Zechariah 4

Kalenjin Bible (BUKUIT NE TILIL)

← Chapter 3 Jump to: Chapter 5 →

1Ak kinyo kogeny malaikaiyat ne king’alalwa, ak kong’eeta ko u chito ne king’eeti eng’ ruondanyi.

2Ak kilenja, Igeere nee? Ak kiale, Kaageer, ak keero, keldab tait ne bo tahabu tugul, kotinyei tabennyi eng’ baragunnyi, koboto taisiek tisab che bo keloto bo tait; kitinyei tait age tugul kirondoik tisab che mi baragunnyi:

3ak kimi emitik aeng’u ye negite tainato, kimi age komostab tai ne bo tabet, komi age komostanyi ne bo katam.

4Ak kiawolji malaikaiyat ne king’alalwa, alenji, Nee chu-o, kiptaiyandennyu?

5Kowol anyun malaikaiyat ne king’alalwa, kolenja, Tos mengen kit ne bo tuguchu? Ak kiale, Achicha, kiptaiyandennyu, mangen.

6Yeityo kowol kolenja, Ni ko ng’olyotab Jehovah ne mwachin Serubabel, kolenjin, Ma eng’ kamuktaet, ama eng’ kimnatet, ago eng’ Tamirmiriennyu, mwaei Jehovah ne bo lugosiek.

7I ng’o, ee tulwoni o? Iegu warenget eng’ taitab Serubabel: ak konem koita ne bo barak kowaaktos kolen, Mieindo, mieindo, ingotebe baragunnyi.

8Kinyonja kogeny ng’olyotab Jehovah kole,

9Kilumei Serubabel lumeiywotab goi; ak ko eunekyik che igesu kogeny; ak inai ile Jehovah ne bo lugosiek ne kiiyokwa anyo ole omi.

10Amu ng’o ne kigosas betutab tuguk che mengechen? Amu tun boiboitu ichek, ak kogeer kit ne kilititisie eng’ eutab Serubabel, tuguchu tisab, che konyekab Jehovah; bendoti choto eng’ ng’ony komugul.

11Kiawolu anyun alenji inendet, Nee emitichu aeng’u mi komostab tai ne bo keldab tait ak komi komostanyi ne bo katam?

12Ak kiawolu ne bo aeng’, alenji inendet, Bo nee temenichu aeng’u che bo emitik, che mi ole negite kirondoik aeng’ che bo tahabu, che rong’u mwanik?

13Ak kiwolwa kolenja, Mengen kit ne bo chuto? Ak kiale, Achicha, kiptaiyandennyu, mangen.

14Kolenja anyun, Chuto ko werik aeng’ che bo mwanik, che tonone ole negite Kiptaiyat ne bo ng’ony komugul.

← Chapter 3 Jump to: Chapter 5 →