2 Corinthians 8

Kurukh (पुना गच्छरना NT (BSI))

← Chapter 7 Jump to: Chapter 9 →

1अक्‍कु अना भईरो! मकेदोनिया ता कलीसिया गुट्ठी गे धर्मेस ऎदका मया ती आर नंजका ही पत्त नू ऎम निमन अख़त'आ बेद्ददम।

2आर कोड़हे खिलपत ही बिढ़्रना बेड़ा नू हूँ कोड़हे रिझ्रर। अरा आर कोड़हे कूल कीड़ा नू हूँ, गोट्टा जिया ती चि'अना ख़ट्टना नू बग्गे ती बग्गे चिच्चर।

3आर ही पत्त नू एंगा गोवाह ईद का आर तम्है औसान ती हूँ, अरा तम्है औसान ती चाड़ियर ती हूँ दान चिच्चर। अरा तम्है गोट्टा जिया ती दान चिच्चर।

4आर एमन कोड़हे अरजी गने नॆचर का येरुसलॆम ता नेम्‍हा आलर ही संगरा नना गे सुसर नलख नू भागी मना गे तमा गे हूँ मोका ख़क्ख्र'ओ।

5आर एकासे ऎम असरा नंजकम अदिन ती कोड़हे नंजर का, आर मुन्द तमन उर्बस गे सोंपचर अरा ख़ॊख़ा धर्मेसी मने लेक्खा एमा गे तमन सोंपचर।

6औंगे ऎम तीतुसिन नॆचकन का आस एका दौ नलखन निम्‍है मझी नू ऒड़ नंजकाचस, अदिन मुंजा गे आस बर'अरकी निमन रिझ्रत'ओस।

7अक्कु गा नीम उर्मी कत्‍था नू पर्दका ऊसुका र'अदर, पत्त'अना नू, कत्था नू, लूर नू, उर्मी रकम ही चिहुंक नू, एम्है मइय्याँ ता निम्है चोन्हा नू पर्दका ऊसुका र'अदर। अन्नेम नीम ई बरारन चि'अना नू हूँ पर्दना ऊसकना र'ई।

8ऎन इदन ओन्टा पॆसका लेक्खा मल ब'अदन। लिकिन नन्नर संगरा नन्ना नू एका लेक्खा अंगियारनर, इदन निमा गे ऎदना ती निम्है चोन्हा एका लेक्खा मानिम र'ई एन्ने अख़'आ गेम ऎन बेद्ददन।

9नीम गा नम्है उर्बस येसु मसीसी मया आबोन अख़दर का, आस उरुब रहचका ती हूँ निम्‍है चड्डे कीड़ा मंजस, ईगेका नीम आसी कीड़ा मन्ना ती उरुब मना ओंगोर।

10ई पत्त नू ऎन निमन ओन्टा सलहा चि'अदन का, इतिंगाली एका दौ नलखन नीम ऒड़ नंजकर, अदिन अक्‍कु नन्ना मुंजना दिम निम्‍है दौ र'ई। अदिन नन्ना नू लेका मला अदिन नना गे मने नन्ना नू हूँ नीमिम मुध रहचकर।

11औंगे आ नलखन ऒड़ नना गे निमा एवंदा अंगिय'अना रहचा, आद अदन नन्ना मुंजा गे हूँ र'अना र'ई। अक्कु निमा गुसन ऎ बग्गे र'ई अत्रु ती अदिन नंज मुंजके।

12अन्ति ओर्तस गे दान चि'आ गे अंगिय'अना र'ई होले, तंग्है औसान लेक्‍खा इन्‍द्रिइमन हूँ चीतारदस, धर्मेस अदिन इंझ्रदस। नॆख'आ तिम हूँ एन्ने असरा मल नन्तार'ई का आस अपन औसान ती बग्‍गे चि'ओस।

13एंगा एन्ने मने मल्ला का, नन्नर रिझाब'ओर अरा नीम दुक्खे मनोर। ओर्मर ओन्टा लेक्खा र'आ गे दिम ऎन बेद्ददन।

14ई बेड़ा नू निम्है निन्द्रका र'अना नन्नर ही चाड़न पुराब'ओ। अन्नेम नन्ना बेड़ा नू नन्नर ही निन्द्रका र'अना निम्है चाड़न पुराब'ओ। ई लेक्खम नीम इरबर हूँ ओन्टम मनोर क'ओर।

15नेम्‍हा पुथी नू इदही पत्त नू एन्ने लिख्रकी र'ई का, “नॆ बग्‍गेम खु़जकाचस, आस गुसन कोड़हे बग्‍गे मल मंजा, अरा नॆ जुक्‍किम खु़जकाचस आस गुसन कोड़हे जुक्की मल मंजा।”

16ऎन निम्है मइय्याँ एका लेक्खा अंगिय'अना ती रहचकन, अन्नेम धर्मेस तीतुस गे आ अंगिय'अना आबोन चिच्का ती ऎन धर्मेसिन धन्‍यवाद नन्दन।

17एन्देरगेका तीतुस एमा ने'अना आबोन इंझ्रना ती लेका मला, आस कोड़हे अंगिय'अना गने तंग्है मने ती निम्‍है गुसन बरदस।

18ऎम आसी गने ओर्त भईसिन हूँ तइय्यालदम, नॆ दौ कत्‍था तेंगा कुद्दना चड्डे उर्मी कलीसिया नू कोड़हे नामे ख़क्खका र'अस।

19ईद लेका मला, अरा उर्बासी महबा गे अरा संगरा नना गे एमा गे र'अना अंगिय'अना आबोन ऎद'आ गे ऎम दान आबोन येरुसलॆम हो'ओम ख़ने, एम्है डहरे ऎकना नू एम्है गने संगे चि'आ गे कलीसिया आसिन चज्जकी र'ई।

20ई बरार आबोन ऎम ख़ट्टरकी चि'अना बारी, नॆ हूँ एमन अदही पत्त नू बदी अम्बोर नना बेद्ददम।

21एन्देरगेका धर्मेसी ऎरना नू लेका मला आलर ही ऎरना नू हूँ उजगो आबोन नना गेम कोड़हे चिहुट नन्दम।

22इबड़ा इरबर गने ऎम अउर ओन्टा एम्है भईसिन हूँ तइय्यालदम। ऎम घड़ीम घड़ी बिढ़चकम ती अक्कम का आस कयनो पत्त नू संगरा नना गे अंगिय'अना गने र'अस। अक्कु आस गे निम्है मइय्याँ कोड़हे असरा र'अना ती आस संगरा नना गे मुन्द तिम कोड़हे अंगिय'अना गने र'अस।

23तीतुसी पत्त नू गा आस एंग्है सझा र'अस अरा निमा गे सुसर नन्ना नू एंग्है संगे नलख ननू र'अस। अरा एम्‍है भइय्योर ही पत्त नू गा आर कलीसिया ती तइरका पैकर अरा मसीस गे महबा आबोन ओन्द्र'ऊ र'अनर।

24औंगे निम्है चोन्हन अरा ऎम निम्है पत्त नू फुलई मन्ना ती बाचका कत्था गुट्ठिन कलीसिया ही मुन्दहारे आर गे पुरुब ऎद'आ।

← Chapter 7 Jump to: Chapter 9 →