Acts 3

Kurukh (पुना गच्छरना NT (BSI))

← Chapter 2 Jump to: Chapter 4 →

1पतरस अरा यॊहनस ओनबीड़ी तीन बजे बिन्‍ती ही बेड़ा नू धर्मेसी मन्दिर कालालियर।

2अरा आलर ओर्त आलासिन चेड़'अरकी बर'आलियर। आस कुन्‍द्रका तिम लेंगड़ा रहचस। आर आसिन उर्मी उल्‍ला ओन्‍द्र'आ लगियर ती सुन्‍दर बारना धर्मेसी मन्दिर ही बखड़े बली गुसन ओक्‍त'आ लगियर का आस मन्‍दिर कालू आलर गुसते तेम्‍बोस।

3आस पतरस अरा यॊहनसिन धर्मेसी मन्दिर कोरना ईरियस ती आर ही गुसले तिम्‍बियस।

4पतरस अरा यॊहनस आसिन थिथावाँ ईरियर, अरा पतरस बाचस, “एम्‍है तरा ऎरा!”

5ख़ने आस आर ही गुसले इन्द्रिइम ख़क्‍खना ही असरा ती आर ही तरा ऎरा हेलरस।

6लिकिन पतरस आसिन बाचस, “सोना अरा चाँदी गा एंग्‍‍है गुसन मल्‍ला, लिकिन एंग्‍‍है गुसन एन्‍द्रा र'ई, अदिन निंगा चि'अदन। नासरेत ता येसु मसीसी नामे ती चो'आ अरा कुद्दा नुंगा।”

7अरा पतरस आसी तीना ख़ेक्खन धरचस ती चॊदस। आ बारिम लेंगड़ासी ख़ेड्डे अरा मूका गुट्ठी नू पैया बरचा केरा।

8अरा आस उदकारस ती इज्‍जस ती कुद्दा नुंगा हेलरस। अरा आस ईकनुम अरा उदकारनुम अरा धर्मेसी ओहमा नन्नुम आर ही गने धर्मेसी मन्दिर ही चाली नू कोरचस।

9उर्मी आलर आसी कुद्दना नुंगना अरा धर्मेसी ओहमा नन्नन ईरियर।

10आलर आसिन चिन्‍हचर का ईस गा धर्मेसी मन्दिर ही सुन्‍दर बखड़े बली गुसन ओक्‍करकी तेम्‍बालियस। आसी गने एन्‍देर मंजा अदिन आर ईरियर ती अकबकरर ती हैकटरर केरर।

11आ लेंगड़ा आलस पतरस अरा यॊहनसिन नगदे बजर धरचका ती आर गने रहचस ख़ने, उर्मी आलर अकबक मंजर ती सालोमॊन नामे पिन्‍डा तरा आर ही गुसन बोंग बरचर।

12पतरस इदन ईरियस ती आरिन बाचस, “इस्राऎल आलारो! नीम इदही पत्त नू एन्‍देरगे अकबक मन्‍दर? ऎम एम्‍है सवंग ती मलता एम्‍है भगती ती ई आलासिन ऎकना कुद्दना जॊगे कमचकादम ब'अरकी नीम एम्‍है तरा एन्‍देरगे एन्ने ऎरा लगदर?

13अब्राहम अरा इसाक अरा याकॊबसी धर्मेस, नम्‍है पूरखर ही धर्मेस तंग्‍है जॊंख़स येसुसिन महबा नंजस। नीम आसिन पिलातुस गे सोंपचकर, अरा पिलातुस आसिन अम्‍बा बिद्दियस ख़ने, नीम आसिन ताड़चकर।

14नीम नेम्‍हा अरा उजगो आलासिन मल हुकमारकर, अरा आल पिटका आलासिन अम्‍बा गे आनकर।

15अरा नीम उज्‍जना ही अक्‍स'उसिन पिटकर, अरा आसिन धर्मेस केचका ती उज्‍जना चॊदस, अरा इबड़ा कत्‍था ही ऎम गोवाह र'अदम।

16अरा आ येसु मसीस मइय्याँ ता पत्त'अना ती अरा आसी नामे तिम ई आलस पैया ख़क्खियस, नॆकन नीम अख़दर अरा ऎरदर। अरा येसुसी म‍इय्याँ ता पत्त'अना आद दिम नीम ओर्मर ही मुन्‍दहारे ईसिन दौ गने कोड़े नंजकी र'ई।

17भ‍ईरो! ऎन अख़दन का नीम अरा निम्‍है मुद्धर तम्‍है बल्‍लना ती इदिन येसुस गे नंजर।

18लिकिन धर्मेस मुन्‍द तिम तंग्‍है कत्‍था तिंगुर ती ‘मसीस गे दुक्खे चॊदना र'ई’ एन्ने बाचका लेक्‍खा अदिन पूरा नंजस।

19औंगे नीम जियन किर्त'आ, होले धर्मेस निम्‍है उर्मी पापन छमा ननोस।

20तहाँ ख़न्न ऎख़्रना ही बेड़ा उर्बा धर्मेसी मुन्‍दहारे ती बर'ओ। अरा आस येसुसिन त‍इय्‍योस, नॆकन आस मुन्‍द तिम निमा गे मसी कमचकादस।

21येसुस मेर्ख़ा नू र'आ गे चाड़ र'ई, एका गूटी धर्मेस उर्मी जिनिस गुट्ठिन पुना कम'ओस। एकदन धर्मेस चिरान नू तंग्‍है कत्‍था तिंगुर ती बाचकाचस।

22मूसस बाचस, ‘उर्बस निम्‍है धर्मेस एंग्‍है लेक्‍खा ओन्‍टा धर्मेसी कत्‍था तिंगुसिन निम्‍है आलर ती निमा गे चॊद'ओस। आस निमन एन्‍देर एन्‍देर ब'ओस अबड़ा उर्मिन चिहुंक ती मेनके।

23एकास आ धर्मेसी कत्‍था तिंगुसी कत्‍थन मल मेनोस, आस आलर मझी ती नठार'ओस कालोस।’

24उर्मी धर्मेसी कत्‍था तिंगुर सामुऎल ती ख़ॊख़ा गूटी ती बरचका धर्मेसी कत्‍था तिंगुर ओर्मर इबड़ा उल्‍ला ही पत्त नू तिंकाचर।

25नीम अबड़ा धर्मेसी कत्‍था तिंगुर ही जंईपुंई र'अदर। अरा नीम धर्मेस निम्‍है पूरखर गने नंजका गच्‍छरकन ख़क्‍खकर। आस निम्‍है बंगस अब्राहमसिन बाचस, ‘निंग्है बनस गुट्ठी ती गोट्टा ख़ॆख़ेल ता आलर बरकत ख़क्‍खोर।’

26धर्मेस निमन ओर्मारिन निम्‍है मलदौ नलख ती किर्त'आ गे अरा बरकत नना गे आस तंग्‍है जॊंख़स येसुसिन इजताचस ती निम्‍है गुसन मुन्‍द त‍इय्यस।”

← Chapter 2 Jump to: Chapter 4 →