2 Corinthians 13

Kurukh (पुना गच्छरना NT (BSI))

← Chapter 12 Jump to:

1अक्‍कु ऎन तिसर खेप निम्‍है गुसन बर'ऊ र'अदन। नेम्‍हा पुथी ब'ई का, “दुई मलता तीन आलर ही गोवाह ती ओर्मा दिम फरियारना र'ई।”

2ऎन दोसर खेप निम्है गुसन बरचकन ख़ने, मुन्द दिम ऎन निमन चेताबाचकन। ऎन अक्‍कु निम्है गुसन मल र'अदन, अन्नु हूँ ऎन अउरिम निमन चेताब'अदन। ऎन अउर निम्है गुसन बर'ओन होले, नॆ मुन्द पाप नंजकानर अरा नॆ अक्कु पाप नन्नर, नॆकन हूँ सोग्‍गे मल ऎरोन।

3नीम गा इदही सबुती बेद्ददर का मसीस एंग्है त्रु ब'आलदस। अरा मसीस निम्है तरती पयहा मल्‍दस, लिकिन आस निम्है नू सवंगिय र'अस।

4मानिम नू आस पयहा आल कया नू क्रुस नू टोकतारस, अन्नु हूँ धर्मेसी सवंग ती उज्‍जालदस। अन्नेम ऎम हूँ गा आस नू पयहा र'अदम, लिकिन धर्मेसी सवंग ती निमा गे सुसर नना गे आस गने उज्‍जोम।

5नीम निमन बिढ़'आ ती ऎरा का नीम पत्त'अना नू उज्‍जालदर का मला, नीम निमानिम जँच'आ। एन्‍देर नीम मल चिन्हदर का येसु मसीस निम्‍है नू र'अस? अन्ने नीम मल चिन्हदर होले, नीम जंचना नू हार मंजकर केरकर।

6एंगा असरा र'ई का नीम अख़'ओर का ऎम तइरका अदिया ही जंचना नू हार मल मंजकादम।

7अक्कु ऎम धर्मेसिन गोहरारदम का नीम एकअम मलदौ मल ननोर। इदगे मला का ऎम जंचना नू जितचका ऎथ्र'ओम, लिकिन इदगे गोहरारदम का ऎम जंचना नू हार मंजकम एन्ने ऎथ्रना ती हूँ, नीम दौ ननोर।

8एन्देरगेका ऎम मानी ही बिड़दो एन्‍देर हूँ नना पोल्‍लोम, लिकिन मानी गेम उर्मिन नना ओंगोम।

9ऎम पयहा र'अना ती हूँ नीम सवंगिय र'अदर, इदगे ऎम रिझ्रदम। अरा ऎम गोहरारदम हूँ का नीम बड़ियर मनोर क'ओर।

10ऎन निम्है ती गेच्छा नू र'अना बारी इबड़ा कत्थन इदगे लिखदन का, ऎन निम्है गुसन बर'ओन ख़ने, उर्बस एंगा चिच्का अदिया ती निम्है गने सकत गने इन्द्रिइम नन्ना मल मनो। एन्‍देरगेका एंगा ई अदिया निमन बगड़'आ गे मला कम'आ गे चीतारकी र'ई।

11छेद्दे नू अना भईरो, रिझ्र'आ, बड़ियर मना, डिढ मना, ओन जिया ती र'आ, निभर'आ ती र'आ। ख़ने चोन्‍हा अरा सान्ति ही धर्मेस निम्‍है गने र'ओस।

12ओर्तोस नन्नासिन नेम्‍हा चोंखना गने मोंजरा नना।

13ओर्मा नेम्‍हा आलर निमन मोंजरा नन्नर।

14उर्बस येसु मसीसी मया अरा धर्मेसी चोन्हा अरा नेम्‍हा बॊलतासी मेस्रका नीम ओर्मर गने र'अन नेकअन।

← Chapter 12 Jump to: