Acts 13

Kurukh (पुना गच्छरना NT (BSI))

1अन्‍तियोख़ेया कलीसिया नू कैनो बग्‍गे धर्मेसी कत्‍था तिंगू अरा सिखाब'ऊ आलर रहचर। इबड़र बरनबास अरा नीगेर बारना सिमॊन अरा कुरॆनॆ नगरे ता लूकियोस अरा बॆलस हॆरॊदॆस अंटिपसी संगे परदका मनायॆन अरा स‍उल हिकनर।

2आर उन्‍दुल उपास नन्नुम उर्बासी महबा नना लगियर ख़ने, नेम्‍हा बॊलतस बाचस, “ऎन स‍उलसिन अरा बरनबासिन एन्‍देर नलख गे मीख़कादन अदगे आरिन भिनंग नना।”

3तहाँ गोहरारना अरा उपास नन्ना ही ख़ॊख़ा आर स‍उल अरा बरनबास म‍इय्याँ ख़ेक्खा उइय्यर ती आरिन त‍इय्यर।

4अन्नेम बरनबास अरा स‍उलस नेम्‍हा बॊलतस ती त‍इय्का ती सेलुकिया केरर अरा असलेक ती आर कोहाँ डोंगा नू कुप्रोस टापू केरर।

5अरा आर सलामिस नगरे अंड़सियर ती यहूदीर ही गोड़हा एड़पा गुट्ठी नू धर्मेसी कत्‍था तिंगियर। यॊहन मरकुस आर ही गने रहचस ती आर ही सहाड़ा नना लगियस।

6आर गोट्टा टापुन कट्टियर मुंजियर ती अदही आ पक्खे नू र'अना पाफोस नगरे बरचर। असन आर बरयेसु नामे ओन्‍टा यहूदी टोन्‍हा अरा ठकवा धर्मेसी कत्‍था तिंगुस गने भेंट मंजर।

7आस राजीख़ापुस सेरगियुस पौलुस गने रहचस। आ राजीख़ापुस बुधमान रहचस। आस बरनबास अरा स‍उलसिन मीख़ियस ती आर ती धर्मेसी कत्‍थन मेना बेद्दा लगियस।

8लिकिन टोन्‍हा बरयेसुस नॆकन युनानी भखा नू एलुमास नामे रहचा, आस आरिन हींड़चस अरा राजीख़ापुस येसुस नू पत्त'अना ती छेक'आ बेद्दा लगियस।

9तहाँ पौलुस बारना स‍उलस नेम्‍हा बॊलतस ती निन्‍दियस ती आसिन ओन ढिठ ईरियस।

10अरा बाचस, “नीन नाद ही ख़द्दय, अरा नीन चतरा अरा कटरहा ती निन्‍दका र'अदय, अरा उर्मी रकम ही दौ नलख ही बैरी हिकदय, अरा नीन उर्मी बारी उर्बासी उजगो डहरे गुट्ठिन बगड़'आ गे चिहुट नन्‍दय।

11ऎरा! अक्‍कुनिम उर्बस निंगन दंडे चि'ओस, नीन अन्धहा मनोय अरा जोक्‍क उल्‍ला बीड़ी ही बिल्‍लिन ऎरा पोल्‍लोय।” आ बारिम आसी ख़न्न धुन्‍द्रा मंजा केरा अरा ऊख़ा मंजा केरा। अरा आस अत्रा इत्रा कप्‍पा कुद्दियस का नेक‍ईम आसिन ख़ेक्खन धर'अरकी हो'ओर।

12ई मंजकन ईरियस ती आ राजीख़ापुस पत्ताचस अरा उर्बासी सिखाब'अना ही पत्त नू अकबकरस।

13अक्‍कु पौलुस अरा आसी संगेर कोहाँ डोंगा ती पाफोस ती पम्‍फुलिया ता पेरगॆ नगरे बरचर। असन यॊहन मरकुस आरिन अम्‍बियस ती येरुसलॆम किर्रियस।

14पौलुस दरा बरनबास पेरगॆ ती उरखर ती पिसिदिया राजी ही अन्‍तियोख़ेया बरचर। अरा आर ख़न्न ऎख़्रना उल्‍ला नू गोड़हा एड़पा नू केरर ती उक्‍कियर।

15पॆसका ही पुथी अरा धर्मेसी कत्‍था तिंगुर ही पुथी ती पढ़चका ख़ॊख़ा, गोड़हा एड़पा ता मुद्धर आरिन एन्ने बाचर त‍इय्यर, “भ‍ईरो! नीम आलारिन रिझ्रता गे इन्द्रिइम ब'आ बेद्ददर होले ब'आ।”

16होले पौलुस इज्‍जस ती ख़ेक्खा ती कलेकसे र'आ गे बाचस अरा तेंगा हेलरस, “अना इस्राऎल भ‍ईरो अरा धर्मेसी इल्‍चू नन-यहूदी आलारो, मेना।

