Luke 10

Kurukh (पुना गच्छरना NT (BSI))

1इबड़ा कत्था ही ख़ॊख़ा उर्बस बहत्तर अउर आलारिन चज्‍जियस अरा दुई दुई झन नंजस ती उर्मी पद्दा अरा अड्डा नू एक्सन तान कालू रहचस असन तंग्है ती मुन्‍द त‍इय्यस।

2आस आरिन बाचस, “ख़ोयना गा बग्‍गे र'ई, लिकिन बनीहार जुक्‍किम र'अनर, इदगे तंग्‍है ख़ोयना गे बनीहार आलारिन त‍इय्या गे ख़ोयना ही उर्बासिन गोहरार'आ।

3कला, ऎन निमन भेंडो ख़द्द लेक्‍खा भुसुड़ ही मझी नू त‍इय्‍दन।

4ढिबा अरा इन्द्रिइम जिनिस हो'अना ही झोला अरा खरपा अमके हो'आ, अरा डहरे नू नॆकन हूँ मोंजरा ननरकी बेड़न अमके नठाब'आ।

5एका एड़पा नू कोर'ओर मुन्‍द ब'आ का ‘ई एड़पा नू धर्मेसी सान्‍ति मनन नेक‍अन।’

6असन नीक‍इम सान्ति ख़क्‍खना जॊगे र'अनर होले आर मइय्याँ निम्है सान्ति ओकर'ओ मला होले निम्है गुसन किर्रो बर'ओ।

7अरा आ एड़पा नुम र'अके, अरा आर एन्‍द्रा चि'ओर अदिनिम ओनके मॊख़के। इदगे का बनीहार गे तंग्‍है बनी ख़क्ख्रना र'ई। एड़पा एड़पा अमके काला।

8एका पद्दा नू कोर'ओर अरा आलर निमन परघ'ओर होले आर इन्द्रिइम ओना मॊख़ा गे चि'ओर अदिन ओनके मॊख़के।

9अरा अइय्या ता बेमरहारिन कोड़े ननके अरा आरिन ब'अके, ‘धर्मेस आलर ही उज्‍जना नू राजी नन्ना ही बेड़ा निम्‍है हेद्दे अंड़सकी र'ई।’

10एक‍अम पद्दा नू नीम कोर'ओर अरा अइय्या ता आलर निमन मल परघ'ओर होले गली गुट्ठी नू कालके ती ब'अके,

11‘एम्‍है ख़ेड्डे नू लक्‍का निम्‍है पद्दा ता रीड़ोन हूँ ऎम निम्‍है बिड़दो नू गोवाह रूपे नू ख़ेत्तदम। लिकिन इदन हूँ अख़'आ का धर्मेस आलर ही उज्‍जना नू राजी नन्ना ही बेड़ा हेद्दे अंड़सकी र'ई।’

12ऎन निमन ब'अदन का रायबड़ी उल्‍ला नू सोदोम नगरे ता आलर ही ख़क्‍खका दंडे ती ई नगरे ता आलर ही ख़क्‍खना दंडे बग्‍गे मलदौ मनो।

13ओहरे निमा ख़ोराजिन नगरे ता आलारो, ओहरे निमा बॆतसैदा नगरे ता आलारो। एका सवंग ही नलख निम्‍है नू मंजकी र'ई, अबड़ा तुरोस दरा सीदॊन नगरे नू मंजकी रहचा होले, आ उल्‍लम अइय्या ता आलर तमन सन्नी ऎद'आ गे बोरन झपर'अरकी अरा चिन्‍द नू ओक्‍करकी जियन किर्ताचका र'ओर दने।

14औंगे रायबड़ी उल्‍ला नू तुरोस दरा सीदॊन नगरे ही दंडे ती निम्‍है दंडे बग्‍गे मलदौ मनो।

15अरा अना कफरनहूम नगरे ता आलारो, नीम मेर्ख़ा म‍इय्याँ चॊदतार'ओर कालोर का? मला, नीम गा ख़ोड़ख़ा चिच्‍ची गड्डी नू टिड़तार'ओर कालोर।

