2 Corinthians 12

Kurukh (पुना गच्छरना NT (BSI))

← Chapter 11 Jump to: Chapter 13 →

1एंगा अउर हूँ फुलई मना गे चाड़ र'ई होले, ऎन फुलई मनोन, लिकिन अत्रु ती एन्द्रा हूँ दौ मल्‍ली। अन्नु हूँ उर्बस ती एंगा ख़क्ख्रका देखार अरा दहदर गुट्ठिन ऎन तेंगोन।

2मसी नू ऎन ओर्त आलासिन अख़दन, चौदा चान ही मुन्द आस तिसर मेर्ख़ा गूटी चॊदतारस। आस मॆद नू रहचस मलता मॆद ही बहरी रहचस ऎन बलदन। अदिन धर्मेस दिम अख़दस।

3ऎन आ आलासिन अख़दन, आस परदे‍सोस गूटी चॊदतारस। आस असन एन्ने कत्‍था गुट्ठिन मेंजस, एकदा तेंगर'आ पुल्‍ली अरा अबड़न तेंगा गे एकअम आलस गे मल्‍ला चीरका। आस मॆद नू रहचस मलता मॆद ही बहरी रहचस ऎन बलदन। अदिन धर्मेस दिम अख़दस।

5एन्ने आलासी पत्त तिम ऎन फुलई ननोन। लिकिन एंग्‍है पत्त नू एंग्‍है पयहा आबोन ईद'ऊ आलॊन अम्बरकी अउर नन्ना इन्द्रिइम नू हूँ फुलई मल मनोन।

6एन्ने ऎन फुलई मना बेद्ददन होले हूँ, ऎन बोया मल मनोन, एन्देरगेका ऎन मानिमन दिम तेंगदन। अन्नु हूँ ऎन एन्ने मल ननोन, एन्देरगेका नॆ हूँ एंग्है नू एन्द्रन ऎरदस अरा एंग्है ती एन्द्रन मेन्दस, अदिन ती कोड़हे एंग्है पत्त नू अम्‍बोर सोच'आ।

7अन्नु हूँ एंगा नू धर्मेसी कोड़हे देखार दहदर नन्तारकी र'ई। ऎन इबड़ा नू फुलई अम्‍बोन मना। औंगे एंग्‍है कया नू ओन्टा अच्‍च कुड़चका र'ई। ईद एंगा गे सस्ती चि'ऊ सैतान ही ओन्टा पैकस हवे, औंगे ऎन फुलई मल मनोन दने।

8इदन एंग्‍है ती तरकूटी मना गे ऎन उर्बस ती तीन खेप नॆचकन।

9लिकिन उर्बस बाचस, “एंग्‍है मया निंगा गे नीन्द्रकी र'ई, ईगेका निंग्है पयहा नू एंग्‍है सवंग दौलेम नलख ननी।” औंगे अक्कु ऎन एंग्है पयहा गुट्ठी ही पत्त नू कोड़हे रिझ ती फुलई मनोन। ख़ने मसीसी सवंग एंग्हा नू नलख नना ऊंगी।

10औंगेम ऎन मसीसी चड्डे एंगा मंजका पयहा ही पत्त नू, अरा लज्जे ही पत्त नू, अरा खिलपत ही पत्त नू, अरा खैतारना ही पत्त नू, सस्ती ही पत्त नू ऎन रिझ गने र'अदन। एन्देरगेका ऎन एकाबारी पयहा र'अदन, आ बारी ऎन सवंगिय र'अदन।

11ऎन गा बैहा आलर लेक्‍खा कछनख्रदन, लिकिन नीमिम एंगन एन्ने मना गे मंजकादर। नीम एंगन सुमर'अना र'ई। ऎन एन्‍द्रा हूँ मलदन, अन्नु हूँ निम्है ई “कोहाँ तइरकर” ती ऎन एन्‍देर कत्‍था नू हूँ ती सन्नी मलदन।

