Lamentations 2

Kalenjin Bible (BUKUIT NE TILIL)

← Chapter 1 Jump to: Chapter 3 →

1Lyon si kotuge Kiptaiyat cheptab Sion boldet eng’ neregekyik! Kigotim kororonindab Israel eng’ kipsengwet konyo ng’ony, Amata kobwat ng’echeretab kelyekyik eng’ betutab neregekyik.

2Kigolugui Kiptaiyat meng’otosiek tugul che bo Jakobo, ama rire; Kigobut eng’ neregekyik irimoikab cheptab Juda; Kigoturur ichek kobwa ng’ony: Kigong’wanit bounatet ak bounikyik.

3Kigotil kuinetab Israel eng’ neregekyik che ng’wonen; Kigoweech eunnyi ne bo tai konyo eng’ taitab bunik: Ak kigobeel Jakobo ko u mat ne liblibeni, ne beelei komoswek tugul.

4Kigoriich kwangennyi ko u bunyot, kitonon kochuul eunnyi ne bo tai ko u bunyot, Ak kigobar tugul che iboiboi konyek: Kigorong’ neregekyik che koromen ko u mat, korong’ji emaitab cheptab Sion.

5Kiigei Kiptaiyat bunyot, kigolugui Israel; Kigolugui gorikyik tugul che bo laitorinik, kigong’em irimoikyik: Kigotesyi cheptab Juda rirek ak kateiyet.

6Kigoisto emainnyi eng’ koromnatet, ko u kit ne bo seremut; Kigong’em oldanyi ole kituiyechin: Kigoyai Jehovah tuiyet ne kiging’at ak sabato keutie eng’ Sion, Ak kigosas eng’ nyitatetab neregekyik laitoriat ak tisiindet.

7Kigotimda Kiptaiyat kaptisisiennyi, ak kigowech oldanyi ne tilil, Kigonde irimoikab gorikyik che bo laitorinik, eutab bunyot: Kigobolyo eng’ gotab Jehovah, ko u eng’ betutab tuiyet ne kiging’at.

8Kigochob Jehovah kong’em irimetab cheptab Sion; Kigokwerta kit ne kikwaise, tom koaruny eunnyi eng’ ng’emisiet: Ago kigogochi irimet ak totet koteeiyo; nyaluldos tuwai.

9Isuwe kobendi ng’ony ormarichokyik; king’em ak koiri temeleiywekyik: Mi laitoriandennyi ak bounikyik kwenutab bororiosiek ole mami ng’atutiet; Ee, manyoru maotikyik ng’ang’utiet ne bunu Jehovah.

10Tebyei ng’ony boisiekab cheptab Sion, sistos; Kigoseerji temburiek metowekwak; kigogermenegei kuniok: Abuchi bergeinikab Jerusalem metowekwak.

11Ibwandos konyekyuk amu beekab kong’, nyalili moennyu, Kigorong’jigei ng’ony koennyu, amu ng’emisietab cheptab bikyuk; Amu tanuitos lagok ak che reriei eng’ ortinwekab nganaset.

12Teebe ichek kametwagikwak kolenjin, Mi ano bek ak divaik? Ye katanuiso ko u che kagiguoten eng’ ortinwekab nganaset, Ye karong’jigei sobonwekwak tegetikab kametwagikwak.

13Abaorianun alen nee? Arogenen nee, ee cheptab Jerusalem? Aaechindosin ak nee, si kobiit agaigain, ee bergeiyat, cheptab Sion? Amu o ole kibutok eng’ inye, ko u nyanjet: ng’o ne imuchi konyain?

14Kigogeer maotiguk ng’ang’utik agobo inye che bo tangoita ak berberindo; Ak tom kong’any tengektang’ung’, kotook, si koweechin kogeny eng’ ole kigiluuljin: Ago kigogeer agobo inye lautik che bo buch ak ng’alek che bo onset.

15Iraprapchin eunek ichek tugul che siirtoi; Reng’sei ak kolelechi metowekwak agobo cheptab Jerusalem, kolen: Tos nganasanito ne kiguure bik, Ne igesunotgei eng’ kororonindo, Ne boiboiyetab ng’ony komugul?

16Kagoyatyin kutuswekwak buniguk tugul; Reng’sei ak kosusei kelek; mwaei kole, Kigelugui inendet; Iman, nito betut ne kigicheng’e; kagenyoru, kagegeer.

17Kigoyai Jehovah noto kigochob; Kagoyai ng’olyondennyi kosulda ne kiga ng’at eng’ betusiek che bo keny; Kagowirta kwo ng’ony, ama rire; Ak kagogochi bunyot koboiboitunenen, Kagotoror kuinetab buniguk.

18Kirirji mugulelwekwak Kiptaiyat: Ee irimetab cheptab Sion, ingotenden beekab kong’ ko u ainet bet ak kemoi; Amemuuny; amengosis laptetab kondang’ung’.

19Ng’eet, waach kemoi eng’ taunetab saisiekab kemoi; Rong’u muguleldang’ung’ ko u beek eng’ taitab Kiptaiyat: Namji barak euneguk tokyi inendet agobo sobonwekab lagoguk, Che tanuitos eng’ rubet eng’ tabandab oret age tugul.

20Keero, ee Jehovah, ak ibwat ile ng’o ne kiiyachi ko u noto! Tos amei kwonyik iyotenywa, lagok che namei eng’ eunekwak? Tos kibarjin tisiindet ak maotiot oldab Kiptaiyat ole tilil?

21Ruitos ng’ony murenik ak boisiek eng’ ortinwek; Kagebar bergeinikyuk ak neranikyuk eng’ rotwetab chok: Kiibar ichek eng’ betutab neregeguk; kiibar, ama irire.

22Kiiguur kamuisosiekyuk eng’ komosta age tugul, ko u eng’ betutab tuiyet ne kiging’at. Ama biit chi ne kichilil anan ne king’et eng’ betutab neregekab Jehovah: Kigoges bunyondennyu icheget che kianame ak aribe koboch ko mengech.

← Chapter 1 Jump to: Chapter 3 →