Acts 19

Kurukh (पुना गच्छरना NT (BSI))

1एका बेड़ा नू अप्‍पोल्लॊस कोरिन्‍थ नगरे नू रहचस, पौलुस भितरी चक गुट्ठी ती डहरे ऎका लगियस ती इफेसुस अंड़सियस। आस गे असन जोक्‍क पत्त'ऊ आलर ख़क्‍ख्रर।

2पौलुस आरिन मेंजस, “नीम पत्ताचका बेड़ा नू नेम्‍हा बॊलतासिन ख़क्‍खकर का?” अबड़र बाचर, “मला, ऎम गा नेम्‍हा बॊलतस र'अदस एन्ने इकला हूँ मलम मेंजकम।”

3ख़ने पौलुस मेंजस, “अन्ने होले नीम एन्‍देर नॊड़रनन ख़क्‍खकर?” आर किर्तर बाचर, “यॊहन नूड़रत'उसी नॊड़रनन ख़क्‍खकम।”

4पौलुस बाचस, “आस तंग्‍है ती ख़ॊख़ा बर'ऊ येसुसिन पत्त'आ गे आलारिन बाचस ती जियन किर्त'आ गे नॊड़रत'आ लगियस।”

5अबड़र इदिन मेंजर ती उर्बा येसुसी नामे ती नॊड़रर।

6अरा पौलुस आर ही म‍इय्याँ ख़ेक्खा ओक्‍ताचस ख़ने, आर ही म‍इय्याँ नेम्‍हा बॊलतस इत्तियस, अरा आर नन्ना नन्ना भखा कछनख्र'आ हेलरर अरा धर्मेसी कत्‍थन मुन्द तेंगा हेलरर।

7अबड़ा आलर ओर्मर मलागूटी बारा झन रहचर।

8फिन पौलुस तीन महिना गूटी गोड़हा एड़पा काला लगियस ती धर्मेसी राजी ही प‍त्त नू डिड़गर गने यहूदी आलारिन बुझाब'आ लगियस।

9लिकिन जोक्‍क आलर बेड़हा मंजर ती मल मन'आ हेलरर, अरा ई कत्‍था ही प‍त्त नू गोंहड़ा ही मुन्‍दहारे हींड़'आ लगियर। औंगे पौलुस आरिन अम्‍बियस ती पत्त'ऊ आलारिन तंग्‍है गने होच्‍चस। अरा आस तुरान्‍नोसी सिखाब'अना एड़पा नू कालरकी असन उर्मी उल्ला धर्मेसी कत्‍था ही पत्त नू कछनख्र'आ लगियस।

10दुई बछर गूटी एन्नेम मना लगिया। औंगे आसिया देस ता ओर्मा आलर यहूदी अरा नन-यहूदी आलर उर्बासी कत्‍थन मेंजर।

11धर्मेस पौलुस ती अजगुत नलख गुट्ठी नंजस।

12अरा पौलुस ब‍उराचका उरमाल अरा संफी गुट्ठिन रोगियर म‍इय्याँ नना चि'आ लगियर ख़ने, आर ही बेमार कोड़े मना काला लगिया, अरा मलदौ बॊलता गुट्ठी उरखा लगिया।

13लिकिन जोक्‍क यहूदी आलर हूँ पद्दा पद्दा कुद्दनुम मलदौ बॊलता गुट्ठिन आलर ती ओथ्र'आ लगियर। आर मलदौ बॊलता रस्‍सका आलर नू उर्बस येसुसी नामे ती मलदौ बॊलता गुट्ठिन ओथ्र'आ गे चिहुट नंजर। आर ब'आ लगियर, “पौलुस नॆखा पत्त नू तेंगदस आ येसुस ती ऎन निमन आनदन, ‘उरखय कलय’।”

14ओन्‍टा यहूदी मुध नैगस स्‍केवासी सातियों ख़द्दर हूँ एन्नेम नना लगियर।

15उन्‍दुल मलदौ बॊलता आरिन आनाकिर्ताचा, “ऎन येसुसिन अख़'एन, अरा पौलुसिन हूँ अख़'एन, लिकिन नीम एका ओर्तर?”

