Micah 1

Kalenjin Bible (BUKUIT NE TILIL)

Jump to: Chapter 2 →

1Ng’olyotab Jehovah ne kinyonji Mika Morastindet eng’ betusiekab Jotam, Ahas, ak Hesekia, laitorinikab Juda, ne kigeer agobo Samaria ak Jerusalem.

2Ogas okwek bororiosiek, okwek tugul, oepchi it, ee ng’ony, ak tugul che mi oloto: ak ingoek Kiptaiyat Jehovah baoriat eng’ okwek, Kiptaiyat ne mi hekalunnyi ne tilil.

3Amu, ogeero, mong’u Jehovah eng’ oldanyi, ak kochorgei, ak kotiech komoswek che tororen che bo ng’ony.

4Ak kochootyo tulonok eng’ kelyekyik, ak kobetogis atebwosiek, ko u ye chotei temeniet ko kauchi mat, ko u beek che kirandoi eng’ ole keigei.

5Biitu chuto amu bistoetab Jakobo, ak amu tengekwogikab gotab Israel. Nee bistoetab Jakobo? Tos ma Samaria? Ak nee komoswek che tororen che bo Juda? Tos ma Jerusalem?

6Ayae anyun Samaria koek karurugutietab emet, ak koigei ole kiminjin sabibuk: ak atumde koikyik koba atebwet, ak ang’any lumeiywekyik.

7Ak kebir ketuatui kanamonikyik tugul che kigiwai, ak kebeel melekwekyik tugul, ak ang’em kanamonikyik tugul: amu kiiyumune choto melektab kugoinatet, ak koweekyigei melektab kugoinatet.

8Ateei ak awaache amu nito, awendi ko kagireegunena ngoroik ak ami ach ngor: ateei ko u lelwek, ak arire ko u tiong’ikab songolik.

9Amu ma inyaoksei ng’otobosiekyik: amu kagonyo kot koit Juda; itei ormarichetab bikyuk, agoi Jerusalem.

10Amat imwaite ng’olyondonito eng’ Gat, amat irir agot kitigin: kiamildaege temburiek eng’ Bet-le-Apra.

11Osiirte, ee okwek bik che omenye Sapir, osiirte omi ach ngor ak kalilanet: tomo komong’ chito ne menyei Saanan; rebenok kateiyetab Bet-esel kinnyi ne tonone.

12Amu igeni mising’ chito ne menyei Marot kole konyor mieindo: amu kachorjigei yaitiet ormarichetab Jerusalem kobunu Jehovah.

13Ratyi karitab luget mbartanyit ne chepcheb, ee inye chito ne imenye Lakis: ki taunindetab tengekto inendet ne bo cheptab Sion; amu kiginyorjin bistaosiekab Israel.

14Igochini anyun Moreset-gat kagochinetab saisere: egu gorikab Aksib kit ne bo ng’alset eng’ laitorinikab Israel.

15Ta amutun chito ne nyonei konamin ibunji, ee inye ne imenye Maresa: itei torornatetab Israel Adulam.

16Ingochurin met, ak icheru meting’ung’ agobo lagok che iboiboin: tes bostang’ung’ si koigei ne bo chepsengwet; amu kageluul ichek eng’ ole imi.

Jump to: Chapter 2 →