Luke 4

Kurukh (पुना गच्छरना NT (BSI))

1फिन येसुस नेम्हा बॊलतासी सवंग नू मनरकी यरदन ख़ाड़ ती किर्रियस। बॊलता आसिन टोड़ंग नू काला गे कड़हाबाचा।

2अइय्या चालीस उल्‍ला गूटी नाद आसिन बिढ़'आलिया। अबड़ा उल्‍ला नू आस नीदी कूल रहचस। अरा अबड़ा उल्‍ला पूरचा ख़ने आस गे कीड़ा लग्‍गिया।

3ख़ने नाद येसुसिन बाचा, “नीन धर्मेसी ख़द्दय होले, ई पखनन ब'आ का ईद ओन्ना-मॊख़ना मनो क'ओ।”

4येसुस आनाकिर्ताचस, “मला, एन्‍देरगेका नेम्हा पुथी नू लिख्रकी र'ई, ‘आलस ओन्ना-मॊख़ना ती लेका मल उज्‍जोस।’”

5तहाँ नाद आसिन मेच्‍छा अड्डा नू कड़हाबाचा अरा आसिन इकिम घड़ी नू ख़ॆख़ेल ता सौंसे राजी गुट्ठिन ऎदा,

6अरा आसिन बाचा, “ऎन इबड़ा ही उर्मी आकुस अरा इबड़ा ही ओहमा निंगा गे चि'ओन। इबड़ा गा एंगा गे सोंपरकी किरकी र'ई, अरा ऎन इदन नॆका चि'आ तुक्‍की आस गे चि'आ ओंग्‍दन।

7औंगे नीन एंगन ऒड़ लग्‍गोय होले, इबड़ा जम्मा निंगा चि'ओन।”

8येसुस किर्त'अर बाचस, “मला, एन्‍देरगेका नेम्हा पुथी नू लिख्रकी र'ई ‘नीन निंग्‍है धर्मे उर्बासिन ऒड़ लग्‍गा, अरा आसी लेका महबा नना।’”

9तहाँ नाद आसिन येरुसलॆम नगरे कड़हाबाचा ती धर्मेसी मन्दिर ही अग्‍गी नू इजताचा, अरा बाचा, “नीन धर्मेसी ख़द्दय होले, नीन डेग'आ चि'आ।

10नेम्हा पुथी नू गा लिख्रकी र'ई, ‘आस निंग्‍है पत्त नू तंग्‍है पैकारिन आनोस का आर निंगन ख़ापोर अरा बछाब'ओर।

11अरा आर निंगन ख़ेक्खच ख़ेक्खा हथल'ओर हो'ओर, होले एन्ने अम्‍बो मना का निंग्‍है ख़ेड्डेन पखना लग्‍गो।’”

12येसुस अदिन किर्त'अर बाचस, “मला, एन्‍देरगेका नेम्हा पुथी नू एन्ने हूँ लिख्रकी र'ई, ‘नीन निंग्‍है धर्मे उर्बासिन अमा बिढ़'आ।’”

13एकाबारी नाद तंग्है उर्मी बिढ़नन मुंजिया ती नन्ना मोका ख़क्‍खना गूटी आसी गुसते किर्रिम बिच्चिया।

14फिन येसुस नेम्‍हा बॊलतासी सवंग ख़क्‍ख्रकी गलिलेया जिला नू किर्रयस। आसी पत्त ता कत्‍था अड्डे-बेड्डे ता उर्मी चकभार नू बींड़रा केरा।

15आस यहूदीर ही गोड़हा एड़पा गुट्ठी नू सिखाब'आ हेलरस, अरा ओर्मर आसी ओहमा ननालियर।

16फिन आस नासरेत नू बरचस, एसन आस पॊसरका परदका रहचस। अरा तंग्‍है चाल ही लेक्‍खा यहूदी ख़न्न ऎख़ना उल्‍ला नू यहूदीर ही गोड़हा एड़पा केरस। असन आस धर्मेसी पुथिन पढ़'आ गे इज्‍जस।

