Luke 8

Kurukh (पुना गच्छरना NT (BSI))

1इदही ख़ॊख़ा येसुस नगरे नगरे अरा पद्दा पद्दा कुद्दनुम धर्मेसी राजी ही दौ कत्‍था मेन्‍त'आनुम कुद्दा लगियस। अरा अबड़ा बारो चेलर आसी गने रहचर।

2अरा जोक्‍क मुक्‍कर हूँ आर ही गने रहचर। इबड़र मलदौ बॊलता अरा रोगे ती कोड़े मंतारका रहचर। अन्नु ती मरियम एकदा ही नामे मगदलेनी बारा अदही ती सात गोटंग मलदौ बॊलतन येसुस ओथ्रकाचस।

3अरा हॆरॊदॆसी भंडारी ख़ूसासी तंग्‍आली यॊअन्ना अरा सूसन्ना अरा बग्गे नन्‍ना मुक्‍कर हूँ रहचर। ईर तम्‍है खुर्जी ती येसुस अरा आसी चेलर गे संगरा नना लगियर।

4कोहाँ गोंहड़ा ख़ॊंड़रा अरा नगरे नगरे ता आलर येसुस हेद्दे बरते र'आ लगियर। आस जोक्‍खा ख़ीरी ती बाचस।

5“ओन्‍टा चाँख़'उस चाँख़'आ उरखस। चाँख़'ओ बारी जोक्को बिहनी डहरे नू खत्तरा, अरा तिर्ख़रा नाब्रा, अरा ऒड़ा अदिन पेत्ता मोक्‍खा।

6जोक्को पखनोरी ख़ॆख़ेल नू खत्तरा, लिकिन कुन्‍दिया अरा हल्‍ले मल ख़क्‍खिया ख़ने ख़इय्या केरा।

7जोक्को बिहनी अच्‍च-ख़ोप्‍पा नू खत्तरा, अरा ख़ोप्‍पा लट्टी गने पर्दिया ती अदिन अर्बिया चिच्‍चा।

8जोक्को बिहनी दौ ख़ॆख़ेल नू खत्तरा, अरा कुन्‍दिया ती सौ गुना ख़ंजा।” एन्ने बाचस ती आस जॊरसरिया बाचस, “नॆका मेना गे मने र'ई, आस मेन्‍दस ती बुझ्रना र'ई।”

9आसी चेलर आसिन मेंजर ई जोक्‍खा ख़ीरी ही माने एन्‍देर हिके?

10आस बाचस, “निमा धर्मेसी राजी ही नूख्रका कत्‍था आबोन बुझ्र'आ गे चीरकी र'ई, लिकिन नन्‍नर गे जोक्‍खा ख़ीरी ती तेंग्र'ई। ईगेका, नेम्हा पुथी नू एन्ने लिक्‍खरकी र'ई, ‘ऎन नन्‍दन अदिन ऎरदर लिकिन अत्रु ती एन्‍द्रा हूँ मल सिख्र'ओर, ऎन ब'अदन अदिन मेन्‍दर लिकिन अदही माने मल बुझुर'ओर।’

11ई जोक्‍खा ख़ीरी ही माने ईद हवे। बिहनी धर्मेसी कत्‍था हवे।

12जोक्‍क आलर बिहनी खत्रका डहरे लेक्‍खा हिकनर। आर कत्‍थन मेन्नर लिकिन सैतान बर'अरकी आर ही जिया ती आ कत्‍थन पिसी हु'ई। औंगे आर अदन मल पत्त'ओर ती अम्‍बोर नाड़र'आ।

13जोक्‍क आलर बिहनी खत्रका पखनोरी ख़ॆख़ेल लेक्‍खा हिकनर। आर कत्‍थन मेन्नर ती रिझ्रनुम इंझ्रनर। लिकिन आर तम्‍है जिया नू गड्डी गूटी कत्‍था मल खुपना चड्डे आर जुक्‍किम उल्‍ला गे कत्‍थन पत्त'अनर अरा सस्ती बर'ई ख़ने अदिन लॆम अम्‍बनर।

