Numbers 29

Kalenjin Bible (BUKUIT NE TILIL)

← Chapter 28 Jump to: Chapter 30 →

1Ak onyoru kayumetab ge ne itabanat eng’ arawet ne bo tisab, eng’ betut ne bo tai eng’ arawanato; amoyai boit age tugul ne bo otwoknot: egu betut ne kiguutei igondisiek eng’ okwek.

2Ak ogochi Jehovah kagochinet ne kibeelei ne bo nyamdutiet ne anyiny; kirgit agenge ne neran, mengit agenge, ak arek tisab che mengichik che libwoben che masiirei kenyit agenge;

3koboto kagochinenywa ne bo busiek che ng’ootin che kiburuktoi mwaita, kebeberwek somok che bo taman eng’ kirgit, ak kebeberwek aeng’ che bo taman eng’ mengit,

4ak kebeberta agenge ne bo taman eng’ aruet age tugul eng’ arechato tisab:

5ak kwesta agenge kobunji kagochinetab tengekto, si keyaunenok kagaigaet:

6ne kitesyin kagochinet ne kibeelei ne bo arawet ne kaleel, ak kagochinennyi ne bo busiek, ak kagochinet ne kibeelei kotugul, ak kagochinennyi ne bo busiek, ak kagochinoikwak che kieei, ko u ng’atutienywa, koek nyamdutiet ne anyiny, kagochinet ne bunei mat kigochin Jehovah.

7Ak onyoru kayumetab ge ne itabanat eng’ betutab taman ne bo arawanito bo tisab; ak onyalili sobonwekwok; amoyai boit age tugul:

8ago ogochini Jehovah kagochinet ne kibeelei ne bo nyamdutiet ne anyiny; kirgit agenge ne neran, ak mengit agenge, ak arek tisab che mengichik che masiirei kenyit agenge; egu che libwoben eng’ okwek:

9ak kagochinenywa ne bo busiek che ng’ootin che kiburuktoi mwaita, kebeberwek somok che bo taman eng’ kirgit, kebeberwek aeng’ che bo taman eng’ mengit,

10ak kebeberta agenge ne bo taman eng’ aruet age tugul eng’ arechato tisab:

11kwesta agenge ne bo kagochinetab tengekto; kitesyin choto kagochinetab tengekto ne bo kaigaigaet, ak kagochinet ne kibeelei ne bo kotugul, ak kagochinennyi ne bo busiek, ak kagochinoikwak che kieei.

12Ak onyoru kayumetab ge ne itabanat eng’ betutab taman ak mut eng’ arawetab tisab; amoyai boit age tugul ne bo otwoknot, ak oripchi Jehovah igorta eng’ betusiek tisab:

13ak ogoite kagochinet ne kibeelei ne bunei mat, ne bo nyamdutiet ne anyiny eng’ Jehovah; kirugik taman ak somok che neran, mengichik aeng’, arek che mengichik taman ak ang’wan che masiirei kenyit agenge; egu che libwoben:

14koboto kagochinenywa ne bo busiek che ng’ootin che kiburuktoi mwaita, kebeberwek somok che bo taman eng’ kirgit age tugul eng’ kirugichoto taman ak somok, kebeberwek aeng’ che bo taman eng’ mengit age tugul eng’ mengichoto aeng’,

15ak kebebertab taman eng’ aruet age tugul eng’ arechato taman ak ang’wan:

16ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinennyi ne kieei.

17Ak ogoite eng’ betut ne bo aeng’ kirugik taman ak aeng’ che neran, mengichik aeng’, arek taman ak ang’wan che mengichik che libwoben che masiirei kenyit agenge:

18ak kagochinenywa ne bo busiek ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

19ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinoikwak che kieei.

20Ak ogoite eng’ betut ne bo somok kirugik taman ak agenge, mengichik aeng’, arek taman ak ang’wan che mengichik che libwoben che masiirei kenyit agenge;

21koboto kagochinenywa ne bo busiek ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

22ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinennyi ne kieei.

23Ak ogoite eng’ betut ne bo ang’wan kirugik taman, mengichik aeng’, arek taman ak ang’wan che mengichik che libwoben che masiirei kenyit agenge:

24ak kagochinenywa ne bo busiek, ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

25ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek ak kagochinennyi ne kieei.

26Ak ogoite eng’ betut ne bo mut kirugik sogol, mengichik aeng’, arek taman ak ang’wan che mengichik che libwoben che masiirei kenyit agenge:

27koboto kagochinenywa ne bo busiek ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

28ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinennyi ne kieei.

29Ak ogoite kirugik sisiit eng’ betut ne bo lo, mengichik aeng’, arek taman ak ang’wan che mengichik che libwoben che masiirei kenyit agenge:

30koboto kagochinenywa ne bo busiek ak kagochinoikwak che kieei che bo kirugichoto, ak che bo mengichik, ak che bo arek, ko u koitenywa, ko u ng’atutiet:

31ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek, ak kagochinoikwak che kieei.

32Ak ogoite eng’ betutab tisab kirugik tisab, ak mengichik aeng’, arek taman ak ang’wan che mengichik che libwoben che masiirei kenyit agenge:

33koboto kagochinenywa ne bo busiek ak kagochinoikwak che kieei, che bo kirugichoto, ak che bo mengichik, ak che bo arek, ko u koitenywa, ko u ng’atutiet:

34ak kwesta agenge koek kagochinetab tengekto, ne kitesyin kagochinet ne kibeelei ne bo kotugul, ak kagochinennyi ne bo busiek ak kagochinennyi ne kieei.

35Eng’ betut ne bo sisiit onyoru tuiyetab kaming’inetab ge: amoyai boit age tugul:

36ago ogoite kagochinet ne kibeelei, kagochinet ne bunei mat, ne bo nyamdutiet ne ng’uu ne anyiny eng’ Jehovah: kirgit agenge, mengit agenge, arek tisab che mengichik che libwoben che masiirei kenyit agenge:

37bendi ko u koitenywa, ko u ng’atutiet, kagochinenywa ne bo busiek, ak kagochinoikwak che kieei che bo kirgit, che bo mengit, ak che bo arek:

38ak kwesta agenge koek kagochinetab tengekto; ne kitesyin kagochinet ne kibeelei ne bo kotugul, ak kagochinennyi ne bo busiek ak kagochinennyi ne kieei.

39Ogochini Jehovah chuto eng’ igorwekwok che kiging’at, che kitesyin kaarortaosiekwok, ak kagochinoikwok che ogoitoi eng’ chamnyet, che bo kagochinoikwok che kibeelei, ak che bo kagochinoikwok che bo busiek, ak che bo kagochinoikwok che kieei, ak che bo kagochinoikwok che bo kalyet.

40Ak kimwachi Musa lagokab Israel ko u tugul che king’at Jehovah Musa.

← Chapter 28 Jump to: Chapter 30 →

Recommended Reading

Commentary Numbers Commentaries → Devotional Numbers Devotional Guide → Get This Bible Kalenjin Bible (BUKUIT NE TILIL) Study Bible →