1 John 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Bwana bwange, bino mbibawandiikira muleke kukola bibi; naye singa oli aba akoze ekibi, tulina omuwolereza eri Taata, ye Yezu Kristu omutuukirivu;

2ye gwe mutango gw'ebibi byaffe, ate si byaffe byokka, naye n'eby'ensi yonna.

3Kuno kwe tutegeerera nti tumumanyi, bwe tukwata ebiragiro bye.

4Oyo agamba nti: “Mmumanyi,” naye nga takwata biragiro bye, mulimba, n'amazima tegamuliimu;

5naye buli akwata ekigambo kye, mu ye okwagala kubeera kutuukiriridde ddala; kuno kwe tutegeerera nti tuli mu ye.

6Oli agamba nti ali mu ye, ateekwa okuyisa nga ye bwe yayisa.

7Abaagalwa, sibawandiikira kiragiro kiggya, wabula ekiragiro ekikadde kye mwalina okuva mu masooka; ekiragiro ekikadde kye kigambo kye mwawulira.

8Naye ate mbawandiikira kiragiro kiggya, kino kituufu ku ye era ne ku mmwe, kubanga ekizikiza kiyise ate ekitangaala ekituufu kyatandise dda okwaka.

9Oli agamba nti ali mu kitangaala naye ng'akyawa muganda we, akyali mu kizikiza n'okutuusa kati.

10Oli ayagala muganda we, ali mu kitangaala, ate mu ye temuli kimuleetera kwesittala.

11Naye oli akyawa muganda we, ali mu kizikiza, era mu kizikiza mw'atambulira, era tamanyi na gy'agenda, kubanga ekizikiza kimuzibye amaaso.

12Mbawandiikira mmwe abaana, kubanga ebibi byammwe bisonyiyiddwa olw'okubeera erinnya lye.

13Mbawandiikira, mmwe abazadde abasajja, kubanga mumumanyi oyo aliwo okuva mu masooka. Mbawandiikira, mmwe abalenzi abavubuka, kubanga muwangudde omubi. Mbawandiikira, mmwe abato, kubanga mumanyi Taata.

14Mbawandiikira, mmwe abazadde abasajja, kubanga mumanyi oyo aliwo okuva mu masooka. Mbawandiikira, mmwe abalenzi abavubuka, kubanga muli ba maanyi, n'ekigambo kya Katonda kiri mu mmwe, n'omubi mumuwangudde.

15Temwagalanga nsi oba ebiri mu nsi. Singa oli ayagala ensi, mu ye temuba kwagala Taata.

16Kubanga byonna ebiri mu nsi: amaddu g'omubiri, amaddu g'okulaba n'olunkulu lw'okufuna, si bya Taata, wabula bya nsi.

17Ensi yo eyita, wamu n'amaddu gaayo; naye oyo akola Katonda ky'ayagala asigalawo emirembe gyonna.

18Abaana, kano ke kaseera akavannyuma; mwawulira nti omulabe wa Kristu ajja; kati nno abalabe ba Kristu bangi bazze; bwe tutyo tumanyi nti ke kaseera akavannyuma.

19Baatuvaamu ne bagenda, naye tebaali baffe, kubanga singa baali baffe, bandisigadde naffe, kiryoke kyeyoleke lwatu nti si baali baffe.

20Naye mmwe mwasiigibwa n'Omutuukirivu, era mwenna mukimanyi.

21Mbawandiikidde, si lwa kubera nga temumanyi mazima, naye kubanga mugamanyi, nti era tewali bulimba buva mu mazima.

22Ate ani mulimba wabula okuggyako oyo agaana nti Yezu si ye Kristu? Oyo ye mulabe wa Kristu, oyo agaana Taata ne Mwana.

23Buli agaana Mwana talina Taata; buli ayatula Mwana alina ne Taata.

24Kye mwawulira okuva mu masooka kisigale mu mmwe. Kye mwawulira okuva mu masooka bwe kisigala mu mmwe, olwo nammwe mujja kusigala mu Mwana ne mu Taata.

25Kino kye kisuubizo kye yatusuubiza: obulamu obutaggwaawo.

26Kino nkibawandiikidde okubannyonnyola ku abo ababakyamya;

27naye okusiigibwa kwe mwafuna okuva gy'ali kwabasigalamu, temwetaaga muntu kubayigiriza; byonna okusiigibwa bye kwabayigiriza bya mazima, si bulimba; musigale mu ye nga bwe kwabayigiriza.

28Kati, bwana, musigale mu ye, olwo bw'alirabika tulyoke tubeere bagumu, ate tuleme kuswala tuve w'ali mu maaso ge.

29Oba mumanyi nga mutuukirivu, mutegeere nti buli akola ekituufu aba y'amuzadde.

← Chapter 1 Jump to: Chapter 3 →