Deuteronomy 26

Kalenjin Bible (BUKUIT NE TILIL)

← Chapter 25 Jump to: Chapter 27 →

1Ak ye kaiit emet ne konin Jehovah Kamuktaindeng’ung’ koek borotet kobunjin, ak imeny oloto;

2inam anyun eng’ tongoanik tugul che bo logoek che bo emet che iibu eng’ emeng’ung’ ne konin Jehovah Kamuktaindeng’ung’; inde kitonget, iib koba ole leweni Jehovah Kamuktaindeng’ung’ kole konde kainennyi.

3Ak inyo anyun ole mi tisiindet ne mi eng’ betusiechoto, nyo ilenji, Aborjini rani Jehovah Kamuktaindeng’ung’ alenjini, Kaitu emet ne kiiyosiechi Jehovah kwanisiekyok kole konech.

4Yeityo koib tisiindet kitonget eng’ eung’ung’, ak konde taitab kaptisisietab Jehovah Kamuktaindeng’ung’.

5Ak iwolu eng’ taitab Jehovah Kamuktaindeng’ung’ ile, Ki Suriaindet baba ne kimachei kobet, kichortagei Misri, komeny oloto, kima kotia; ak kiek bororiet ne o eng’ oloto, kogimit, ak kochang’ait.

6Ak kiyaiywech ne ya Misrik, kiinyalilech, ak koratyech boisiet ne nyigis:

7ak kigirirji Jehovah, Kamuktaindetab kwanisiekyok, ak kigas Jehovah kutinnyo, kigeer nyalildanyo, ak birtoennyo bo ge, ak sastaet ne kigisastaenech:

8ak kiimoong’wech Jehovah eng’ Misri, eng’ eut ne kim, ak eng’ eut ne chuulat, ak eng’ kamuiset ne o, ak eng’ kaborunoik, ak kwong’utik:

9ak kigomutwech keitu olito, ak kigonech emoni, emet ne nyiitat chego ak kumik.

10Keer nguno anyun, kaibu tongoanik che bo logoek che bo emet ne kiigona inye Jehovah. Yeityo inde ng’ony eng’ taitab Jehovah Kamuktaindeng’ung’, ak ilosu Jehovah Kamuktaindeng’ung’:

11ak ibaibaitu eng’ mieindo tugul ne kigonin Jehovah Kamuktaindeng’ung’, ak gong’ung’, inye ak Lawindet, ak toondet ne mi kwenung’ung’.

12Ye kainemu iges kebeberwek che bo taman che bo kebeberwekab rurateng’ung’ eng’ kenyit ne bo somok, noto kenyit ne kigoitoe kebeberta, igochi choto anyun Lawindet, ak toondet, ak ne matinyei kwanda, ak mosoget, si koamis eng’ kurgotiguk kobiyong’so;

13yeityo imwa eng’ taitab Jehovah Kamuktaindeng’ung’, ile, Kaanemu eng’ gonnyu tuguk che itabanotin, kaagochi agine Lawindet, ak tondet, ak ne matinyei kwanda, ak mosoget, ko u ng’atutieng’ung’ tugul ne kiing’ata: ma abistoe ng’atutiguk alak tugul, ama autie:

14ma aam tukchoto eng’ rirekyuk, ama aiste alak eng’ choto, aboisie eng’ boisiet ne ma tilil, ama agoite amu che kigobek: kiagas it kutitab Jehovah Kamuktaindennyu, kiayai ko u tugul che kiing’ata.

15Keer anyun ng’ony eng’ meng’ateng’ung’ ne tilil, eng’ kipsengwet, ak iberur biguk Israel, ak emet ne kiigonech, ko u ye kiiyosiechi kwanisiekyok, emet ne nyiitat chego ak kumik.

16Kang’atin rani Jehovah Kamuktaindeng’ung’ iyai konetisiosiechu ak kiruogutichu: rib anyun ak iyai eng’ muguleldang’ung’ komugul, ak eng’ sobondang’ung’ komugul.

17Keng’any rani Jehovah, ile, inendet ko Kamuktaindeng’ung’ ak ile kanyol iwendote ortinwekyik, ak irib konetisiosiekyik, ak ng’atutikyik, ak kiruogutikyik, ak igas it kutinnyi:

18ak kang’any Jehovah rani kole, I bororiet ne kigitabanin iegu nenyi, ko u ye kiiarorun, ak si kobiit irib ng’atutikyik tugul;

19ak koyain itororitu isiir bororiosiek tugul che kiyai inendet eng’ kalosunet, ak kainet, ak teegisto; si iegu bororiet ne tilil eng’ Jehovah Kamuktaindeng’ung’, ko u ye kimwa.

← Chapter 25 Jump to: Chapter 27 →