17इस्राऎल आलर ही धर्मेस नम्‍है पूर्खारिन चज्‍जियस। अरा आर मिसर देस नू र'अना बारी आरिन कोहाँ कमचस ती तंग्‍है कोड़हे सवंग गने आरिन आ देस ती ओथ्रस ओन्‍द्रस।

18अरा आस चालीस बछर गूटी टोड़ंग नू आरिन ईरियस ख़ूजियस।

19इदही ख़ॊख़ा आस ख़ानान देस नू सात गोटंग जातियारिन पिटियस ती आर ही आ देसन चिच्‍चस।

20इबड़ा जम्मा मलागूटी साढ़े चार सौ बछर मंजा। इदही ख़ॊख़ा धर्मेस आर गे नेंव‍ई ननू आलारिन धर्मेसी कत्‍था तिंगू सामुऎलसी बेड़ा गूटी चिच्‍चस।

21इदही ख़ॊख़ा आर तमा गे ओन्टा बॆल नॆचर। अरा धर्मेस आर गे बेनियमिन गोतोर ता कीसी तंग्‍दस स‍उलसिन बॆल कमचस चिच्‍चस। आस चालीस बछर गूटी राजी नंजस।

22ख़ॊख़ा धर्मेस आसिन ताड़चस ती दाऊदसिन आर ही बॆल कमचस। अरा आसी पत्त नू धर्मेस बाचस, ‘ऎन एंग्‍है जिया पत्तारना लेक्‍खा येसैसी तंग्‍दस दाऊदसिन ईरकन। आस एंग्‍है मने लेक्‍खा जम्मन ननोस।’

23धर्मेस तंग्‍है गच्‍छरका लेक्‍खा आ दाऊदसी बनस तिम इस्राऎल गे ओन्‍टा बछाब'उस येसुसिन इजताचस।

24येसुसी बरना ही मुन्‍द यॊहनस ओर्मा इस्राऎल आलर गे जियन किर्त'अना ती नॊड़रना ही पत्त नू तिंगियस।

25यॊहनस तंग्‍है नलखन नंजस मुंजियस ती बाचस, ‘नीम एंगन नॆ तंग्‍है सोचदर? ऎन मसी मलदन। आस एंग्‍है ख़ॊख़ा बर'ऊ र'अदस। आसी ख़ेड्डे ता जूता गुट्ठिन ईचना ही जॊगे हूँ ऎन मलदन।’

26अना भ‍ईरो, अब्राहमसी जंईपुंई आलारो, अरा धर्मेसिन इल्‍चू नन-यहूदी आलारो, मेना। ई बछरना ही पत्त ता कत्‍था नम्‍है गुसन त‍इरकी र'ई।

27येरुसलॆम नू र'ऊ आलर अरा आर ही मुद्धर येसुसिन बछाब'ऊ ब'अरकी मल चिन्‍हचर। अरा धर्मेसी कत्‍था तिंगुर ही कत्‍थन मल बुझ्रनुम उर्मी ख़न्न ऎख़्रना उल्‍ला अबड़न पढ़चर। औंगे येसुसिन बदी नंजर ती अबड़ा कत्‍थन पूरा नंजर।

28आर गे आस नू पिटना दंडे जॊगे एन्‍देर हूँ बदी मल ख़क्‍ख्रा। अन्नु हूँ पिलातुस ती गोहरारर का आसिन पिटा।

29आर आसी पत्त नू नेम्हा पुथी नू लिखचका जम्मन नंज मुंजका ख़ॊख़ा, आसिन क्रुस ती एत्ताचर अरा मसड़ा नू उइय्यर चिच्‍चर।

30लिकिन धर्मेस आसिन केचका ती उज्‍जताचस चॊदस।

31अदही ख़ॊख़ा आस नगदे उल्‍ला गूटी नॆ आसी पिटरना ही मुन्द आसी गने गलिलेया ती येरुसलॆम बरचका रहचर आर गे ऎथ्र'आ लगियस। अक्‍कु आरिम आलर ही मुन्‍दहारे आसी गोवाह र'अनर।

32अक्‍कु ऎम धर्मेस नम्‍है पूरखर गने नंजका गच्‍छरका ही पत्त ता दौ कत्‍थन निमन तेंगदम।

33आस येसुसिन केचका ती उज्‍जताचस चॊदस ती आसी ख़द्दर नमा गे आ गच्‍छरकन मानिम नंजस। एकासे का दाऊदसी दोसर डंडी नू लिख्रकी र'ई, ‘नीन एंग्‍है ख़द्दय, इन्ना ऎन निंग्‍है बंग मंजकादन।’

34धर्मेस येसुसिन केचका ती उज्‍जताचस चॊदस अरा अक्‍कु आस इकला हूँ मल खे'ओस। औंगे धर्मेस एन्ने बाचकादस, ‘ऎन निंगा नेम्‍हा अरा मल ताड़रना आसीस आबोन चि'ओन, एकदा ऎन दाऊदसिन गच्‍छरकन।’

