Exodus 29

Khmer (ព្រះគម្ពីរបរិសុទ្ធកែសម្រួល ២០១៦)

← Chapter 28 Jump to: Chapter 30 →

1នេះជាការដែលអ្នកត្រូវធ្វើ ដើម្បីញែកអ្នកទាំងនោះជាបរិសុទ្ធ ឲ្យបានបំពេញមុខ‌ងារជាសង្ឃបម្រើយើង គឺត្រូវយកគោឈ្មោលស្ទាវមួយ និងចៀមឈ្មោលពីរល្អឥតខ្ចោះ

2នំបុ័ងឥតដំបែ នំឥតដំបែលាយដោយប្រេង និងនំក្រៀបឥតដំបែប្រោះដោយប្រេង ហើយត្រូវធ្វើពីម្សៅភោជ្ជ‌សាលីយ៉ាងម៉ដ្ត។

3ត្រូវដាក់នំទាំងនោះនៅក្នុងកញ្ច្រែង រួចនាំយកមកជា‌មួយនឹងគោឈ្មោល ព្រមទាំងចៀមឈ្មោលទាំងពីរ។

4ត្រូវនាំអើរ៉ុន និងកូនប្រុសៗរបស់គាត់ចូលមកឯទ្វារត្រសាលជំនុំ រួចយកទឹកមកលាងសម្អាតពួក‌គេ។

5ត្រូវយកសម្លៀក‌បំពាក់ទាំងប៉ុន្មានមកបំពាក់ឲ្យ គឺអាវខ្លី អាវវែងនៃអេផូឌ ហើយអេផូឌ និងប្រដាប់បាំងទ្រូងឲ្យអើរ៉ុន ហើយយកខ្សែក្រវាត់របស់អេផូឌមកក្រវាត់ឲ្យដែរ

6ព្រមទាំងបំពាក់មួកលើក្បាល ហើយដាក់ស្លាកនៃសេចក្ដីបរិសុទ្ធនៅភ្ជាប់នឹងមួកនោះ។

7ត្រូវយកប្រេងសម្រាប់ចាក់លាប មកចាក់លើក្បាល ហើយតែងតាំងគាត់ឡើង។

8បន្ទាប់មក ត្រូវនាំកូនរបស់គាត់ចូលមកបំពាក់អាវខ្លីឲ្យ

9ត្រូវយកខ្សែក្រវាត់មកក្រវាត់ឲ្យពួក‌គេ រួចពាក់ឈ្នួតឲ្យពួក‌គេផង នោះការ‌ងារជាសង្ឃនឹងបានជារបស់ពួកគេ ជាច្បាប់នៅអស់កល្បជា‌និច្ច។ គឺយ៉ាងនោះឯងអ្នកត្រូវតែងតាំងអើរ៉ុន និងពួកកូនរបស់គាត់ឡើង។

10ត្រូវនាំគោឈ្មោលមកខាងមុខត្រសាលជំនុំ ហើយអើរ៉ុន និងកូនប្រុសរបស់គាត់ត្រូវដាក់ដៃលើក្បាលគោនោះ

11ត្រូវសម្លាប់គោនោះនៅត្រង់មាត់ទ្វារត្រសាលជំនុំ នៅចំពោះព្រះ‌យេហូវ៉ា

12ត្រូវយកម្រាមដៃជ្រលក់ក្នុងឈាមនោះ ហើយយកខ្លះប្រឡាក់នៅស្នែងអាស‌នា រួចឈាមដែលនៅសល់ទាំងប៉ុន្មានត្រូវចាក់នៅជើងអាស‌នា។

13ត្រូវយកខ្លាញ់ទាំងអស់ដែលនៅជាប់នឹងអាការៈខាងក្នុង ដុំថ្លើម អង្គញ់ទាំងពីរ និងខ្លាញ់ដែលរុំអង្គញ់នោះ ទៅដុតទាំងអស់នៅលើអាស‌នា។