16एका ओर्तस निम्‍हैन मेन्‍दस आस एंग्‍हैन मेन्‍दस। अरा एका ओर्तस निमन ख़ाँड़दस आस एंगन ख़ाँड़दस। अरा एका ओर्तस एंगन ख़ाँड़दस आस एंग्‍है त‍इय्‍कासिन ख़ाँड़दस।”

17अबड़ा बहत्तर आलर खुसमारनुम किर्रियर अरा ब'आ हेलरर, “अना उर्बायो, निंग्‍है नामे ती नाद गुट्ठी हूँ एमन पॆस्र'ई।”

18येसुस आरिन बाचस, “ऎन सैतान आबोन बिल्‍चत'अना लेक्‍खा मेर्ख़ा ती खत्तरनन ईरकन।

19ऎरा! निमन ऎन मलदौ बॊलता लेक्‍खा नेर्रे गुट्ठिन दरा बिछी गुट्ठिन तिरख़ा गे अरा बैरी सैतान ही उर्मी सवंग ही म‍इय्याँ सवंग चिच्कादन, अरा निमा इन्द्रिइम आलॊ ती एन्‍देर हूँ मल मनो।

20लिकिन मलदौ बॊलता गुट्ठी एमन पत्त'ई ब'अके ती लेका अमके खुसमार'आ, इदगे हूँ खुसमार'आ का निम्‍है नामे मेर्ख़ा नू लिख्रकी र'ई।”

21आ बारिम येसुस नेम्‍हा बॊलतस नू खुसमारस ती बाचस, “अना बबा होय! मेर्ख़ा दरा ख़ॆख़ेल ही उर्बायो! ऎन निंगन महबा नन्‍दन का नीन इबड़ा कत्‍था गुट्ठिन अख़'उर अरा लूरगर आलर लेक्‍खा तमन सोचनर आर ती नुड्डकादय, अरा लुदऊ लेक्‍खा ई सन्नी ख़द्दर गे ऎदकय। हाँ, अना बंग, निंगा ईदिम बॆस लग्‍गिया।

22एम्‍बस एंगा गे उर्मी लूर अरा सवंगन सोंपचकादस। अरा नॆ हूँ बलनर का ऎन नॆ हिकदन एम्‍बस लेका अख़दस। अरा बंगस एकास अदिन नॆ हूँ बलनर ऎन लेका अख़दन, अरा ऎन नॆकन नॆकन बंगासिन ऎद'आ बेद्ददन आर अख़'ओर।”

23ख़ने येसुस चेलर तरा पछली किर्रियस ती उछिन्‍त नू बाचस, “नीम एकाबड़न ऎरदर अदिन ईरू आलस आसीस ख़क्‍खू र'अदस।

24ऎन गा निमन ब'अदन का नगदे धर्मेसी कत्‍था तिंगुर अरा बॆलर हूँ एका कत्‍थन नीम ऎरदर अदिन ऎरा बिद्दियर लिकिन मल ईरियर, अरा एका कत्‍थन नीम मेन्‍दर अदिन मेना बिद्दियर लिकिन मल मेंजर।”

25तहाँ ओर्त नॆग सिखाब'उस चॊचस ती येसुसिन बिढ़'आ गे आसिन मेंजस, “अना गुरु, जनमजुग उज्‍जना ख़क्‍खा गे एंगा एन्‍देर नन्‍ना र'ई।”

26येसुस आसिन बाचस, “मूसासी पॆसका नू एन्‍द्रा लिख्रकी र'ई, अन्नु नीन एन्‍देर पढ़दय?”