14जोक्‍क आलर बिहनी खत्रका अच्‍च-ख़ोप्‍पा ख़ॆख़ेल लेक्‍खा हिकनर। आर कत्‍थन मेन्नर लिकिन आर तंग्‍है उज्‍जना नू मुन्द कालो बारी ख़ॆख़ेल ता फिकर अरा खुर्जी अरा मया-मॊह आरिन अरबी ख़ने आर बड़ियर मना पोलनर।

15अरा जोक्‍क आलर बिहनी खत्रका दौ ख़ॆख़ेल लेक्‍खा हिकनर। आर कत्‍थन मेन्नर ती सत अरा फरी जिया नू सम्ड़'अरकी उइय्नर अरा सहेलहे गने ख़ंजनर।

16नॆ हूँ बिल्‍ली लघा ब'अनर ती संजगी ती मल कुल्‍लनर महले खटी किइय्या मल उइय्नर। लिकिन अदिन पक्‍खा नू उइय्नर का भितरी बर'ऊ आलर गे बिल्‍ली ऎथ्र'ओ।

17एन्ने धर्मेस तंग्‍है सत आबोन नुड़'आ मल बेद्ददस, आस अदिन ऎद'आ बेद्ददस, अरा एन्ने एन्द्रा हूँ एन्ने मल्‍ला नूख़्रका का आद मल अख़तार'ओ अरा मल ऎथ्र'ओ।

18औंगे चिहुंक र'आ का नीम धर्मेसी कत्‍थन एकन्ने मेन्‍दर, नॆ एंग्‍है सिखाब'अना ही पत्त नू चिहुंक लगे सोचनर, आर गे बग्‍गे बुझुर'आ गे धर्मेस मद‍इत ननोस, लिकिन नॆ एंग्‍है सिखाब'अना ही पत्त नू चिहुंक लगे मल सोचनर, आर ही बुझुरका जोक्‍क कत्‍था गुट्ठिन हूँ धर्मेस मॊधरत'ओस चि'ओस।”

19येसुसी तंगियो अरा भईर आसी गुसन बरचर, लिकिन गोंहड़ा ही चड्डे भेंटार'आ पोल्‍लर।

20ख़ने ओर्तोस येसुस ती बाचस, “निंगयो अरा निंग्‍है भ‍इय्योर बहरी इज्‍जका र'‍अनर अरा निंगन भेंट मना बेद्दालनर।”

21येसुस आरिन किर्त'अर बाचस, “एंग्‍है अयंग अरा भइय्योर ईरिम हिकनर, नॆ धर्मेसी कत्‍थन मेन्नर ती अदही लेक्‍खा ऎकनर।”

22उन्‍दुल येसुस अरा आसी चेलर डोंगा नू अर्गियर अरा आस आरिन बाचस, “बरा, नाम समुदर ही आ पक्‍खे क'ओत।” तहाँ आर काला हेलरर।

23अरा डोंगा कालालिया ख़ने, येसुस ख़न्‍द्रस केरस। अरा समुदर नू घटा बरचा अरा डोंगा अम्मु ती नीदा हेलरा, अरा आर अपलोक नू रहचर।

24ख़ने आर येसुस हेद्दे बरचर ती एज्‍जर ती बाचर, “उर्बायो! नाम मूलख़ा कालदत।” ख़ने येसुस चॊचस ती घटन अरा लहरन केप्‍पस। ख़ने अबड़ा मड़चा केरा।

25येसुस आरिन बाचस, “नीम एन्‍देरगे एंग्‍है म‍इय्याँ असरा मल नंजकर?” आर इल्‍चियर केरर अरा अकबक मंजर ती ताम ताम ब'आ हेलरर, “ईस एकासे आलस हिकदस, ईस गा घटा अरा अम्मन हूँ पॆसदस, अबड़ा हूँ आसहीन मिनी?”

