Lamentations 1

Kalenjin Bible (BUKUIT NE TILIL)

Jump to: Chapter 2 →

1Lyon si komi buch nganaset, ne ki nyiitat bik! Lyon si kotebi ko u mosok! Nganaset ne ki o eng’ bororiosiek, ak ko ki cheptab laitoriat eng’ emotinwek, Kagoek anyun otwogindet!

2Rirei mising’ kemoi, ak kotendeni beekab kong’ eng’ matang’wekyik; Mami agot agenge ne igoigoi inendet eng’ chamanikyik tugul: Kigoberber choronokyik tugul inendet, Kagoek bunikyik.

3Kigiluul Juda amu nyalilda, ak amu otwoknatet ne o; Menyei kwenutab bororiosiek, masichei kamuung’et: Kagonam inendet usikyik tugul eng’ ole bichii.

4Iteitos ortinwekab Sion, amu mami chi ne nyonjin tuiyet ne kiging’at; Kigoek karatia ormarichokyik tugul, tigendos tisiikyik: Kinyalili bergeinikyik, ak kotinyei inendet ng’wanindo.

5Kogoek usikyik kandoik, nyoru borotet bunikyik; Amu kogonyalil Jehovah inendet amu chang’indab bistaosiekyik: Kogimut lagokyik keluul eng’ taitab bunyot.

6Kogoistoegei cheptab Sion torornatennyi tugul: Kogoigei bounikyik cheptirgichik che matinyei ole agete, Ak komwei ama tinyei kimnatet eng’ taitab chito ne onei.

7Ibwati Jerusalem eng’ betusiekab nyalildanyi ak che bo bichiinwekyik Tugukyik tugul che kiiboiboi inendet koboch betusiek che bo keny: Ye kiibutyi bikyik eutab bunyot, ama toret chi inendet, Kigeer bounik inendet, kichot nyerotiosiekyik.

8Kigoyai Jerusalem tengekto ne ya mising’; kogoek anyun kit ne muruon amu noto: Sasei inendet tugul che kigonyiti inendet, amu kigogeer ach ngorinnyi: Ee, tigeni, ak koweechigei let.

9Kimi simdanyi ngoroikyik; ma ibwat kagesunennyi ne bo let; Katururgei anyun eng’ kwong’et; matinyei kagaigaindet: Keero, ee Jehovah, nyalildanyu; amu kogotororgei bunyot.

10Kogoiitochi bunyot eunnyi tugukyik tugul che koboiboitune: Amu kagogeer kole kogochut bororiosiek oldanyi ne tilil, Che kiing’at ile, amat kochut ichek tuiyeng’ung’.

11Tigendos bikyik tugul, cheng’ei amitwogik; Kigogoito tugukwak che kororon si konyorune amitwogik che isoobi sobondo: Keero, ee Jehovah, ak ibwat; amu kaaegu ne kisasei.

12Tos ma kiy eng’ okwek, okwek tugul che osiirtoi? Ogeer ak obwat ngo mi arogenet age tugul ne u arogenennyu, ne kigiyaiywa, Ne kiinyalilena Jehovah eng’ betutab neregekyik che ng’wonen.

13Kiiyok inendet mat eng’ barak koyokyi kowekyuk, ak kiiterter maata kowek: Kiriich mestet konam kelyekyuk, kigoweekya let; Kigoyaa aek banan ak atanui bet komugul.

14Kirat eunnyi chogitab bistaosiekyuk: Kigonamgei tugul, kigoit kaatinnyu; kigoges kimnatennyu: Kigondea Kiptaiyat eunekwak, ne ma amuchi atonon agirinda.

15Kigoyai Kiptaiyat bik tugul che nyigonen koek buch eng’ kwenunnyu; Kigoguurja tuiyet ne kiging’at kole kotuatui neranikyuk: Kigotiechatiech Kiptaiyat bergeiyatab Juda ko u ye kitiechei ole kitue sabibuk.

16Arire anyun agobo tuguchuto; saitoi beekab kong’ eng’ konyekyuk; Amu loo eng’ ane kagaigaindet ne kata isoobi sobondanyu: Kigoek lagokyuk kibananok, amu kigoterteris bunyot.

17Iitoi Sion eunekyik; ago mami chi ne igoigoi inendet; Kigong’at Jehovah agobo Jakobo, kole egu bunikyik bik che menyei komoswekyik: Mi Jerusalem kwenunywa ko u kit ne muruon.

18Bo imanda Jehovah; amu kiangelelji ng’atutiennyi: Asaok ale, ogas okwek bororiosiek tugul, ak ogeer arogenennyu: Kogimut bergeinikyuk ak neranikyuk koba koek luulenik.

19Kiaguur chamanikyuk, ago kiiberbera: Kibekyi nganaset tisiikyuk ak boisiekyuk, Ye kicheng’jingei amitwogik kole kosoob sobonwekwak.

20Keero, ee Jehovah, amu ami bichiindo; anyalili moennyu; Kawalak muguleldanyu; amu kaangelel mising’: Rebisiei rotwetab chok eng’ ole bo sang’, mi ga ne u meet.

21Kigogas ichek kole atigeni; mami chi ne igoigoa; Kigogas bunikyuk tugul agobo nyalildanyu; boiboi ichek amu kiiyai ko u noto: Tun iibu betut ne kiimwaite, si kegergeitu ak ichek.

22Ingobwa taing’ung’ yaitwogikwak tugul; Ak iyachi ichek, ko u ye kiiyaiywa agobo bistaosiekyuk tugul: Amu chang’ tigenoikyuk, ak tanui muguleldanyu.

Jump to: Chapter 2 →