Zechariah 2

Kalenjin Bible (BUKUIT NE TILIL)

← Chapter 1 Jump to: Chapter 3 →

1Ak kiayot met ak ageer, ogeero, chito ne tinyei eng’ eunnyi borowet ne kikwaise.

2Yeityo ateebe alenji, Iwendi ano? Ak kilenja, Awendi akwai Jerusalem, si kobiit anai ole te tebeesindanyi ak koindanyi.

3Ak ogeero, kiwa malaikaiyandanato king’alalwa, ak kiwa malaikaiyat age kotuiyo ak inendet,

4ak kolenji inendet, Labat, ng’alalji murenoni, ilenji, Kimenyei Jerusalem ko u ye kimenyei nganasok che mengechen che matinyei irimoik, amu chang’indab bik ak tuga che mi.

5Amu mwaei Jehovah kole, Aegu irimet ne bo mat eng’ komoswek tugul, ak aegu torornatet eng’ kwenunnyi.

6Eiye, eiye, omwei eng’ emetab murot ne bo katam, mwaei Jehovah: amu kiaseerak ko u usonaik ang’wan che bo kipsengwet, mwaei Jehovah.

7Ee Sion, soruge inye, ne omeng’isiei ak cheptab Babulon.

8Amu mwaei Jehovah ne bo lugosiek kole, Kagoyokta inendet agobo torornatennyi, awa oldab bororiosiek che kiluulok, amu inendet ne twaok, ko katwa laptetab kondanyi.

9Ogeero, ang’werei ichek, ak koek luulenik eng’ ichek che kiotei ichek: ak onai ole kiiyokwa Jehovah ne bo lugosiek.

10Tien ak ibaibaitu, ee cheptab Sion: amu, keero, anyone amenye kwenung’ung’, mwaei Jehovah.

11Ak konamgei bororiosiek che chang’ ak Jehovah eng’ betunoto ak koek bikyuk: ak ameny kwenung’ung’, ak inai ile kiiyokwa Jehovah ne bo lugosiek anyo ole imi.

12Ak konam Jehovah Juda koek kebebertanyi eng’ emet ne tilil, ak kolewen kogeny Jerusalem.

13Osisye, okwek bik tugul eng’ taitab Jehovah: amu kagong’eet eng’ meng’otennyi ne tilil.

← Chapter 1 Jump to: Chapter 3 →