26फिन आर गेरासॆनोस चक नू अंड़सियर, आद गलिलेया समुदर ही पुरुब पक्‍खे नू र'ई।

27येसुस एकासे पिंडी नू इत्तियस, अन्नेम आस गुसन आ नगरे ता ओन्‍टा नाद गुट्ठी धरचका आलस बरचस। आस नगदे उल्‍ला ती किचरी मल अत्ता लगियस अरा आस एड़पा नू मल र'अरकी मसड़ा गुट्ठी नू र'आ लगियस।

28आ मलदौ बॊलता गा आ आलासी मइय्याँ घड़ी घड़ी छटियारका रहचा। आलर आसिन सिकड़ी बिड़ी गुट्ठी ती हें'अरकी पहरा नंजकाचर। अन्नु हूँ आस हॆंचकन ख़च्‍चा चि'आ लगियस, अरा नाद आसिन उछिन्‍द अड्डा गुट्ठी नू कुत्त'आ लगिया। आस येसुसिन ईरयस ती चिच्चि‍यारस ती आसी मुन्‍दहारे खत्रस ती जॊरसरिया बाचस, “अना उर्मी ती कोहाँ धर्मेसी ख़द्दायो येसु! एंग्है गने निंगा एन्‍देर नलख? ऎन निंग्‍‍है ती गोहरारदन एंगन दुक्‍खे अमा चि'आ।” एन्‍देरगेका येसुस आ मलदौ बॊलता आबोन आसी मइय्याँ ती उरखा गे पॆसकाचस।

30येसुस आसिन मेंजस, “निंग्‍है एन्‍देर नामे?” आस बाचस, “लेगिऒन ” एन्‍देरगेका नगदे नाद आस नू समसारकी रहचा।

31अबड़ा आसिन गोहरार'आ का, “एमन भयभयान ख़ोड़ख़ा गड्डी नू काला गे अमा पॆस'आ।”

32असन परता नू किस्‍सी ही ओन्‍टा कोहाँ खरखा बेद्दा मॊख़ा लगिया, अबड़ा नाद गोहरार'आ का, “एमन अबड़ा किस्‍सी नू समसार'आ चि'आ।” येसुस अबड़न काला चिच्‍चस।

33ख़ने नाद गुट्ठी आ आलस ती उरखा ती किस्‍सी नू केरा, अरा आ किस्‍सी खरखा दलखा ती डिघया ती समुदर नू केरा ती मूलख़िया।

34ई मंजकन ईरयर ती किस्‍सी ख़ापुर बोंगर, अरा नगरे नू अरा पद्दा नू केरर ती हलन तिंगियर।

35इबड़ा मंजकन आलर ऎरा गे उरखर, अरा येसुसी गुसन बरचर ती एका आलस ती नाद गुट्ठी उरखकी रहचा आसिन येसुसी ख़ेड्डे गुसन किचरी अत्तका अरा कोड़े उक्‍का ईरयर ती इल्‍चियर केरर।

36अरा नॆ इबड़न ईरकाचर आर अबड़ा आलारिन तिंगियर का आ नाद रस्‍सका आलस एकासे कोड़े मंजस।

37ख़ने गेरासॆनोस चक ही अड्डे-बेड्डे ता आलर येसुसिन गोहरारर का, “एम्‍है गुसले किर्रिम बि'आ” एन्‍देरगेका आर अउर हूँ नठार'ओ ब'अरकी नगदे इल्चका केरका रहचर। होले येसुस डोंगा नू अर्गियस ती किर्रियस केरस।

38एका आलस ती नाद गुट्ठी उरखकी रहचा आस येसुस ती गोहरारस ती बाचस का एंगन निंग्‍है गने र'आ चि'आ। लिकिन येसुस आसिन तइय्यस ती बाचस,

39“निंग्‍है एड़पा किर्रिम बि'आ अरा आलारिन तेंगा का धर्मेस निंगा गे एका कोड़हे नलख नंजकादस।” आस केरस ती गोट्टा नगरे नू तेंगा कुद्दा हेलरस का येसुस तंगा गे एका कोड़हे नलख नंजकाचस।

40येसुस किर्रियस ख़ने आलर रिझ ती परघाचर, एन्‍देरगेका अबड़ा ओर्मर आसी पाब ऎरा लगियर।

