Zechariah 5

Kalenjin Bible (BUKUIT NE TILIL)

← Chapter 4 Jump to: Chapter 6 →

1Kiayot met anyun kogeny, ak ageer, ak ogeero, bukuit ne mamanat ne tirireni.

2Ak kilenja, Igeere nee? Ak kiawolji alenji, Ageere bukuit ne mamanat ne tirireni; koindanyi ko kakwautik tiptem che bo eut, ak tebeesindanyi ko kakwautik taman che bo eut.

3Kimwawa anyun kolenja, Nito ko chubisiet ne wendi koyomu emet komugul: amu age tugul ne chorsei keistoi eng’ komosi ko u ye mwaei; ak age tugul ne iyostos keistoi eng’ komosin ko u ye mwaei bukuinoto.

4Ayoktoi bukuinoto, mwaei Jehovah ne bo lugosiek, ak kochut gotab chorindet, ak kochut gotab chito ne iyostos lembechek eng’ kainennyu: ak kotebe kwenutab gonnyi, ak koges goyoto koboto ketikyik ak koikyik.

5Kiwa anyun malaikaiyat ne king’alalwa, ak kolenja, Yot met anyun ak igeer kioto wendi.

6Ak kiale, Nee noto? Ak kilenja, Nito ko epah ne wendi. Kile kogeny, Ni ko kergeindanywa eng’ emet tugul:

7(ak ogeero, kiginamji barak talentait ne bo ngosielait:) ak nito ko kwondo ne tebyei ng’ony eng’ epah orit.

8Ak kile, Nito ko Yaitiet; ak kiwirji inendet epah orit: yeityo konde ngosielait ne nyigis kutitab kioto.

9Kiayot met anyun, ak ageer, oreero, kibwa kwonyik aeng’u ak kimi usonet kebebaikwak; kitinyei kebebaik che u kebebaikab chebokibabaa: ak kinamji barak epahinoto eng’ kwenutab ng’ony ak kipsengwet.

10Kialenji anyun malaikaiyat ne king’alalwa, Ibei chu epah kwo ano?

11Ak kilenja, Kwo koteekyine got eng’ emetab Sinar: ak ye kagochobok, kinde yoto si kotebe oldanyi.

← Chapter 4 Jump to: Chapter 6 →