Micah 7

Kalenjin Bible (BUKUIT NE TILIL)

← Chapter 6 Jump to:

1Bwa ane! Amu a u yo kagiyum logoekab kemei, a u turonik che bo sabibuk: mami logoek che irurugotin che kimuchi keam; machei sobondanyu tongoaniatab mogoiywet.

2Kigobet chi ne iywei Jehovah eng’ ng’ony, ama mi agot agenge ne bo iman eng’ bik: saptoi tugul kotumdoi korotik; riichei chi age tugul mestet agobo ng’etab kamet.

3Igiilegei eng’ eunekwak koyai kit ne ya; somsei bounindet, ak machei kiruogindet kit ne kigoigoisie; ak mwaei chito ne o maget ne ya ne bo sobondanyi: chobei ichek ko u noto.

4Ne mie eng’ ichek ko u katableliat: ne litit mising’ eng’ ichek ko ya kosiir ng’otwetab katok: kagoit betutab ribiguk, betut ne kiityinin biret; egu anyun kaiimenywa bo ge.

5Amomang’u choruet, amotiiege kandoindet: rib kurgetab kuting’ung’ eng’ inendet ne ruei eng’ tegeng’ung’.

6Amu iteweri werit kwanda, borie chepto kamet, borie osotiotab werit korgennyi ne bo yugoi; bunikab chito bikyik.

7Ago amang’u ane Jehovah; ageni Kamuktaindetab yetunennyu: kasa Kamuktaindennyu,

8amebaibaitunena, ee bunyondennyu: ye kabut, ang’eete kogeny; ye atebe mesundeito, koegu Jehovah lapkeiyennyu.

9Amuitoi eng’ neregekab Jehovah, amu kiayachi tengekto; agoi kong’alal agobo ng’olyondennyu, ak koyaiywa kiruoget: tun imutwa among’ ole mi lapkeiyet, ak ageer imandanyi.

10Yeityo kogeer anyun bunyondennyu, ak kotuch tewernatet inendet; ne kilenja, Mi ano Jehovah Kamuktaindeng’ung’? Keerei konyekyuk inendet; kitiekyin ng’ony anyun inendet ko u ye kitiechei ng’atatek che mi ortinwek.

11Betut ne kiteechei irimoiguk! Kiistoi kolooit ng’atutiet eng’ betunoto.

12Bwanjinin ichek eng’ betunoto, kobunu Asuria ak nganasokab Misri, ak koboch Misri agoi Ainet, ak koboch nyanjet agoi nyanjet, ak koboch tulwet agoi tulwet.

13Nganda u noto koegu emet karatia amu ichek che menyei oloto, amu logoekab boisionikwak.

14Iyage biguk eng’ kiroktang’ung’, akwetab boroteng’ung’, che meng’isiei ichegei, eng’ osnet ne mi kwenutab Karmel: ingoagetyo eng’ Basan ak Gilead, ko u betusiek che bo keny.

15Aborjini inendet tuguk che kikwong’e ko u eng’ betusiek che kiimong’u eng’ emetab Misri.

16Keerei bororiosiek ak kolilanso amu kimnatenywa tugul: kere eunekwak kutuswekwak, ak kotimogis itikwak.

17Melei ng’ung’unyek ko u erenet; mong’u kobotanionu eng’ komoswekwak che ung’egei ko u tuguk che ichuutegei ng’ony: bwanei eng’ kaiyweisiet ole mi Jehovah Kamuktaindennyo, ak koiyweis amu inye.

18Ng’o Kamuktaindet ne u inye, ne nyochin kaat bik amu tengekto, ak kosiirtoe bistoetab bik che king’et che bo borotennyi? Magonori neregekyik agoi, amu baibaitune rirenet.

19Tun weeksei kogeny ak korirenech; tun tiekyin ng’ony tengekwogikyok: ak iwirji tengekwogikwak tugul rirosiekab nyanjet.

20Iyachini Jakobo imanit, ak iyachi Abraham rirenet, che kigeyosiechi kwanisiekyok eng’ betusiek che bo keny.

← Chapter 6 Jump to: