Acts 5

Kurukh (पुना गच्छरना NT (BSI))

1हनानिया नामे ओन्‍टा आलस अरा तंग्‍आली सफिरा तम्‍है ओन्‍टा ख़ल्‍लन बीसियर।

2आस तंग्‍‍आली ही अख़नुम अदही दाम ही ओन हींस आबोन अपन गे उइय्यस अरा ओन हींसन होच्‍चस ती त‍इरकर गुसन उइय्यस चिच्‍चस।

3तहाँ पतरस बाचस, “हनानिया, सैतान एन्‍देरगे निंग्‍है जिया नू नेम्‍हा बॊलतासिन ठक'आ गे अरा ख़ल्‍ल ही दाम ही ओन हींसन निंगा गे उइय्या गे आकुस नंजा?

4आ ख़ल्‍लन बीसना ती मुन्‍द आद निंग्‍है दिम रहचा। अरा बीसका ख़ॊख़ा हूँ अदही दामन निंग्‍है मने लेक्‍खा नना ओंगा लिक्‍कय। एन्‍देरगे नीन एन्ने नलख नना गे सोचकय? नीन एंगन मला धर्मेसिन ठकचकय।”

5हनानियास ई कत्‍थन मेंजस ती असानिम खत्तरस ती केच्‍चस केरस। इदही पत्त नू मेंजका आलर ओर्मर म‍इय्याँ इल्चक'आ कोरचा केरा।

6जोक्‍क जॊंख़र चॊचर ती आसिन कफन नू मुसगियर ती बहरी होच्‍चर ती मंडियर चिच्‍चर।

7मलागूटी तीन घंटा ख़ॊख़ा तंग्‍आली भितरी बरचा। लिकिन आद एन्ने मंजकी रहचा अदिन बल्‍ला लगिया।

8पतरस अदिन बाचस, “एंगन तेंगय, ख़ल्‍लन नीम इवन्‍दा तिम बीसकर का?” आद बाचा, “हाँ, इवन्‍दा तिम बीसकम।”

9पतरस अदिन बाचस, “नीम उर्बासी बॊलतन बिढ़'आ गे एन्‍देरगे भिंड़रकर? ऎरय, निंग्‍है मॆतासिन मंड़ियर आर बली गुसन र'अनर, आर निंगन हूँ बहरी हो'ओर।”

10आ बारिम आद आसी ख़ेडमूली नू खत्तरा ती केच्‍चा केरा, अरा जॊंख़र भितरी बरचर अरा अदिन केचका ख़क्‍खियर। अरा आर अदिन बहरी होच्‍चर ती तंग्मॆतासी धरी नू मंडियर।

11गोट्टा कलीसिया नू अरा एका बग्‍गे आलर इबड़ा कत्‍थन मेंजकाचर अबड़ा ओर्मर म‍इय्याँ इल्चका कोरचा केरा।

12त‍इरकर ती आलर ही मझी नू नगदे चिन्‍हा अरा अजगुत नलख गुट्ठी मना लगिया। पत्त'ऊ आलर जम्मर धर्मेसी मन्दिर नू सालोमॊन कुड़िया ब'अना अड्डा नू उर्मी उल्‍ला ख़ॊंड़र'आ लगियर।

13नन्ना आलर नॆखा हूँ ‍आर ही गने मेसरा गे डिढ मल मना लगिया। अन्नु हूँ आलर आरिन नगदे म‍ईन नना लगियर।

14अरा नगदे बग्‍गे मॆतर अरा मुक्‍कर उर्बा येसुसिन पत्त'आ लगियर। अरा आर पत्त'ऊ आलर ही खोंड़हा नू मेसर'आ लगियर।

15आलर रोगियारिन सड़क गुट्ठी नू हो'आ लगियर ती पिटरी नू खटी नू कीद'आ चि'आ लगियर का पतरस अन्नु कट्टोस होले आसी ऎख़ अबड़र ती जोक्‍कोर म‍इय्याँ मनो।

16येरुसलॆम ही अड्डे-बेड्डे ता नगरे गुट्ठी ती हूँ बग्‍गे आलर रोगियारिन अरा मलदौ बॊलता गुट्ठी ती धरचका आलारिन ओन्‍द्र'आ लगियर, अरा आर ओर्मर कोड़े मना लगियर।

17तहाँ कोहाँ नैगस अरा आसी गने रहचका संगेर सदुकी आलर कैर ती भरमारर केरर।

18अरा त‍इरकारिन धरचर ती जेहेल नू मुच्‍चियर चिच्‍चर।

19लिकिन माख़ा उर्बासी ओन्‍टा पैकस जेहेल ही बलिन तिसगस ती आरिन बहरी ओन्‍द्रस ती बाचस,

20“कला, धर्मेसी मन्दिर चाली नू इज'आ ती ओर्मा आलर गे पुना उज्‍जना ही पत्त ता उर्मी कत्‍थन तेंगा।”

21आर इदिन मेंजर ती बिज बेड़ा नू धर्मेसी मन्दिर नू कोरचर ती सिखाब'आ हेलरर। तहाँ कोहाँ नैगस अरा आसी संगेर बरचर ती इस्राऎल ही उर्मी सेयान आलर र'अना कोहाँ सभा आबोन मीख़ियर। अरा जोक्‍क आलारिन जेहेल ती त‍इरकारिन ओन्‍द्र'आ गे त‍इय्यर।

22लिकिन आ सैनर जेहेल नू अंड़सियर ती त‍इरकारिन असन मल ख़क्‍खियर। अरा आर किर्रियर ती हलन तिंगियर।