41ई बेड़ा नू याईर नामे ओन्‍टा गोड़हा एड़पा ता ओन्‍टा मुद्धस असन बरचस ती येसुसी ख़ेडमूली खत्रस ती गोहरार'आ हेलरस का, “एंग्‍है एड़पा गुचा।”

42एन्‍देरगेका आसी बारा बछर ही ओन्‍टे लेका तंग्दा रहचा, आद खे'आ बेद्दा लगिया। येसुस आसी गने काला लगियस ख़ने आलर आसिन ओनबेंड़र'आ ती चिप'आ लगियर।

43ओन्‍टा आली आ गोंहड़ा नू रहचा। आद बारा बछर ती ख़ॆंस काना रोगे ती लिं‍ड़िरकीचा। अरा आद तंग्‍है उर्मी खुर्जिन बैधर नू मुंजा ख़च्चकी रहचा, अन्नु हूँ नॆ हूँ अदिन उजग'आ पोल्‍लर।

44आद ख़ॊख़ा तरती बरचा ती येसुसी किचरी ही अंचरन ऎंवसड़ा। ख़ने लॆम अदही ख़ॆंस काना ठकरा केरा।

45तहाँ येसुस बाचस, “एंगन नॆ ऎंवसड़ा?” ओर्मर ऎम मल्‍ला ऎंवसड़का बाचर। ख़ने पतरस बाचस, “अना उर्बायो, गोंहड़ा निंगन ओनबेंड़र'आ ती चिप्‍प'आ लगी।”

46लिकिन येसुस बाचस, “नेकइम एंगन ऎंवसड़कर, एन्‍देरगेका ऎन अक्‍कन का एंग्‍है ती कोड़े नन्ना ही सवंग उरखकी र'ई।”

47ख़ने आ मुक्‍का ईरया का ऎन नुख़्र'आ पोल्‍लोन ब'अरकी इल्‍चनुम बरचा ती आसी ख़ेडमूली खत्रा ती ओर्मर ही मुन्दहारे तिंगिया का ऎन एन्‍देरगे आसिन ऎंवसड़कन अरा लॆम एकासे कोड़े ख़क्‍खन।

48येसुस अदिन बाचस, “अना ख़द्दो, नीन एंगन पत्ताचकी औंगेम नीन उजगारकी, कोड़ेम किर्रिम बि'अय।”

49आस एन्ने ब'अते रहचस ख़नेम गोड़हा एड़पा ता मुद्धस गुसले ओन्‍टा आलस बरचस ती गोड़हा एड़पा मुद्धासिन बाचस, “निंग्‍दा गा केच्‍चा केरा गुरुसिन दुक्‍खे अमा चि'आ।”

50येसुस इदिन मेंजस ती आसिन आनाकिर्ताचस, “अमा एल्‍चा! एंगन पत्त'आ हो'आ का आद उजगार'ओ।”

51आस एड़पा नू बरचस ती पतरस, यॊहन अरा याकॊब अरा ख़द्दो ही तंग्यो तम्बन अम्‍बरकी नॆकन हूँ तंग्‍है गने भितरी कोर'आ मल चिच्‍चस।

52ओर्मर अदगे चींख़ा ओलख़ा लगियर, लिकिन येसुस बाचस, “अमा चींख़ा! आद मल्‍ला केचका लिकिन ख़न्‍द्र'आ लगी।”

53आलर येसुसिन अलखालियर एन्‍देरगेका आर अक्‍खर का आद किचकी र'ई।

54लिकिन येसुस ख़ेक्खा ती अदिन धरचस अरा जॊर ती बाचस, “अनय ख़द्दो चो'अय!”

55ख़ने अदही जिया किर्रिया बरचा अरा आद लॆम चॊचा ती उक्‍किया। तहाँ आस अदगे मॊख़ा गे इन्द्रिइम चि'आ गे पॆसस।

56अरा अदही तंगियो तम्बा अनचकरर। लिकिन येसुस आरिन चेताबाचस का ई मंजकन नॆकन हूँ अमके तेंगा।

← Chapter 7 Jump to: Chapter 9 →