12ऎन निम्‍है गने रहचकन ख़ने, ऎन मानिम नू एंगन पुरुब नंजकन का ऎन ओन्टा तइरकन। एकासे का ऎन कोड़हे कयास गने दुक्खे सारना ती निम्है मझी नू बग्गे चिन्‍हा अरा अजगुत नलख अरा हैकट नलख गुट्ठी ऎदकन।

13नीम नन्ना कलीसियन जोक्‍खना ती नीम एका रकम नू किय्या मंजकानर? हाँ, ऎन निमा गे बॊझा मल मंजकन, ई कत्‍था गे एंगन छमा नना।

14अक्‍कु ऎन तिसर खेप निम्‍हा गुसन बर'आ गे सपड़ारकादन, अरा निमा गे ऎन बॊझा मल मनोन, एन्‍देरगेका ऎन निम्‍है खुर्जिन मला निमन बेद्ददन। ख़द्द-ख़र्रर तम्है अयंग-बंगर गे खुर्जी ख़ॊंड़ना ही चाड़ मलकी, लिकिन अयंग-बंगर दिम तम्‍है ख़द्द-ख़र्रर गे बेंदना र'ई।

15औंगे ऎन निमा गे कोड़हे रिझ ती एंग्हा उर्मिनिम खेजाब'ओन, अरा एंगन हूँ खेजार'आ गे सपड़ारकादन। ऎन एवंदा कोड़हे निम्‍है ती चोन्‍हा नन्दन होले, नीम एंग्‍है ती जुक्‍की चोन्‍हा ननोर का?

16निम्है ती जोक्कोर मन्नर का ऎन निमा गे बॊझा मल मंजकन, लिकिन नन्नर सोचनर का ऎन चतरा आलन अरा ठगचका ती निमन बझाबाचकन।

17एका एका ओर्तारिन ऎन निम्‍है गुसन तइय्कन, एन्‍देर ऎन आर ही नॆखअय तिम इन्द्रिइम निम्है ती होच्‍चकन का? मानिम नू मल होच्चकन।

18ऎन तीतुसिन निम्है गुसन बर'आ गे आनकन अरा आस गने एम्है नन्ना ओर्त भईसिन हूँ तइय्कन। एन्देर नीम ब'आ ओंग्दर का तीतुस निम्है ती इन्द्रिइम नफा होच्चस? ऎम इरबारिम ओन्टेम बॊलता नू मल उज्जकम उक्कम का? अरा ओन्टे डहरे नू मल ईक्‍कम का?

19ऎम निम्है मुन्दहारे एमन बिगर बदी ही बॆस आलम ऎद'आ गे अक्कु गूटी चिहुट नन्दम एन्ने नीम सोचदर का? मला, ऎम धर्मेसी मुन्दहारे मसीस नू ब'आलदम। अना चोन्हा आलारो! नीम बॊलता नू परदा गेम ऎम उर्मिन नन्दम।

20एन्‍देरगेका एन्ने अम्बो मना गे ऎन एल्‍चदन का ऎन निम्है गुसन बरना बारी, एकासे ऎन बेद्ददन अन्ने निमन मल ख़क्‍खोन, अरा नीम एंगन एकासे मल बेद्ददर अन्नेम ख़क्‍खोर। अरा एन्ने अम्‍बो मना का ऎन निम्‍है नू नग्‍गानख्रना, इस्‍गहा, कदरारना, लोभिया, नीन्दा, जलिय'अना, मोठ'ई, अरा बिगर दाब ख़क्‍खोन।

21अरा एन्ने अम्बो मना का ऎन निम्है गुसन अउर बरना बारी, एंग्‍है धर्मेस निम्‍है मुन्दहारे एंगन किय्या नन्त'ओस, अरा एंगा अबड़ा बग्‍गे आलर गे कलपारना मनो का नॆ मुन्द नंजका पाप ती सोतरा मन्ना, पेहरन ही सोतरा नलख, पसड़ा गुट्ठी ती जिया मल किरताचर।

← Chapter 11 Jump to: Chapter 13 →