2 Corinthians 6

Kurukh (पुना गच्छरना NT (BSI))

← Chapter 5 Jump to: Chapter 7 →

1धर्मेस गने नलख ननू आलम ऎम निमन ने'अदम का धर्मेस ती नीम ख़क्ख्रका मया आबोन अनभनियाँ मना अमा चि'आ।

2एन्‍देरगेका धर्मेस बाचकादस का, “एंग्है सोग्गे ऎरना ही बेड़ा नू ऎन निमन मेंजकन, नाड़रना ही उल्ला नू ऎन निमन सहाड़ा नंजकन।” ऎन निमन ब'अदन का, “ऎरा, अक्‍कुन दिम धर्मेसी सोग्गे ऎरना ही बेड़ा, अरा अक्‍कुन दिम नाड़रना ही उल्‍ला र'ई।”

3ऎम नॆख'आ डहरे नू हूँ छेंका मना मल बेद्ददम का, एम्‍हा सुसर'अना नलख नू बदी अम्बो मना।

4लिकिन ऎम धर्मेसी मानिम जॊंख़म एन्ने उर्मी मदहे नू एम्है उज्‍जना ओक्‍कना ती ऎद्ददम। कोड़हे खतीर नन्ना नू, कलपारना नू, कीड़ा नू, सस्ती नू,

5कोर्रा लौरना नू, जेहेल काना नू, हुलहुली गुट्ठी नू बझ्रना नू, कोड़हे अर्जाना नू, बिगर ख़न्द्रका नू, उबसना नू,

6नेम्हा र'अना नू, लूर नू, सहना नू, सोग्गे ऎरना नू, नेम्‍हा बॊलतस एम्है नू र'अना नू, मानी चोन्‍हा नू,

7मानी कत्थन तेंगा कुद्दना नू, धर्मेसी सवंग नू, अरा उजगो ही कमहड़न तीना अरा डेब्‍बा ख़ेक्खा नू धरना नू ऎम एम्है गोवाह आबोन ऎद्ददम।

8मईन ख़क्‍ख्रकी अरा लज्‍जे मॊख़रकी, ओहमा ख़क्‍ख्रकी अरा हींड़रकी, बहक'ऊ एन्ने सोचना ती हूँ ऎम मानिम जॊगे जॊंख़म र'अदम।

9ऎम चिन्‍हार मल्‍कम एन्ने सोचना ती हूँ बॆस चिन्हार आलम र'अदम। ऎम खे'आ बेद्दालदम एन्ने सोचना ती हूँ उज्‍जू आलम र'अदम। ऎम पस्‍का कोड़रका र'अदम, लिकिन मल पिटरदम।

10ऎम दुक्खे सार'ऊ एन्ने सोचना ती हूँ उर्मी बेड़ा रिझ्र'ऊ आलम हिकदम। ऎम कीड़र लेख्रदम अन्नु हूँ बग्‍गेरिन उर्ब कमदम। एम्‍है गुसन एन्दरा हूँ मलकी अन्नु हूँ उर्मी जिनिसन अर्ज'अदम।

11कोरिन्‍थ नगरे ता आलारो! निम्‍है गुसन ऎम फरीफरी कछनख्रकम, एम्‍है जिया निम्है गुसन चोन्हा गने चल्‍ख़िरकी र'ई।

12ऎम निम्‍है मइय्‍याँ गोट्टा जिया ती चोन्हा नन्दम, लिकिन नीम गा एम्है मइय्याँ गोट्टा जिया ती चोन्हा मल नन्दर।

13इदही ऊजी नू नीम हूँ एमा गे निम्‍हा जियन चल्‍ख़'आ ती चोन्हा नना एन्ने ऎन निमन एंग्है ख़द्द-ख़र्रा अक्‍कन ती ब'अदन।

14मल पत्त'उर गने अमा पुन्दर'आ। उजगो अरा नॆग मलका ही एन्‍देर मेसर-नखरना? बिल्‍ली ही ऊख़ा गने एन्‍देर संगे-लोंगे?

15मसीस अरा सैतान ही संगेर ही गने एन्‍देर मॆल? पत्त'उर अरा मल पत्त'उर ही एन्‍देर मेस्रना?

16धर्मेसी मन्दिर गे मूर्ति गुट्ठी गने एन्‍देर नता? नाम गा उज्‍जना धर्मेसी मन्दिर हिकदत। एकासे का, धर्मेस बाचकादस, “ऎन आर नू ओक्र'ओन, अरा आर ही मझी नू कुद्दोन नुंगोन, अरा ऎन आर ही धर्मे र'ओन, अरा आर एंग्है आलर र'ओर।”

17औंगे उर्बस एन्ने ब'अदस, “मलदौ आलर ही मझी ती उरखा ती तरकूटी र'आ, अरा सोतबोड़'आ आलॊन अमा एवंसड़'आ, ख़ने ऎन निमन इंझ्र'ओन।

18ऎन निमा बंग र'ओन, अरा नीम एंगा ख़द्दर अरा ख़द्दो र'ओर, उर्मी ती सवंगिय उर्बन ब'अदन।”

← Chapter 5 Jump to: Chapter 7 →