14រីឯសាច់ ស្បែក និងលាមករបស់វា ត្រូវយកទៅដុតខាងក្រៅជំរំ ព្រោះជាតង្វាយលោះបាប។

15ត្រូវយកចៀមឈ្មោលមួយមក ហើយអើរ៉ុន និងកូនរបស់គាត់ត្រូវដាក់ដៃលើក្បាលចៀមនោះ

16ត្រូវសម្លាប់ចៀមនោះ យកឈាមទៅប្រោះនៅគ្រប់ជុំ‌វិញលើអាស‌នា។

17បន្ទាប់មក ត្រូវកាប់ជាដុំៗ ហើយលាងអាការៈខាងក្នុង និងជើងរបស់វា រួចយកទៅដាក់លើដុំសាច់ និងក្បាល

18ហើយដុតទាំងអស់នៅលើអាស‌នា។ នេះជាតង្វាយដុតថ្វាយព្រះ‌យេហូវ៉ា ជាតង្វាយដុតនឹងភ្លើង សម្រាប់ជាក្លិនឈ្ងុយដល់ព្រះ‌យេហូវ៉ា។

19ត្រូវយកចៀមឈ្មោលមួយទៀតមក ហើយត្រូវឲ្យអើរ៉ុន និងកូនរបស់គាត់ដាក់ដៃលើក្បាលចៀម

20រួចសម្លាប់វា ហើយយកឈាមខ្លះទៅលាបនៅលើទងត្រចៀកស្តាំរបស់អើរ៉ុន និងលើទងត្រចៀកស្តាំកូនៗរបស់គាត់ លើមេដៃស្តាំ និងលើមេជើងស្តាំទាំងអស់គ្នា រួចប្រោះឈាមដែលនៅសល់ទៅគ្រប់លើអាស‌នាជុំ‌វិញ។

21ត្រូវយកឈាមខ្លះដែលនៅលើអាស‌នា និងប្រេងសម្រាប់លាបតាំង ទៅប្រោះលើអើរ៉ុន លើសម្លៀក‌បំពាក់ លើកូនរបស់គាត់ និងសម្លៀក‌បំពាក់របស់ពួក‌គេ នោះគាត់នឹងបានបរិសុទ្ធ ព្រមទាំងសម្លៀក‌បំពាក់ ហើយកូនរបស់គាត់ និងសម្លៀក‌បំពាក់របស់ពួក‌គេក៏នឹងបានបរិសុទ្ធដែរ។

22ត្រូវយកខ្លាញ់ចៀមឈ្មោលនោះ ទាំងកន្ទុយ និងខ្លាញ់ដែលនៅជាប់នឹងអាការៈខាងក្នុង ហើយដុំថ្លើម អង្គញ់ទាំងពីរ ខ្លាញ់ដែលរុំនៅអង្គញ់នោះ និងស្មាស្តាំផង (ដ្បិតនេះជាចៀមសម្រាប់ពិធីតែងតាំងជាសង្ឃ)

23ហើយត្រូវយកនំបុ័ងមួយដុំ នំលាយប្រេងមួយ និងនំក្រៀបមួយពីកញ្ច្រែងដាក់នំឥតដំបែ ដែលនៅចំពោះព្រះ‌យេហូវ៉ា

24រួចដាក់ទាំងអស់លើបាតដៃរបស់អើរ៉ុន និងលើបាតដៃកូនរបស់គាត់ ហើយគ្រវីនំទាំងនោះ ទុកជាតង្វាយគ្រវីនៅចំពោះព្រះ‌យេហូវ៉ា។

25បន្ទាប់មក ត្រូវយកទាំងអស់ចេញពីដៃពួក‌គេ ទៅដុតនៅលើតង្វាយដែលកំពុងតែថ្វាយនៅលើអាស‌នា សម្រាប់ជាក្លិនឈ្ងុយថ្វាយព្រះ‌យេហូវ៉ា។ នេះហើយជាតង្វាយដុតថ្វាយព្រះ‌យេហូវ៉ា។

