Micah 4

Kalenjin Bible (BUKUIT NE TILIL)

← Chapter 3 Jump to: Chapter 5 →

1Ago kigimiti eng’ betusiek che bo let tulwetab gotab Jehovah eng’ tulonok barak, ak kitorori kosiir tulonok che mengechen; ak kotendenji bororiosiek.

2Ak bendi bororiosiek che chang’ ak komwa kole, Obwa, ketogoste tulwetab Jehovah, ak kebe gotab Kamuktaindetab Jakobo; si konetech ortinwekyik, ak kebendate ortinwekyik: amu mong’une ng’atutik Sion, ak komong’une ng’olyotab Jehovah Jerusalem.

3Ak koruoksechin bororiosiek che chang’, ak koger kong’ bororiosiek che kimen che mi ole loo; ak kotany rotokwak bo chok koek mogomboik che bo tuga, ak kotany ng’otwekwak koek chepkesok: si ma kobaregei bororiosiek, ama konetegei luget kogeny.

4Ago tebe chi tugul kelutab ketinnyi ne bo sabibuk, ak mogoiywennyi; ama mi chi ne imui: amu kagomwa Jehovah ne bo lugosiek ng’olyondonito.

5Amu wendoti bororiet age tugul eng’ bororiosiek tugul eng’ kainetab cheptalelinnyi, ak kibendote achek kainetab Jehovah Kamuktaindennyo koigeny ak koigeny.

6Mwaei Jehovah kole, Ayumunoti eng’ betunoto inendet ne ing’wali koboto inendet ne kigeon, ak inendet ne kianyalil;

7ak ayai inendet ne ing’wali koek ne ng’etunot, ak ayai inendet ne kigetimda kolooit koek bororiet ne kim: ak koboi Jehovah ichek eng’ tulwetab Sion koboch yoto agoi koigeny.

8Nyonjinin ng’olyondonito, ee inye, teekset ne koi ne bo akwetab kechirek, tulwetab cheptab Sion; ee, nyonei bounateng’ung’ ni ki bo tai, bounatetab cheptab Jerusalem.

9Amu nee anyun si iwaach? Tos metinye laitoriat, tos kigobet ching’ung’ ne bo kapkiruok, kot konamin ng’woninwek che u che bo kwondo ne machei kosigis?

10Ingonamin ng’wanindo, ak igimu, ee cheptab Sion, ko u kwondo ne machei kosigis: amu imandoi anyun nguno eng’ nganaset, ak imeny mbar, ak iwe agoi Babulon; kisorun eng’ oloto; itiachin Jehovah eng’ oloto eng’ eutab buniguk.

11Kagoyumjingei anyun bororiosiek che chang’ che len, Ingong’wanit, ak ongetang’ang’ji Sion.

12Ago manaei kabwatutikab Jehovah, ama iguitos kiruogennyi: amu kigoyum ichek ko u ye kiyumjin ratutikab bek ruanyut ne kiborse.

13Ng’eet ak ibor, ee cheptab Sion: amu ayae kuineng’ung’ koek karnet, ak ayae sioguk koek sugunwet: ak itonaton bororiosiek che chang’: ak itabanji Jehovah kelunoikwak, ak itabanji tugukwak Kiptaiyat ne bo ng’ony komugul.

← Chapter 3 Jump to: Chapter 5 →