17आस गे धर्मेसी कत्‍था तिंगुस यसायासी पुथी चितारा, अरा आस पुथिन चलख़'अरकी आ अड्डन ख़क्‍खियस ती पढ़चस एसन एन्ने लिख्रकी रहचा:

18“उर्बासी बॊलता एंग्‍है म‍इय्याँ र'ई, इदगे का आस एंगन कीड़र गे दौ कत्‍था मेन्‍त'आ गे चज्जिकादस। अरा आस एंगन हॆंरकारिन बछरनन तेंगा गे, अरा अन्‍धारिन ऎरत'आ गे, अरा ओर्मा तिरख़रकारिन छोड़ाब'आ गे,

19अरा उर्बासी मया आर ही म‍इय्याँ र'ऊ चान ही पत्त नू तेंगा गे त‍इय्‍का र'अदस।”

20तहाँ आस पुथिन डबचस ती जॊंख़ासी ख़ेक्खा नू चिच्‍चस अरा आलारिन सिखाब'आ गे उक्‍कियस। अरा गोड़हा एड़पा ता ओर्मा आलर आसिन ऎरते रहिकेरर।

21तहाँ आस आरिन ब'आ हेलरस, “नीम अक्‍कु एंग्‍है ती पढ़चकन मेंजकर, आद एंग्‍है ती इन्नम पुरचकी र'ई।”

22ओर्मर आसिन सहरारर, अरा एका मया ही कत्‍था गुट्ठी आसी ब‍ई ती उरखालिया, अत्रु ती अकबक मंजर। लिकिन फिन ब'आ हेलरर, “ईस यॊसॆफसी तंग्‍दस मलदस का?”

23तहाँ आस आरिन बाचस, “नीम एंग्‍है म‍इय्याँ ई हना ब'ओर दिम का ‘बैधायो, नीन निंगन कोड़े नना,’ ई कत्‍था ही मने नीम एन्ने मन'ओर का, ‘एन्‍देर एन्‍देर ऎम मेंजकादम का हैकट नलख कफरनहूम नू नीन नंजकय, अदिन इसन हूँ नना।’”

24अउरिम आस बाचस, “ऎन निमन ओन्‍टा मानिम कत्‍थन ब'अदन का ‘एकअम धर्मेसी कत्‍था तिंगुस तंग्‍है पॊसरका परदका अड्डा नू मान मरजात मल ख़क्‍खदस।’

25लिकिन ऎन अउरिम ओन्‍टा मानिम कत्‍था ब'अदन का धर्मेसी कत्‍था तिंगू एलियसी बेड़ा नू इस्राऎल नू बग्‍गे रड़ियाहीर रहचर, इकला साढ़े तीन बछर गूटी चॆप मल पुंईयाँ, ख़ने गोट्टा राजी नू कोहाँ अकाल मंजा।

26लिकिन एलियस संगरा ख़क्‍खा गे अबड़र ती नॆखा गुसन हूँ मल त‍इय्‍रस। सीदॊन राजी नू सारेपत नगरे ता ओन्‍टा नन-यहूदी रड़ियाही गुसन लेका त‍इय्‍रस।

27अरा धर्मेसी कत्‍था तिंगू एलिसासी बेड़ा नू इस्राऎल नू नगदे खसरा रोगियर रहचर, लिकिन सीरिया राजी ता ओन्‍टा नन-यहूदी नामानसिन अम्‍बर नॆ हूँ कोड़े मल मन्‍तारर।”

28गोड़हा एड़पा नू रहचर अबड़ा ओर्मर येसुसी ई कत्थन मेंजर ख़ने, आर खींस मंजर केरर।

29अरा आर चॊच उक्‍कियर ती आसिन नगरे ती बहरी ओथ्रर। अरा आसिन तम्‍है ओक्‍करका नगरे ता परता ही टुंगरी म‍इय्याँ अरगाचर। एन्‍देरगेका आसिन आर म‍इतले किइय्या तुक्‍का गे सोच्‍चर।