16मलदौ बॊलता रस्‍सकी रहचा आ आलस आर ही म‍इय्याँ झपारा ती आरिन पखड़ाचा, ख़ने आर लंगड़ा मंजर ती अरा रिहोन बोहोन मंजर ती आ एड़पा ती उरखर बोंगर।

17इफेसुस ता उर्मी र'ऊ आलर यहूदी अरा नन-यहूदी आलर ई हलन मेंजर, ख़ने ओर्मर म‍इय्याँ इल्चका कोरचा केरा, अरा उर्बस येसुसी नामे ही ओहमा मना हेलरा।

18अबड़र ती बग्‍गे आलर नॆ पत्ताचकाचर, आर बरचर ती तम्‍है मलदौ नलख गुट्ठिन परगट रूप नू हुकमारर।

19देवड़ा मदहे ती कैनो आलर तम्‍है पुथी गुट्ठिन ख़ॊंड़चर ती ओर्मर ही मुन्‍दहारे बस्‍सियर। अरा अबड़ा ही दामन लेखतारा ख़ने, पचास हजार चांदी ही सिक्‍का ही दाम रहचा।

20ई लेक्‍खा उर्बासी कत्‍था डिड़गर गने बींड़रनुम अरा बड़ियर मन्नुम केरा।

21इबड़ा ही मंजका ख़ॊख़ा पौलुस मकेदोनिया दरा अख़ाया कुद्दनुम येरुसलॆम काला गे तंग्‍है बॊलता नू ठंनचस। अरा आस बाचस, “असन अंड़सोन ती ऎन रोम राजिन हूँ ऎरोन दिम।”

22आस तंग्‍है ती मुन्‍द तंग्‍है सहाड़ा ननुर ती ऎंड़ आलारिन तीमोथियुस अरा एरस्‍तुसिन मकेदोनिया त‍इय्यस। लिकिन तान जोक्‍क उल्‍ला गूटी आसिया नू रहचस।

23आ बेड़ा नू उर्बासी ई डहरे ही पत्त नू कोड़हे हुलहुली इफेसुस नू चॊचा केरा।

24एकासे का दॆमॆत्रियोस नामे सोनारस अरतेमिस देवी ही मन्‍दिर लेक्‍खा चांदी ही मुर्ती कमत'आ लगियस ती बढ़ाई आलर गे नगदे नलख चि'आ लगियस।

25आस इबड़ारिन अरा ई लेक्‍खा नलख ननू अउर बग्‍गे आलारिन खॊंड़चस ती बाचस, “भ‍ईरो, नीम अख़दर का ई नलख नन्ना नू नमा नगदे नफा मनी।

26लिकिन नीम ऎरदर अरा मेना लगदर का आ पौलुस गा इफेसुस नू लेका मला लिकिन गोट्टा आसिया नू कोड़हे आलारिन बुझाबाचस ती तंग्‍है आकुस नू नंजस, अरा ब'अदस का ख़ेक्खा गुट्ठी ती कमर‍का देंवता गुट्ठी मानिम धर्मे मल्‍दस।

27इत्रु इदही लेका इल्‍चिका मलकी का नम्‍है नलख मुंज्र'ओ क'ओ। लिकिन कोहाँ देवी अरतेमिस ही मन्‍दिर ही मान किर्रिमबि'ओ, अरा अरतेमिस देवी ही महबा हूँ मुंज्र'ओ क'ओ एकदा गोट्टा आसिया अरा ख़ॆख़ेल नू मन‍'ई।”

28आर इदन मेंजर ती खींस ती निन्‍दियर केरर अरा चिच्चि‍यार'आ हेलरर, “इफेसुस ता अरतेमिस देवी कोहाँ हवे।”