23“ऎम ईरकम का जेहेल एड़पा गा बड़ियर गने मुच्‍चका रहचा अरा ख़ापुर हूँ बहरी बली गुट्ठी गुसन इज्‍जका रहचर, लिकिन तिसगकम ख़ने भितरी नॆकन हूँ मल ख़क्‍खकम।”

24इदिन मेंजर ती धर्मेसी मन्दिर ख़ापुर ही मुद्धस अरा मुध नैगर आर ही पत्त नू सोच नू मंजर केरर अरा अकबकरर का ईद एन्‍देर मना लगी।

25आ बारिम एक‍अम ओर्तस बरचस ती तिंगियस, “नीम जेहेल नू मुच्‍चका रहचकर, आर धर्मेसी मन्दिर चाली नू इज्‍जर ती आलारिन सिखाब'आ लगनर।”

26ख़ने धर्मेसी मन्दिर ख़ापुर ही मुद्धस सैनर गने केरर ती आरिन ओन्‍द्रर, लिकिन बड़पेलहा मला, एन्‍देरगेका आर आलारिन एलचियर का आलर तमन पखना ती लोड़ग'ओर।

27आर त‍इरकारिन ओन्‍द्रर ती कोहाँ सभा ही मुन्‍दहारे इजताचर। ख़ने कोहाँ नैगस आरिन मेंजस,

28“ऎम निमन चेताबाचकम ती पॆसका मल चिच्‍चकम का ई नामे ती अमके सिखाब'आ? अन्नु हूँ नीम गोट्‍टा येरुसलॆम ता उर्मी आलारिन आसी पत्त नू तिंकर चिच्‍चकर। अरा आसी पिटका ही बदी एम्‍है म‍इय्याँ नना लगदर।”

29ख़ने पतरस अरा नन्ना त‍इरकर आनाकिर्ताचर, “एमा गे आलर ही ती धर्मेसी पॆस्रना कोड़हे चाड़ र'ई।

30नीम गा येसुसिन क्रुस नू ठोकचकर ती पिटकर चिच्‍कर, लिकिन नम्‍है पूरखर ही धर्मेस आसिन केचका ती उज्‍जताचस।

31धर्मेस दिम आसिन उर्बस अरा बछाब'ऊ नंजस ती तंग्‍है तीना चोक्‍ख म‍ईन ही अड्डन चिच्‍चस, एकत्रु का आस इस्राऎल आलर गे जिया किर्त'अना अरा पाप छमा चि'ओस।

32ऎम इबड़ा कत्‍था ही गोवाह हिकदम, अरा धर्मेस तंगन पॆस्र'उर गे चिच्का नेम्‍हा बॊलतस हूँ गोवाह र'अदस।”

33इदिन मेंजर ती आर कैर ती निन्‍दियर केरर अरा आर त‍इरकारिन पिटा ख़च्‍चा गे अंगियाचर।

34आ बारी ओर्मा आलर ती म‍ईन ख़क्ख्रका नॆग सिखाब'ऊ गमालिऎल नामे ओन्‍टा फरिसीस कोहाँ सभा नू इज्‍जस अरा त‍इरकारिन एगघड़ी गे बहरी त‍इय्या गे आनियस।

35अरा कोहाँ सभा ता आलारिन बाचस, “इस्राऎल आलारो, नीम चिहुंक र'आ का इबड़ारिन एन्‍देर नना बेद्दालदर।

36जोक्‍क उल्‍ला मुन्‍द थेउदास दहदर मंजस, आस ऎन कोहाँ आलस र'अदन बाचस, अरा चार सौ केम आलर आसी ख़ॊख़ा ईकू आलर रहचर। लिकिन आस पिटतारस, अरा आसी पॆस्र'ऊ आलर ओर्मर छितियारर केरर अरा आर एन्‍देर हूँ नना पोल्‍लर।

37अदही ख़ॊख़ा नामे लेख्रना बेड़ा नू गलिलेया ता यूद‍स दहदर मंजस। आस नगदे आलारिन घुरियाचस ती तंग्‍है ख़ॊख़ा बर'आ चिच्‍चस। आस हूँ केच्‍चस अरा आसी पॆस्र'ऊ आलर ओर्मर छितियारर केरर।

38औंगे अक्‍कु ऎन ई पत्त नू निमन ब'अदन, नीम ई आलारिन एन्‍देर हूँ अमा नना अम्‍बा चि'आ। ई चिताबुता महले ई नलख आलर तरती र'ई होले, ईद तानिम नठार'ओ क'ओ।

39लिकिन ईद धर्मेस तरती र'ई होले, इदिन नीम नठाब'आ पोल्‍लोर। नीम धर्मेसी बिड़दो लड़ाई ननुर मनोर।”

40आर आसी कत्‍थन इंझ्रर अरा त‍इरकारिन मीख़ियर अरा आरिन कोर्रा ती लौताचर। अरा आरिन चेताबाचर का नीम येसुसी नामे ती आलारिन अमके तेंगा ब'अरकी अम्‍बियर चिच्‍चर।

41त‍इरकर रिझ मंजर ती कोहाँ सभा एड़पा ती उरखर। एन्‍देरगेका आर येसुसी नामे चड्डे मार मॊख़ा गे अरा लज्‍जे मॊख़र'आ गे जॊगे गन्‍तारर।

42उर्मी उल्‍ला आर धर्मेसी मन्दिर चाली नू अरा एड़पा एड़पा नू काला लगियर ती सिखाब'आ लगियर अरा तेंगा लगियर का येसुस दिम मसीस हिकदस।

← Chapter 4 Jump to: Chapter 6 →