Deuteronomy 24

Kalenjin Bible (BUKUIT NE TILIL)

← Chapter 23 Jump to: Chapter 25 →

1Ngotunis chi, ama nyor osotiondennyi chamet eng’ tainnyi, amu kageerji chichoto kiy ne ya kwonyoto, kosirji anyun siretab besiet, konde eunnyi, ak koon eng’ gonnyi.

2Ak ye kagomanda eng’ gotab chichoto, komuchi koek osotiotab chito age.

3Ak ngo wech inendet manong’otiot ne bo let, ak kosirji siretab besiet, ak konde eunnyi, yeityo koon eng’ gonnyi, anan ngo me manong’otiot ne bo let, ne kiitun inendet;

4ko mat komut manong’otiondennyi ni ki bo tai, ne kionei inendet, kole koek osotiondennyi kogeny, ko kagong’wanit; amu wegot noto eng’ taitab Jehovah: amat igochi emet koyai tengek, ne konin Jehovah Kamuktaindeng’ung’ koek borotet.

5Ye kagotunis chito, ko mat kwo luget, anan kiim eng’ boit age tugul: kotebi eng’ ga kenyit agenge, si kobiit kobaibai osotiondennyi ne kogotun.

6Amat koib chi koitab bai anan isiet kobunji kaarorunet: amu ngo nam ko u noto ko kabunji kaarorunonoto sobondab chi.

7Ngenyor chi ne kachor tupchennyi age ne bo lagokab Israel, ak koyachi ko u otwogin, anan koalda, ingome anyun chorindonoto: iste ko u noto anyun yaitiet eng’ kwenung’ung’.

8Ripge eng’ koroitab mogondosik, rib komie eng’ kagiiletab ge, ak iyai ko u tugul che inetin tisiik Lawik: ko u ye kiang’at ichek, orib anyun si oyai ko u noto.

9Ibwat kit ne kiita Jehovah Kamuktaindeng’ung’ Miriam, eng’ oret ye kiomong’u eng’ Misri.

10Ye ibesendochi chitab kokweng’ung’ kiy age tugul, ko mat iwe gonnyi inemu kit ne iname besendo.

11Tonone sang’, inye ne iyaaksei, si koibun konyo sang’ kit ne iname besendo.

12Ak ngo kibanania chichoto, komat iru itinye kinnyi ne iname besendo:

13iweekyi kinnyi ko karorokto asista, si kobiit kotugegei ye ruei ak koberurin: ak koek noto imanda eng’ inye eng’ taitab Jehovah Kamuktaindeng’ung’.

14Amesastae otwogindet ne nyoru melekto ne kibanania ne nyalili, ngo age eng’ che otupche, anan ngo bo bunotik che mi emeng’ung’ eng’ kurgotiguk:

15igochi inendet melektanyi eng’ betunnyi ne bo melekto; ameng’ kororokto asista kotom igochi; amu kibanania, ak imang’u choto: si marirji Jehovah agobo inye, ak koek tengekto eng’ inye.

16Magibarei kwanisiek amu lagok, anan kebar lagok amu kwanisiek: kibarei chi age tugul inegei agobo tengektanyi.

17Amemaas kiruogetab toondet, anan ne matinyei kwanda; anan iname besendo ngorietab mosoget:

18ago ibwat ile ki i otwogin eng’ Misri, kiitiachin Jehovah Kamuktaindeng’ung’ eng’ oloto: kang’atin anyun amu noto ale iyai kiito.

19Ye igesisie eng’ mbareng’ung’, ak iutie ratutikab bek eng’ mbar, ko mat iweege iwe iibu: ingobunji toondet, ak ne matinyei kwanda, ak mosoget: si kobiit koberurin Jehovah Kamuktaindeng’ung’ eng’ tuguk tugul che iname eung’ung’.

20Ye itui logoekab emitiguk ko megetyinotegei iturote eng’ temenik: ingobunji toondet, ak ne matinyei kwanda, ak mosoget.

21Ye ibute logoekab mbareng’ung’ ne bo sabibuk, ko megetyigei iturote: ingobunji toondet, ak ne matinyei kwanda, ak mosoget.

22Ak ibwat ile ki i otwogindet eng’ emetab Misri: kang’atin anyun eng’ noto ale iyai ng’olyondonito.

← Chapter 23 Jump to: Chapter 25 →