Lamentations 4

Kalenjin Bible (BUKUIT NE TILIL)

← Chapter 3 Jump to: Chapter 5 →

1Lyon si komuruonitu tahabu! Lyon si kowalaksei tahabu che tililen mising’! Kagirong’ koikab ole tilil eng’ tabandab oret age tugul.

2Kergei werikab Sion che bo kamanutiet ne o ak tahabu che kororon, Lyon si kiit ichek ko u terenik, che boisietab eunekab cheptereniot!

3Tinyei lelwek agichek kinaik, igochin arekwak koreri: Kagogolgolit cheptab bikyuk, ko u tiong’ikab songolik eng’ ong’atet.

4Yaamei ng’elyeptab lakwet ne reriei eng’ kutinnyi amu melelda: Somei lagok amitwogik, ama mi chi ne butyin.

5Kimetoi eng’ ortinwek ichek che kibaegei amitwogikab talbisto: Tebe kapng’atat icheget che kinerta kalaaksetab ngoroik che biriren.

6Amu o tengektab cheptab bikyuk kosiir tengektab Sodom, Ne kiging’em kigabui eng’ sait ne matia, ama twa chi.

7Ki tililen bikyik che toogunotin kosiir teluchi, ki leelach ichek kosiir chego, Ki biriren borwekwak kosiir koik che kiguure peninim, ki sitotin ko u koita ne kiguure sapire:

8Tuuen togochikwak kosiir nesek; maginae eng’ ortinwek: Namegei irirenikwak ak kowekwak; kogoresyo, kogoigei ketit.

9Kaigai che barei rotwetab chok kosiir icheget che barei rubet; Amu restos choto, kogoterterogis, amu manyor tugukab mbar.

10Kigonam kwonyik che kitinyei rirenet lagokwak koyo; Kiek choto amitwogikwak eng’ ng’emisietab cheptab bikyuk.

11Kigoyai Jehovah neregekyik che ng’wonen kosulda, kigorong’ neregekyik che koromen; Ak kigonaam mat eng’ Sion, ne kigobeel lumeiywekyik.

12Kima koyani laitorinikab ng’ony, anan bik tugul che menyei ng’ony, Kole imuchi usindet ak bunyot kochut ormarichokab Jerusalem.

13Kibiit ko u nito amu tengekwogikab maotikyik, ak yaitwogikab tisiikyik, Che kitumda korotikab bik che bo iman eng’ kwenunnyi.

14Ombenioti eng’ ortinwek ko u kipkoratinik, kigong’wonegitu amu korotik, Kot ko ma komuchi bik kotwa ngoroikwak.

15Kitwekyi kolenji, Oistege, ng’wonen! Oistege, oistege, amotwa: Ye kimwei ak koombeniot, kole bik eng’ bororiosiek, Ma komenyei olito kogeny.

16Kigopchei ichek neregekab Jehovah; ma koiiti Jehovah ichek kogeny: Ma tiytii ichek tisiik, ma tiytii boisiek.

17Kagong’etyo konyekyok kigeni toretet ne matilei kiy: Kigigen eng’ kagenisiennyo bororiet ne maimuchi kosor chi.

18Sapchin kakwautikyok, kot ko magimuchi kebe eng’ ortinwekyok: Karik kagesunennyo, kagoyam betusiekyok; amu kait kagesunennyo.

19Chepcheben che onatech kosiir kipsichinikab barak: Kionatech eng’ tulonok, kisapchech eng’ ong’atet.

20Kinamji keringonikwak kabusetab serunekyok, noto ko inendet ne iilat ne bo Jehovah; Ne kigimwae achek kelen, Kimenye kwenutab bororiosiek eng’ uruetab kebebaikyik.

21Baibaitu ak igasge, ee cheptab Edom, ne imenye emetab Us: Ityinin aginye kikombet; ibogiti, ak itebi ach ngor.

22Kagosulda biretab tengektang’ung’, ee cheptab Sion; Ma komutin kogeny keluulin: Iityin inendet biret tengektang’ung’, ee cheptab Edom; Ng’anyei tengekwogiguk kotook.

← Chapter 3 Jump to: Chapter 5 →