26ត្រូវយកសាច់ទ្រូងរបស់ចៀម ដែលសម្រាប់ធ្វើពិធីតែងតាំងអើរ៉ុនជាសង្ឃ ទៅគ្រវីទុកជាតង្វាយគ្រវីនៅចំពោះព្រះ‌យេហូវ៉ា ហើយសាច់នោះនឹងបានជាចំណែករបស់អ្នក។

27ឯសាច់ទ្រូង និងស្មារបស់ចៀមដែលសម្រាប់ធ្វើពិធីតែងតាំងអើរ៉ុន និងកូនរបស់គាត់ឡើងជាសង្ឃ នោះត្រូវញែកជាបរិសុទ្ធ ដោយយកសាច់ទ្រូងគ្រវីពីម្ខាងទៅម្ខាង ហើយដោយយកស្មាលើកថ្វាយចុះឡើង។

28នោះជារបស់អើរ៉ុន និងកូនរបស់គាត់ ជាច្បាប់នៅអស់កល្បជា‌និច្ច ដែលកូនចៅអ៊ីស្រា‌អែលត្រូវកាន់តាម ដ្បិតនេះជាតង្វាយលើកចុះឡើង ហើយក្នុងតង្វាយមេត្រីទាំងប៉ុន្មាន ដែលកូនចៅអ៊ីស្រា‌អែលថ្វាយ នោះតង្វាយលើកចុះឡើង ជាតង្វាយសម្រាប់ព្រះ‌យេហូវ៉ា។

29សម្លៀក‌បំពាក់បរិសុទ្ធរបស់អើរ៉ុន ត្រូវទុកឲ្យកូនៗរបស់គាត់រហូតតទៅ ដើម្បីឲ្យគេបានស្លៀក‌ពាក់ នៅពេលទទួលពិធីចាក់ប្រេងតែងតាំងពួក‌គេឡើងជាសង្ឃ។

30កូនដែលត្រូវទទួលតំណែងជាសង្ឃជំនួសគាត់ ត្រូវស្លៀកសម្លៀក‌បំពាក់ទាំងនេះរយៈពេលប្រាំពីរថ្ងៃ នៅពេលដែលគេចូលទៅក្នុងត្រសាលជំនុំ ដើម្បីបំពេញមុខងារនៅក្នុងទីបរិសុទ្ធ។

31ត្រូវយកសាច់ចៀមឈ្មោលសម្រាប់ពិធីតែងតាំងជាសង្ឃ មកស្ងោរនៅកន្លែងបរិសុទ្ធ

32អើរ៉ុន ព្រមទាំងកូនប្រុសរបស់គាត់ត្រូវបរិ‌ភោគសាច់ចៀម និងនំបុ័ងដែលនៅក្នុងកញ្ច្រែងត្រង់មាត់ទ្វារត្រសាលជំនុំ។

33គេត្រូវបរិ‌ភោគតង្វាយទាំងនោះ ដែលបានថ្វាយជាតង្វាយរំដោះបាប ដើម្បីតែងតាំងគេជាសង្ឃ ហើយញែកជាបរិសុទ្ធ រីឯអ្នកប្រទេសក្រៅ មិនត្រូវបរិ‌ភោគឡើយ ដ្បិតអាហារទាំងនោះជាអាហារបរិសុទ្ធ។

34ប្រសិន‌បើមានសាច់សល់ពីពិធីនោះ ឬនំបុ័ងបាននៅសល់រហូតដល់ព្រឹក នោះត្រូវយកសំណល់នោះទៅដុតក្នុងភ្លើង មិនត្រូវបរិ‌ភោគឡើយ ដ្បិតជាអាហារបរិសុទ្ធ។

35ត្រូវប្រព្រឹត្តយ៉ាងនេះចំពោះអើរ៉ុន និងកូនរបស់គាត់ តាមអស់ទាំងសេចក្ដីដែលយើងបានបង្គាប់អ្នក។ ត្រូវធ្វើពិធីតែងតាំងពួក‌គេឡើងជាសង្ឃឲ្យគ្រប់ប្រាំពីរថ្ងៃ។

