Zechariah 12

Kalenjin Bible (BUKUIT NE TILIL)

← Chapter 11 Jump to: Chapter 13 →

1Lautietab ng’olyotab Jehovah agobo Israel.

2Mwaei Jehovah, ne iitoi kipsengwetisiek, ak kolumei lumeiywotab ng’ony, ak koyaei tamirmirietab chi eng’ oritab chichoto, ko u ni kole: Ogeero, ayae Jerusalem koek kikombet ne bo terteriotet eng’ bik tugul che mi komoswekyik tugul, egu ko u noto eng’ Juda agine eng’ betusiek che kiyiemei Jerusalem.

3Ak ayae Jerusalem eng’ betunoto koek koita ne nyigis ne iimi bik tugul; nyoru berutik che chang’ ichek che kanabi koyato: ak koyumjigei inendet bororiosiek tugul che bo ng’ony.

4Mwaei Jehovah eng’ betunoto kole, Agochini mbartanyit age tugul kokwong’, ak abire iywek chinnyi ne lanyei: ak ayat konyekyuk ageer gotab Juda, ak abire koratet mbartanyit age tugul ne bo bororiosiek.

5Ak komwa bounikab Juda eng’ mugulelwekwak kole, Bik che menyei Jerusalem ko kimnatennyu eng’ Jehovah ne bo lugosiek, Kamuktaindenywa.

6Ayae eng’ betunoto bounikab Juda koigei rokyietab mat ne mi kwenik, ak koigei kegenget ne mi kwenutab ratutikab bek; ak koges bik tugul che mi komoswek tugul che mi eutab tai ak che mi eutab katam: ak komeny Jerusalem kogeny komostanyi, noto ko Jerusalem.

7Sib kosoru Jehovah emaisiekab Juda, si maeet torornatetab gotab Daudi ak torornatetab bik che menyei Jerusalem, kosiir Juda.

8Ribei Jehovah eng’ betunoto bik che menyei Jerusalem; ak koigei ne nyalulat eng’ ichek Daudi eng’ betunoto; ak koigei gotab Daudi Kamuktaindet, ko u malaikaiyatab Jehovah ne mi tainywa.

9Ak acheng’ abar eng’ betunoto bororiosiek tugul che ibokyin Jerusalem.

10Ak arong’ji tamirmirietab mieindo ak ne bo somet gotab Daudi, ak bik che menyei Jerusalem, ak konyala ichek che kitoora: ak kotee agobo inendet ko u ye iteei chi agobo werinnyi ne kigii inegeik ak konyo ng’wanindo agobo inendet, ko u inendet ne mi eng’ ng’wanindo agobo taitanyi.

11Biitu eng’ betunoto kateeiyet ne o eng’ Jerusalem, ne u kateeiyetab Hadadrimon eng’ atebwetab Megidon.

12Ak kote emet, iteei oret age tugul inegei; iteeitos che bo gotab Daudi ichegei, ak koteeiyo osotikwak ichegei; iteeitos che bo gotab Natan ichegei, ak koteeiyo osotikwak ichegei;

13iteeitos che bo gotab Lawi ichegei, ak koteeiyo osotikwak ichegei; iteeitos che bo gotab Simei ichegei, ak koteeiyo osotikwak ichegei;

14iteeitos ortinwek tugul che kang’et, iteei oret age tugul inegei, ak koteeiyo osotikwak ichegei.

← Chapter 11 Jump to: Chapter 13 →