30लिकिन आस आर ही मझी ती बुचड़ारस ती किर्रिम बिच्चियस।

31तहाँ येसुस गलिलेया जिला ही कफरनहूम नगरे नू केरस। अरा ख़न्न ऎख़ना उल्‍ला नू आलारिन सिखाब'आलियस।

32अरा आसी सिखाब'अना ती आर अनचकरर केरर। एन्‍देरगेका आस आकुस गने ब'आ लगियस।

33अरा असन गोड़हा एड़पा नू मलदौ बॊलता ती धरचका ओन्टा आलस रहचस। अरा आस जॊरसरिया चिच्चि‍यारस।

34“अना नासरेत ता येसु, निंगा एम्है गने एन्‍देर नलख र'ई, अमा थोकबोकामब'आ, नीन एमन नास नना गे बरचकादय का? ऎन निंगन अख़दन नीन नॆ तंग्‍है, नीन धर्मेसी नेम्‍हा आलय।”

35येसुस अदिन केप्‍पस ती आनियस, “कलेकले र'अय, अरा ई आलस ती उरखय कलय।” ख़ने मलदौ बॊलता आसिन आर ही मझी नू कचड़'अरकी आसिन बिगर बगड़'अर आसी म‍इतले उरखा केरा।

36ख़ने इबड़ा जम्मर गे अकबक मंजा, अरा आर ताम ताम कछनख्र'आ लगियर, “ईद कोड़हे बॆस कत्‍था हिके! तंग्‍है आकुस अरा सवंग ती ईस मलदौ बॊलता गुट्ठिन पॆसदस, अरा अबड़ा हूँ उरखी क'ई।”

37अरा येसुसी पत्त ता कत्‍था आ चकभार नू ओनबेंड़र'आ उर्मी अड्डा नू मना हेलरा।

38येसुस गोड़हा एड़पा ती चॊचस ती सिमॊनसी एड़पा कोरचस। असन सिमॊनसी तंग्‍सास गे नगदे नाड़ी रहचा। अरा अबड़र अदिन कोड़े नना गे आस ती गोहरारर।

39आस अदही हेद्दे इज्‍जस ती नाड़िन केप्‍पस अरा नाड़ी तम्मिया केरा। अरा आद लॆम चॊचा ती आर ही तेतर-सुसर नना हेलरा।

40बीड़ी पुतबारी अबड़ा आलर नॆ नॆ कैनो मदहे बेमार ती लिंडरका रहचर आर जम्मारिन आसी गुसन ओन्‍द्रर। अरा आस ओरोत ओरोत म‍इय्याँ ख़ेक्खा उइय्यस ती कोड़े नंजस।

41अरा नाद गुट्ठी हूँ चिच्चियारनुम नगदे आलर ती उरखा केरा अरा ब'आलिया का “नीन धर्मेसी ख़द्दय हिकदय”। लिकिन आस अबड़न केबालियस अरा तंग्‍है पत्त नू ब'आ मल चिच्‍चस। एन्‍देरगेका अबड़ा आसिन अख़'आलिया का आस मसी हिकदस।

42बिज्‍जया ख़ने आस उरखस ती ओन्‍टा उछिन्‍द अड्डा नू बिन्‍ती नना गे केरस। अरा गोंहड़ा आसिन बिद्दनुम बरचा। अरा आसिन ख़क्‍खिया ख़ने अबड़र आसिन छेंकेच ईरियर का आस आर ही गुसते अम्‍बोस काला।

43लिकिन आस आरिन बाचस, “एंगा नन्ना नगरे नू हूँ धर्मेसी राजी ही दौ कत्‍था मेन्‍त'अना र'ई। एन्‍देरगेका ऎन इदगेम त‍इरकादन।”

44अरा आस यूदेया ही गोड़हा एड़पा गुट्ठी नू दौ कत्‍था मेन्त'आ लगियस।

← Chapter 3 Jump to: Chapter 5 →