Micah 2

Kalenjin Bible (BUKUIT NE TILIL)

← Chapter 1 Jump to: Chapter 3 →

1Bwa eng’ ichek che chobei tengekto ak kotilei eng’ itogusiekwak ole yaitoi yaitiet! Ye kagoeech koyaei, amu tinyei kimnatet koyai.

2Kasei miat mbarenik, ak koreb; koboto gorik, ak koib: ak kous chito koboto gonnyi, chito koboto tugukyik.

3Mwaei anyun Jehovah ko u ni kole: Ogeero, achobe yaitiet agobo goi, ne moistoe kaatwekwok anan obendate menotet; amu yaachen betusiechoto.

4Mwaei eng’ betunoto kalewenet agobo inye, ak korir eng’ rirek che ng’wonen, kole, Kageng’emech kigeswech: walei kebebertab bikyuk: istoena kiito kot koit ano! Pchechin ngelelik mbarenikyok.

5Menyoru anyun chito ne wirtoi borowet eng’ barbariat eng’ tuiyetab Jehovah.

6Mwaei ichek kole, Amomaoten. Mamaotenjin ichek chuto: mabetos chotisiosiek.

7Ee gotab Jakobo, tos kimwae kele, Tos rartaat Tamirmirietab Jehovah? Tos boisionikyik chuto? Tos mayachin ng’alekyuk ne mie inendet ne wendote imanda?

8Ago kota koboriena bikyuk ko u bunyot: oreegune ngoriet ne tabanu barak ichek che siirtoi eng’ kalyet, ko u bik che machamei luget.

9Otimdoi kwonyikab bikyuk koba eng’ gorikwak che kororon; orebe torornatennyu lagokwak agoi.

10Ong’eetye, ak obe; amu ma olito ole omuung’e: amu muruonindo ne ng’emisiei, ee, ng’emisiet ne ya kot.

11Ngot komwa lembech chito ne wendoti eng’ usonet ak lembechek, kole, Amaotenun agobo divaik ak maiyek; koegu inendet maotiotab bichu.

12Ee Jakobo, ayumok iman okwek tugul; ayumi iman che king’et che bo Israel; ayumi ichek ko u kechirekab Bosra: ko u akwetab kechirek eng’ kwenutab ole agete, boldos kot amu chang’indab bik.

13Kagondoe butindet ichek: kagobutis ak koba agoi ormarichet, ak komandae yoto: kagondoe ichek laitoriandenywa, ak komi tainywa Jehovah.

← Chapter 1 Jump to: Chapter 3 →