2 Corinthians 7

Kurukh (पुना गच्छरना NT (BSI))

← Chapter 6 Jump to: Chapter 8 →

1अना एंगा चोन्हा भईरो! नमा एन्ने गच्छरना गुट्ठी ख़क्ख्रकी र'ई, औंगे नाम नम्है कया अरा जियन सोतबोड़'आ ननू उर्मी जिनिस ती नमन सुध मंज ख़च्चदत नेकअन। अरा धर्मेसी इल्चक'आ गने नमा नेम्हन पूरा मन्ना ही तरा नलख नन्दत नेकअन।

2ऎम मुन्द तिंका लेक्खा नीम निम्है जिया नू एमा गे अड्डा चि'आ। ऎम नॆख'अन हूँ मलदौ मल नंजकम। ऎम नॆख'अन हूँ मल बगड़ाचकम। ऎम नॆख'अन हूँ मल ठकचकम।

3ऎन निमन बदी टिड़'आ गे इदन मल ब'अदन। अन्‍ति ऎन गा मुन्देम बाच ख़च्‍चकन का ऎम निम्है गने उज्जा गे अरा खे'आ गे हूँ सपड़ारका र'अदम, ई लेक्खा नीम एम्है जिया नू अड्डा ख़क्खका र'अदर।

4ऎन निम्है पत्त नू कोड़हे डिढ गने र'अदन। ऎन निम्‍है पत्त नू कोड़हे फुलई मन्दन। ऎन जिया सालना ती नीन्द्रका र'अदन। ऎन एंग्‍है उर्मी खिलपत ही मझी नू हूँ रिझ ती नीन्द्रका र'अदन।

5एन्‍देरगेका ऎम मकेदोनिया बरचकम ख़ने हूँ, एमा गे सल्‍ल मल ख़क्ख्रा। लिकिन ऎम उर्मी तरती खिलपत ख़क्खकम, बहरी नग्गानख्रना अरा भितरी इल्चका रहचा।

6अन्नु हूँ लुदऊ आलर गे जिया सालना चि'ऊ धर्मेस, तीतुसी बरना ती एमा सल चिच्‍चस।

7आसी बरना ती लेका मला, लिकिन नीम एका लेक्खा आसिन रिझाबाचर एन्ने मेंजकम ती हूँ ऎम जिया सालना ख़क्खम। नीम एंगन ऎरा गे ऎ बग्गे पत्तारदर, अरा नीम ऎ बग्गे दुक्खे सारदर, अरा नीम एंग्है मइय्याँ ऎ बग्गे तिहा उइय्दर, अबड़ा पत्त नू आस एमन तिंगियस, ख़ने ऎन अउरिम कोड़हे रिझ्र'आ हेलरकन।

8ऎन निमा लिखचका चिठी निमा गे दुक्खे चिच्चा होले हूँ, ऎन अदिन लिखचका ती मल पस्तारदन। एंग्है चिठी निमन दुक्खे चिच्चा एन्ने ऎन अक्कन ख़ने, ऎन मुन्द पस्तारकन। नीम जुक्‍किम घड़ही लेका दुक्खे सारचकर।

9लिकिन अक्‍कु ऎन रिझ्रदन। नीम दुक्खे सारचकर इदगे मला, निम्है दुक्खे निम्है नू जिया किर्त'अनन ओन्द्रा, इदगे ऎन रिझ्रदन। नीम आ दुक्‍खेन धर्मेसी मने लेक्‍खा इंझ्रकर, ख़ने एम्है तरती निमा गे एन्देर हूँ मल बगड़ारा।

10एन्देरगेका एका दुक्‍खे धर्मेसी मने ती नमा इंझ्रना मनी अदही ऊजी जिया किर्त'अना मनी, अरा जिया किर्त'अना नाड़रना तरा कड़हाब'ई, अरा अत्रु खोबरारना मल मनी। लिकिन ख़ॆख़ेल ता दुक्‍खे ही ऊजी खे'अना मनी।

11नीम ऎरा का, नीम एका दुक्खेन धर्मेसी मने ही लेक्खा इंझ्रकर, अत्रु ती निमा एवंदा भगती आबोन कुन्द्रा। नीम बिगर बदी आलर एन्ने ऎद'आ गे एवंदा अंगियारदर, अरा एवंदा कैर नन्दर, अरा एवंदा इल्‍चदर, अरा एवंदा चीबाख़ारदर, अरा एवंदा रिझ, अरा नेंवई मन्नन ऎरा गे एवंदा मने नन्दर। ई लेक्‍खा नीम ई पत्त नू उर्मी तरती बिगर बदी मना गे पुरुब नंजकादर।

12मानिम नू ऎन आ चिठिन इदगे मल लिखचकन का मलदौ ननू आलर अरा मलदौ सह'ऊ आलर ही एंगा सोच रहचा। लिकिन धर्मेसी ऎरना नू नीम निमन एमा गे ऎ कोड़हे चिच्कादर एन्ने नीम अख़'आ गे दिम ऎन आ चिठिन लिखचकन।

13इबड़ा ही चड्डे एमा जिया सालना ख़क्ख्रा। इदिन ती कोड़हे ऎम तीतुसी रिझ आबोन ईरकम ती अउरिम कोड़हे रिझ्रकम, एन्देरगेका आसी जियन नीम ओर्मर हरियर नंजकर चिच्‍कर।

14ऎन आसी मुन्दहारे निम्‍है पत्त नू फुलई मंजका ती बाचकन। इबड़ा कत्था नू ऎन लज्‍जे मॊख़ा गे नीम हूँ मल चिच्कर। ऎम उर्मी बेड़ा निम्है गने मानिमन दिम बाचकम। अन्नेम तीतुस गने ऎम निम्है पत्त नू फुलई मंजका ती बाचका कत्था मानिम मंजा।

15अरा नीम ओर्मर आसी कत्‍थन एकासे पॆस्रकर अरा इल्‍चुनुम अरा असरनुम आसिन परघाचकर, इदन आस सुरता नन्दस ख़ने, निम्‍है नू आसी चोन्‍हा कोड़हे मनी क'ई।

16उर्मी कत्था नू एंगा निम्है मइय्याँ असरा र'ई, इत्रु ऎन रिझ्रदन।

← Chapter 6 Jump to: Chapter 8 →