Micah 5

Kalenjin Bible (BUKUIT NE TILIL)

← Chapter 4 Jump to: Chapter 6 →

1Iyumge anyun, obee kweanaikab luget, ee cheptab kweanaikab luget; kogoyiemech: kwere kirokto matandab kiruogindetab Israel.

2Ago inye, Bet-lehem Eprata, ne i ming’in eng’ kwenutab elfusiek che bo Juda, mong’unenen age ne nyonjina ne tun egu bounindetab Israel; ne kicham komong’u koboch keny, koboch koigeny.

3Igoitoi anyun inendet ichek kot koit betut ne sigisiei inendet ne tinyei ng’wanindo: tun weekyingei anyun che king’et che bo tupchosiekyik, lagokab Israel.

4Ak kotonon kobai akwennyi eng’ kimnatetab Jehovah, eng’ telunatetab kainetab Jehovah Kamuktaindennyi: ak kotebi; amu eetu koboch nguno agoi tabanwekab ng’ony.

5Egu chichito kalyennyo ye tun kait Asuriaindet emennyo, ak ye tun katiech gorikyok che bo laitoriat, ko tun king’eeti anyun mestowek tisab ak bik sisiit che eechen kobargei ak inendet.

6Ak kong’em emetab Asuria eng’ rotwetab chok, ak kong’em emetab Nimrod eng’ ole kibunei kebendi oloto; ak kosoruech inendet eng’ Asuriaindet ye tun kait emennyo, ye tun kanyo kotiech orit eng’ kiwotennyo.

7Ak kotebe bik che king’et che bo Jakobo kwenutab bororiosiek che chang’ ko u rewot ne bunu Jehovah, ko u ropta ne inesyin suswek; ne maigeni chi, anan kogany werikab bik.

8Ak kotebe bik che king’et che bo Jakobo kwenutab bororiosiek, kwenutab bororiosiek che chang’, ko u ye mi ng’etundo kwenutab tiong’ik che bo osnet, ko u ng’etundo ne neran eng’ kwenutab akwotisiekab kechirek: ne ye bunei kwen kotiegoti ak kotonatoni, ama mi chi ne soru.

9Ingitoror eung’ung’ eng’ baragutab buniguk, ak ingeisto buniguk tugul.

10Mwaei Jehovah kole, Tun abare eng’ betunoto mbartanyisieguk eng’ kwenung’ung’, ak ang’em karisieguk che bo luget:

11ak abar nganasokab emeng’ung’, ak abut irimoiguk tugul:

12ak aiste bonisosiek eng’ eung’ung’; ama inyoru kogeny kipsogeinik:

13ak aiste eng’ kwenung’ung’ kanamoniguk che kigiwai ak tolochiguk; ak ma ilosu kogeny boisionikab euneguk.

14Ak atutu Aserik eng’ kwenung’ung’; ak ang’em nganasoguk.

15Ak ayaaktochi mugetut eng’ neregek ak eng’ neregek che ng’wonen, bororiosiek che kima kas it.

← Chapter 4 Jump to: Chapter 6 →