35औंगे आस नन्ना डंडी नू अउरिम ब'अदस, ‘नीन निंग्‍है नेम्‍हा आलासिन कित्ता मल चि'ओय।’

36दाऊदस गा तंग्‍है उज्‍जना ही बेड़ा नू धर्मेसी मने लेक्‍खा नंजस ती केच्‍चस। अरा आसिन तंग्‍है पूरखर हेद्दे मंडियर। अरा आसी मॆद मसड़ा नू कित्तिया।

37लिकिन धर्मेस नॆकन केचका ती उज्‍जताचस चॊदस आसी मॆद मल कित्तिया।

38औंगे भ‍ईरो, नीम बॆस लगे बुझ्र'आ हो'आ का एका कत्‍था निमा तेंगर'आ लगी आद ईद हवे का येसुस ती निम्‍है पाप ही छमा ख़क्‍ख्र'ओ। मूसासी पॆसका निमन निम्‍है पाप गुट्ठी ती अम्‍बता पोल्‍लो।

39लिकिन येसुसिन पत्त'ऊ ओर्मर तम्‍है पाप ती बछर'ओर।

40औंगे चिहुंक र'आ का, एकाद धर्मेसी कत्‍था तिंगुर ती तिंका र'ई आद निम्‍है म‍इय्याँ अम्‍बन बर'आ।

41‘अना निंदा ननू आलारो! ऎरा, अकबक मना अरा खे'आ कला। ऎन गा ओन्‍टा नलखन निम्‍है उल्‍ला गुट्ठी ननोन। ओर्तोस अदही पत्त नू निमन तेंगोस। अन्नु हूँ नीम अदिन मल पत्त'ओर।’”

42बरनबास अरा पौलुस गोड़हा एड़पा ती उरखा लगियर ख़ने, बरना ख़न्न ऎख़्रना उल्‍ला हूँ इबड़ा ही पत्त नू अउरिम तेंगा गे आलर गोहरारर।

43सभा मुंज्रा अदही ख़ॊख़ा नगदे बग्‍गे यहूदीर अरा यहूदी धरम नू बरचका नन-यहूदीर पौलुस अरा बरनबास गने चॊंख़्रर। पौलुस अरा बरनबास आर ही गने कछनख्रर अरा धर्मेसी सोग्‍गे नू बड़ियर र'आ गे आनियर।

44नन्ना ख़न्न ऎख़्रना उल्‍ला नू मलागूटी नगरे ही उर्मी आलर उर्बासी कत्‍थन मेना गे ख़ॊंड़रर।

45एन्ने कोहाँ गोंहड़न ईरियर ती यहूदीर कुटमुटर'आ हेलरर अरा पौलुसी निं‍दा नंजर ती आसी कत्‍था ही बिड़दो नू आनानखर'आ हेलरर।

46पौलुस दरा बरनबास बिगर एल्‍चम बाचर, “ईद चाड़ रहचा का मुन्‍द निमा गे धर्मेसी कत्‍था तेंगना रहचा, लिकिन नीम इदिन मल इंझ्रदर, अरा नीम निमन मुंजा मलका उज्‍जना ख़क्‍खना जॊगे मल बुझुरदर। औंगे ऎम अक्‍कु इदिन नन-यहूदीरिन तेंगदम।

47औंगे उर्बस एमन एन्ने बाचस ती पॆसकादस, ‘ऎन निमन नन-यहूदीर गे बिल्‍ली कमचकादन, एकत्रु निम्‍है ती बछरना ही दौ कत्‍था ख़ॆख़ेल ही ठुट्ठु गूटी बिंड़र'ओ क'ओ।’”

48नन-यहूदीर इदिन मेंजर ख़ने, रिझ्र'आ हेलरर अरा धर्मेसी कत्‍था ही ओहमा नना लगियर। एका बग्‍गे आलर मुंजा मलका गुटी उज्‍जना गे चज्रकाचर, अबड़र दौ कत्‍थन पत्ताचर।

49तहाँ गोट्टा चकभार नू उर्बासी कत्‍था बींड़रा केरा।

50लिकिन यहूदीर जोक्‍क म‍ईन जॊगे धर्मेसी इल्‍चू नन-यहूदी मुक्‍कारिन अरा नगरे ता मुद्धारिन पौलुस अरा बरनबासी बिड़दो इज्‍जताचर ती आरिन सस्ती नंजर। अरा आरिन तम्‍है चक ती बहरी ओथ्रर चिच्‍चर।

51तहाँ आर ही बिड़दो गोवाह चि'आ गे पौलुस दरा बरनबास तम्‍‍है ख़ेड्डे ता रिड़ोन ख़ित्तियर, अरा इकोनियोन नगरे केरर।

52अरा पत्त'ऊ आलर रिझ ती अरा नेम्‍हा बॊलतस नू निन्‍द्रका रहचर।

← Chapter 12 Jump to: Chapter 14 →