36រាល់ថ្ងៃ ត្រូវថ្វាយគោឈ្មោលមួយជាតង្វាយលោះបាប ដើម្បីរំដោះបាប។ ត្រូវសម្អាតអាស‌នាឲ្យបានបរិសុទ្ធ នៅពេលអ្នកធ្វើពិធីរំដោះបាប រួចត្រូវចាក់ប្រេងពីលើ ដើម្បីញែកអាស‌នាចេញជាបរិសុទ្ធ។

37ក្នុងរយៈពេលប្រាំពីរថ្ងៃ ត្រូវថ្វាយតង្វាយជម្រះអាស‌នា ព្រមទាំងញែកជាបរិសុទ្ធ នោះអាស‌នានឹងបានបរិសុទ្ធបំផុត ហើយអ្វីៗដែលប៉ះនឹងអាស‌នាក៏នឹងបានបរិសុទ្ធដែរ។

38រីឯតង្វាយដែលត្រូវថ្វាយនៅលើអាស‌នារាល់ថ្ងៃ នោះគឺកូនចៀមពីរ អាយុមួយខួប។

39កូនចៀមមួយត្រូវថ្វាយនៅពេលព្រឹក ហើយមួយទៀតនៅពេលល្ងាច

40ហើយដែលថ្វាយកូនចៀមមុនដំបូង នោះត្រូវថ្វាយទាំងម្សៅយ៉ាងម៉ដ្តមួយភាគក្នុងដប់ក្នុងមួយថាំង លាយនឹងប្រេងសម្រាំងមួយកំប៉ុង និងតង្វាយច្រូចជាស្រាទំពាំង‌បាយ‌ជូរមួយកំប៉ុងផង។

41លុះដល់ល្ងាច ត្រូវថ្វាយកូនចៀមមួយទៀត ព្រមទាំងតង្វាយម្សៅ និងតង្វាយច្រួច ដូចនៅពេលព្រឹកដែរ នេះជាតង្វាយដុតសម្រាប់ជាក្លិនឈ្ងុយដល់ព្រះ‌យេហូវ៉ា។

42នេះជាតង្វាយដុតជា‌ប្រចាំ ដែលកូនចៅរបស់អ្នកគ្រប់ជំនាន់ត្រូវថ្វាយនៅមាត់ទ្វារត្រសាលជំនុំ នៅចំពោះព្រះ‌យេហូវ៉ា ជាកន្លែងដែលយើងនឹងមកជួបអ្នករាល់គ្នា ដើម្បីនិយាយជា‌មួយអ្នក។

43យើងនឹងមកជួបជា‌មួយកូនចៅអ៊ី‌ស្រា‌អែលនៅទីនោះ ហើយកន្លែងនោះនឹងបានបរិសុទ្ធ ដោយ‌សារសិរី‌ល្អរបស់យើង។

44យើងនឹងញែកត្រសាលជំនុំ និងអាស‌នាចេញជាបរិសុទ្ធ ព្រមទាំងញែកអើរ៉ុន និងកូនៗរបស់គាត់ចេញជាបរិសុទ្ធដែរ ដើម្បីឲ្យពួក‌គេបំពេញមុខ‌ងារជាសង្ឃបម្រើយើង។

45យើងនឹងស្ថិតនៅកណ្ដាលកូនចៅអ៊ីស្រា‌អែល ហើយយើងនឹងធ្វើជាព្រះរបស់ពួក‌គេ។

46ពួក‌គេនឹងដឹងថា យើងជាព្រះ‌យេហូវ៉ា ជាព្រះដែលបាននាំពួក‌គេចេញពីស្រុកអេស៊ីព្ទ ដើម្បីឲ្យយើងបាននៅកណ្ដាលគេ យើងជាយេហូវ៉ា ជាព្រះរបស់គេ។

← Chapter 28 Jump to: Chapter 30 →