Acts 12

Kurukh (पुना गच्छरना NT (BSI))

← Chapter 11 Jump to: Chapter 13 →

1आ लगा-लगी नू हॆरॊदॆस अगरिप्पा बॆलस कलीसिया ता जोक्‍क आलारिन खिलपत नना हेलरस।

2आस यॊहनसी भईस याकॊबसिन तलवार ती पिटताचस।

3एन्ने नन्ना यहूदीर गे बॆस लग्‍गिया। अदिन ईरियस ती आस पतरसिन हूँ हॆंताचस। अउला बिगर बिदगी असमा ही परब रहचा।

4आस पतरसिन हॆंताचस ती जेहेल नू गुड़ताचस अरा आसिन चार चार सैनर ही चार खोंड़हा ही ख़ापना नू उइय्यस चिच्‍चस। आस कट्टना परब ही ख़ॊख़ा आलर ही मुन्‍दहारे ओन्‍द्र'आ बेद्दा लगियस।

5जेहेल नू पतरस गुड़रकाचस ख़ने, कलीसिया आस गे धर्मेस गुसन सौंसे जिया ती नगदे गोहरार'आ लगिया।

6इकला हॆरॊदॆस आसिन आलर ही मुन्‍दहारे ओन्‍द्र'आ गे रहचस, अदही मुन्‍द ता माख़ा पतरस दुई गोट सिकड़ी ती हॆंरका ती ऎंड़ सैनर ही मझी नू ख़न्‍द्र'आ लगियस। अरा नन्ना सैनर जेहेल ही बली ही मुन्‍दहारे ख़ापा लगियर।

7आचका उर्बासी ओन्‍टा पैकस बरचस ती इज्‍जस अरा कुठली नू बिल्‍ली बिल्‍चिया। आस पतरसी पंजर तरा ठुड्डस ती एज्‍जस अरा आसिन बाचस, “चाँड़हे चो'आ।” अरा पतरसी ख़ेक्खा ती सिकड़ी कोल्‍लरा ती खत्रा केरा।

8तहाँ पैकस आसिन बाचस, “कड़मन भिड़'आ अरा जूतन अत्ता।” पतरस अन्नेम नंजस। पैकस आसिन अउरिम बाचस, “निंग्‍है चदर आबोन झप्र'आ ती एंग्‍है गने चॊंख़्र'आ”

9अन्नेम पतरस आसी ख़ॊख़ा ख़ॊख़ा बहरी उरखस। आस बल्‍ला लगियस का पैकस एन्‍देर नना लगियस आद मानिम हवे। आस तुंगुल ऎरना बेसे सोच'आ लगियस।

10तहाँ आर पहिल पहरा अरा दोसर पहरा आबोन कट्टियर ती पन्ना ही बखड़े-बली गुसन अंड़सियर एकाद नगरे तरा हुं'ई। आद आर गे तान तानिम तिसग्रा केरा। आर बहरी उरखर ती गली नू काला लगियर। आ बारीम पैकस आचका आसिन अम्‍बियस ती किर्रिम बिच्‍चियस।

11ख़ने पतरस निजिड़यस ती बाचस, “अक्‍कु ऎन मानिम अक्‍ख ख़च्‍चिकन उर्बस तंग्‍है मेर्ख़ा पैकासिन त‍इय्यस ती एंगन हॆरॊदॆसी ख़ेक्खा ती नाड़ियस अरा यहूदीर ही उर्मी असरन ख़च्‍चियस।”

12इदिन अक्‍खस ती आस मरकुस बारना यॊहनसी तंगियो मरियम ही एड़पा बरचस। असन बग्‍गे आलर ख़ॊंड़रर ती गोहरार'आ लगियर।

13आस बलिन ठोकठोकाम बाचस। आ बारी रोदॆ नामे ओन्‍टा जॊंख़ पेल्‍लो नॆ तंग्‍है ब'अरकी ऎरा बरचा।

14अरा पतरसी ब'अनन ओरखाचा ती आद रिझ ती निन्‍दिया केरा अरा बलिन मल तिसगा अरा तेंगा गे बोंगोर नख्रनुम भितरी केरा ती तिंगिया का पतरस बली गुसन इज्‍जकादस।

15आलर अदिन बाचर, “नीन पूरालदी।” अन्नु हूँ आद बड़ियर लगे बाचा, “मानिम हवे।” ख़ने आर बाचर, “आसी पैकस नेख़‍अन।”

16लिकिन पतरस ठोकठोकाम ब'अना बारीम रहचस, अरा आर बलिन तिसगर ख़ने, पतरसिन ईरियर ती नगदे अनचक मंजर केरर।

17आस ख़ेक्खा ती कलेकले र'आ गे टिवांबाचस। अरा आस आरिन तिंगियस धर्मेस आसिन एकासे जेहेल ती ओथ्रस ओन्‍द्रस। फिन आस बाचस, “याकॊब अरा पत्त'ऊ भइय्योरिन इदही अरो चि'अके।” अरा आस असलेक उरखस ती नन्ना अड्डा किर्रिम बिच्‍चियस।

18बिज्‍जिया ख़ने सैनर नू अकबक मना हेलरा का पतरस गे एन्‍देर मंजा।

19हॆरॊदॆस आसिन नगदे बेद्दताची ईरियस अरा मल ख़क्‍खरस। ख़ने आस सैनारिन मेंजस ख़ूजियस ती आरिन पिटत'आ गे पॆसस। अरा हॆरॊदॆस यूदेया आबोन अम्‍बियस ती कैसरेया केरस ती असन र'आ हेलरस।

20अउला नू हॆरॊदॆस तुरोस अरा सीदॊन ता आलर ती कोड़हे गोसा मंजकाचस। लिकिन आर ओर्मर ओन गोट मनरकी आसी गुसन भेंटार'आ गे बरचर। अरा आर बॆलासी मुध जॊंख़स बिलासतोसिन मना बाचर ती हॆरॊदॆस ती सान्‍ति नॆचर। एन्‍देरगेका आर ही राजी ख़ेस्‍से तीख़ील गे बॆलस हॆरॊदॆसी राजी म‍इय्याँ असरा रहचा।

21भेंटार'आ गे ओक्‍ताचका उल्‍ला नू हॆरॊदॆस बॆल किचरी अत्तियस ती बॆल-गदिया नू उक्‍कियस अरा आलारिन तेंगा हेलरस।

22आलर चिच्चियारर, “ईद आलासी ब'अना मल्ली धर्मेसी ब'अना हवे।”

23आ बारिम उर्बासी पैकस आसिन बेमार ती लौचस, एन्‍देरगेका आस धर्मेस गे महबा मल नंजस। अरा आस पुच्‍चियस ती ख़ॊख़ा केच्‍चस केरस।

24धर्मेसी कत्‍था बढ़रनुम अरा बिंड़रनुम केरा।

25बरनबास अरा स‍उलस तम्‍है नलखन मुंजियर अरा येरुसलॆम ती किर्रियर। अरा तम्‍है गने मरकुस बारना यॊहनसिन ओन्‍द्रर बरचर।

← Chapter 11 Jump to: Chapter 13 →