29अरा सौंसे नगरे नू हुलहुली मंजा केरा। आर पौलुस गने डहरे ऎकना नू संगे मंजका मकेदोनिया ता आलर गायोस अरा अरिस्‍तरख़ोसिन धरचर ती अखड़ा टोंका नू बोंगर।

30पौलुस आ सभा नू काला बेद्दा लगियस, लिकिन पत्त'ऊ आलर आसिन काला मल चिच्‍चर।

31अरा आसिया ता जोक्‍क मुद्धर पौलुसी सखी रहचर। आर हूँ खभर त‍इय्यर अरा गोहरारर का आस अखड़ा टोंका नू अम्‍बोस काला।

32सभा नू काँव काँव मना लगिया। जोक्‍क आलर ओन्‍टा कत्‍थन चिच्चि‍यारर, जोक्‍क आलर नन्ना कत्‍थन चिच्चि‍यारर। अरा बग्‍गे आलर गा इदिन हूँ बल्‍ला लगियर का आर एन्‍देर गे इसन ख़ॊंड़रका र'अनर।

33ख़ने जोक्‍क यहूदी आलर अलेक्‍सन्द्रसिन गोंहड़ा ही मुन्‍दहारे तुक्‍कियर ती तिंगियर का एन्‍देर ब'अना र'ई। अलेक्‍सन्द्रस ख़ेक्खा चॊदस ती कलेकसे र'आ बाचस का आस अइय्या ता दसा आबोन आलारिन बुझाब'आ ओंगोस।

34लिकिन गोंहड़ा आसिन चिन्‍हचा का आस यहूदी आलस, ख़ने आलर दुई घंटा गूटी चिच्चि‍यार'आ लगियर, “इफेसुस ता अरतेमिस देवी कोहाँ हवे।”

35तहाँ नगरे ता अक्‍स'ऊ आलस गोंहड़ा आबोन कलेकसे नंजस ती बाचस, “इफेसुस नगरे ता आलारो, ओर्मर अख़दर का इफेसुस नगरे कोहाँ देवी अरतेमिस ही मन्‍दिर आबोन उइय्का नगरे हवे, अरा अदही मूर्ती मेर्ख़ा ती खत्रका हवे।

36ई कत्‍था गा कत्‍था बरता नन्ना ही कत्था मल्‍ली। औंगे नीम कलेकसे र'अरकी बिगर सोच'अम एन्‍देर हूँ मल नन्ना र'ई।

37नीम इबड़ा आलारिन धरचकर ती ओन्‍द्रका र'अदर, आर मन्‍दिर ती एन्‍द्रा हूँ मल्‍ला बचका, अरा नम्‍है देवी ही बिड़दो नू मल बाचका र'अनर।

38दॆमॆत्रियोस अरा आसी बढ़‍ई आलर गे नॆख'आ ही बिड़दो नू इन्द्रिइम ब'अना र'ई होले, आर अदालत नू अरा नेंव‍ई ननुर हेद्दे काना र'ई। असन आर अपन ती नन्नर गने नग्‍गानखर'आ ओंग्दर।

39लिकिन नीम एन्नेम अउर इन्द्रिइम कत्‍था ही पत्त नू ब'आ बेद्ददर होले, अदही फसला नगरे ही पंचायत नू ननो चि'ओ।

40एन्‍देरगेका इन्ना ता हुलहुली चड्डे नम्‍है म‍इय्याँ रोमी राजी चलाब'उर ती बदी मना उंगी। एन्‍देरगेका नाम ई हुलहुली ही एन्‍देर चड्डे हूँ तेंगा पोल्‍लोत।”

41अरा एन्ने बाचस ती आस गोंहड़ा आबोन बिदा नंजस चिच्‍चस।

← Chapter 18 Jump to: Chapter 20 →