27आस आनाकिर्ताचस, “नीन निंग्‍है धर्मे उर्बासिन निंग्‍है उर्मी जिया गने अरा निंग्‍है उर्मी बॊलता गने अरा निंग्‍है उर्मी लूर गने अरा निंग्‍है उर्मी सवंग गने चोन्‍हा नना। अरा नीन निंगन एकासे चोन्‍हा नन्‍दय अन्ने नन्नारिन हूँ चोन्‍हा नना।”

28येसुस आसिन बाचस, “नीन ठौकम तिंकय, एन्नेम नना, होले नीन उज्‍जोय।”

29लिकिन आस तंगन उजगो ऎद'आ गे येसुसिन मेंजस, “होले एंग्‍है अरबर-परबर एका ओर्तर?”

30येसुस आनाकिर्ताचस, “ओन्‍टा आलस येरुसलॆम ती येरिहॊ कालियस। आसिन डाकुर छेकचर ती आसी किचरी गुट्ठिन चड्डर अरा आसिन लौचर ती दरमरा अम्‍बियर।

31अरा एन्ने मंजा का आ डहरे नू ओन्टा नैगस कालालियस। तहाँ आस आसिन ईरियस ती छेरन्‍डारस ती कट्टियस केरस।

32एन्नेम लेवी गोतर ता ओन्टा आलस हूँ आ डहरे नू केरस अरा आस हूँ आसिन ईरियस ती छेरन्‍डारस ती केरस।

33तहाँ ओन्‍टा डहरे ईकू समारिया ता आलस आ अड्डा नू बरचस ती आसिन ईरियस दरा आसिन सोग्‍गे ईरियस।

34अरा आसी गुसन केरस ती आसी खादी गुट्ठी नू इसुंग अरा अंगुर रासी तुन्‍दियस ती पट्‍टी हॆंचस अरा आसिन तंग्‍है गदहा नू लच्‍चस ती डेरा एड़पा नू होच्‍चस अरा आसिन सुसराचस।

35दोसर उल्‍ला आस ऎनोटा दॆनारी ओथ्रस ती डेरा एड़पा ही उर्बस गे चिच्‍चस, अरा बाचस, ‘ईसिन सुसर'आ अरा इदिन ती बग्‍गे निंग्‍है लग्‍गो होले अदिन ऎन किर्रो बारी निंगा चि'ओन।’

36अक्‍कुन नीन एन्‍देर बुझ्रदय, डाकुर ही ख़ेक्खा नू खत्रका आलस गे अरबर-परबर लेक्‍खा ई तीन आलर ती नॆ नलख नंजर?”

37नॆग सिखाब'उस बाचस, “नॆ आसिन सोग्‍गे ईरियस आसिम हिकदस।” ख़ने येसुस आसिन बाचस, “कला नीन हूँ एन्नेम ननके।”

38तहाँ आर कानुम कानुम येसुस ओन्‍टा पद्दा नू कोरचस। अरा मारथा नामे ओर्त आली येसुसिन तंग्‍है एड़पा नू परघाचा।

39अदही मरियम ना‍मे ही ओन्‍टा तंग्ड़ी रहचा। आद उर्बासी ख़ेड्डे गुसन उक्‍किया ती आसी सिखाब'अनन मेनालिया।

40लिकिन मारथा नगदे तेतर-सुसर नन्ना नू हिलरिकीचा। अरा आद आसी गुसन बरचा ती बाचा, “अना उर्बायो, एन्‍देर नीन मल ऎरदय का इंग्ड़ी एंगन ओर्ते लेका सुसर'आ गे अम्‍बिया चिच्‍चा? अदिन एंगन संगरा गे आना।”

41लिकिन उर्बस अदिन आनाकिर्ताचस, “अनय मारथा, मारथा, नीन बग्‍गे कत्‍था ही तिहा ती कैरारकी र'अदी।

42लिकिन ओन्‍टा कत्‍था चाड़ र'ई। मरियम गा धर्मेसी कत्‍थन मेन्ना ही आ बॆस बटा आबोन चज्‍जकी र'ई, अदिन अदही गुसते पोल्‍लोर बच्‍चा।”

← Chapter 9 Jump to: Chapter 11 →