’ung’ eito, anan kechiriet, ne tinyei berut, anan kiy age tugul ne ya: amu wechei noto Jehovah Kamuktaindeng’ung’.

2Ngo biitune kwenung’ung’, eng’ kurgotiguk alak tugul che konin Jehovah Kamuktaindeng’ung’, ne muren, anan kwondo, ne yaei ne ya eng’ taitab Jehovah Kamuktaindeng’ung’ kobistoe arorutiennyi,

3ak kwo koot kanamonik, kogutung’ji, anan asista, anan arawet, anan age tugul ne bo chang’indab kipsengwet, ne ma ang’at;

4ak kemwaun, ak igas, isiach anyun eng’ kagiiletab ge, ak ngo bo iman noto, ak ko u noto kioto, kele, kiyaei ne te noto ne kiwechei eng’ Israel;

5imutu anyun murenonoto anan kobogoriondonoto ne kayai kioto ya, konyo kurgotiguk, chichoto anan kobogoriondonoto; ak inyo ilach eng’ koik kot kome.

6Kibarei chichoto eng’ ng’alekab baorinik aeng’ anan ko somok; magibarei eng’ baornatetab chito agenge.

7Ingosib kolach baorinichoto kibarei, yeityo kolach bik tugul. Iste anyun ko u noto yaitiet eng’ kwenung’ung’.

8Ngo biit ng’olyot ne uui eng’ kiruoget ne temenen, ne bo korotik eng’ korotik, ak ng’olyot eng’ ng’olyot, ak biret eng’ biret, che kaek kabeletab ge eng’ kurgotiguk: ing’eet anyun, iwe ole leweni Jehovah Kamuktaindeng’ung’;

9ak inyo ole mi tisiik Lawik, ak kiruogindet ne mi eng’ betusiechoto: ak iteeb; ak koborun ole teptoi kiruoget.

10Si iyai anyun ko u ole teptoi ng’alekwak, che iborun eng’ komosta ne leweni Jehovah; si irib iyai ko u tugul che inetin:

11ko u ng’olyotab ng’atutiet ne inetin bichoto, ak ko u kiruoget ne mwaun, iyai ko u noto: amemaste eng’ kiruoget ne iborun, iwe eutab tai anan katam.

12Ak chito ne yaei eng’ losetab ge ne magasei ng’alekab tisiindet ne tononi koboisiei eng’ taitab Jehovah Kamuktaindeng’ung’, anan kiruogindet, komeei chichoto: ak iiste yaitiet eng’ Israel.

13Ak kogas bik tugul, ak koiywei, si mata koyai eng’ losetab ge kogeny.

14Ye kaiit emet ne konin Jehovah Kamuktaindeng’ung’, ak inam kobunjin, ak imeny oloto; ak ile, Kande laitoriat koboiywa, ko u bororiosiek tugul che mi komoswekyuk;

15inde anyun iman koek laitoriat koboun, inendet ne leweni Jehovah Kamuktaindeng’ung’: inde age eng’ tupchosieguk koek laitoriat ne boun: amat inde bunotyot ko boun, ne ma ne otupche.

16Ago amat kotesyigei mbartanyisiek, anan kogochi bik koweektagei Misri, si kotes mbartanyisiek: amu kimwawok Jehovah kole, Amata oweektage oranato kogeny.

17Amat kotes osotik, si magusgong’ muguleldanyi: anan kotesyigei feda ak tahabu che chang’.

18Ak ye kagotebe ng’echeretab bororiennyi, kosirjigei ng’atutioni konde bukuit, kosub noto tinyei tisiik Lawik:

19ak kotepto, ak kosoman kote kosobei: si konetgei koiywei Jehovah Kamuktaindennyi, korib ng’alek tugul che bo ng’atutioni ak konetisiosiechu, koyai:

20si meetgei eng’ muguleldanyi kosiir tupchosiekyik, ak komasta kometo ng’atutiet, kwo eutab tai anan ne bo katam: si kobiit kochang’a betusiekyik eng’ laitornatennyi, inendet ak lagokyik, eng’ kwenutab Israel.

← Chapter 16 Jump to: Chapter 18 →