Zechariah 10

Kalenjin Bible (BUKUIT NE TILIL)

← Chapter 9 Jump to: Chapter 11 →

1Osom Jehovah ropta eng’ betusiek che bo ropta ne bo let, Jehovah ne yaei kalyelosiek; si kogochi ichek ropta ne inesi, ak kogochi chi age tugul suswek eng’ emet.

2Amu kigomwa terapik tangoita, ak kigogeer bik che ng’orsei lembechek, ak kigomwa ichek karuotitaosiek che bo lembech, igoigoisiei buch; bendoti ko u kechirek, kinyalili amu matinyei mestowot.

3Anerekyini mestowek, ak abire kwesik: amu karutochi Jehovah ne bo lugosiek akwennyi ne bo kechirek, gotab Juda, ak koyai ichek koigei mbartanyinnyi ne mie eng’ boriet.

4Mong’une inendet koita ne bo luita, mong’une inendet kipchumariat, mong’une inendet kwangetab boriet, mong’une inendet age tugul ne usisiei kibagenge.

5Ak koigei bik che nyigonen, che tiechei bunikwak eng’ ng’atatekab ortinwek eng’ boriet; ak kobargei, amu mi Jehovah koboto ichek: ak kotoptobenso bik che lanyei mbartanyisiek.

6Ak agimit gotab Juda, ak asoru gotab Josep, ak amutu ichek kogeny, amu arire ichek; ak koigei ye kima amete ichek: amu a Jehovah Kamuktaindenywa, ak agas ichek.

7Ak koigei ichek che bo Epraim chito ne nyigan, ak koboiboitu mugulelwekwak ko u che kaeei divaik: ee, keerei lagokwok noto, ak koboiboitu; igasegei mugulelwekwak eng’ Jehovah.

8Aititenjini ichek, ak ayum, amu kiatiach ichek: ak kotesogis ko u ye kiga kotesogis.

9Ak agol ichek eng’ kwenutab bororiosiek; ak kobwata komi emotinwek che looen: ak komeng’is koboto lagokwak, ak koweeigei.

10Amutu ichek kogeny komong’une emetab Misri, ak ayum ichek komong’ eng’ Asuria; ak amutu ichek kobwa emetab Gilead ak Lebanon; ama biitu ole yamei ichek.

11Ak beek che mildogei eng’ nyanjet, ak kotenyo rirosiek tugul che bo Nael: ak kiming’in menotetab Asuria, ak koistogei siaritab Misri.

12Ak agimit ichek eng’ Jehovah; ak kobendate kainennyi, mwaei Jehovah.

← Chapter 9 Jump to: Chapter 11 →