1 John 5

Luganda (BIBU1) (BIBULIYA ENTUKUVU)

← Chapter 4 Jump to:

1Buli akkiriza nti Yezu ye Kristu aba mwana wa Katonda, ate ayagala omuzadde ayagala ne gw'azaala.

2Kino kwe tumanyira nti twagala abaana ba Katonda, bwe twagala Katonda ne tutuukiriza n'ebiragiro bye.

3Kubanga kuno kwe kwagala kwa Katonda, nti tukwata ebiragiro bye; ate ebiragiro bye tebizitoowerera.

4Buli kizaalibwa Katonda kiwangula ensi; buno bwe buwanguzi obuwangula ensi: okukkiriza kwaffe.

5Ate ani awangula ensi, okuggyako oyo akkiriza nti Yezu ye Mwana wa Katonda?

6Ono ye yajjira mu mazzi ne mu musaayi, Yezu Kristu; si mu mazzi mwokka, naye mu mazzi ne mu musaayi. Era Mwoyo ye mujulirwa, kubanga Mwoyo ge mazima.

7Awo nno abajulirwa bali basatu:

8Mwoyo, amazzi n'omusaayi; ate bonsatule bakkaanya.

9Oba tukkiriza abantu kye boogera, Katonda ky'ayogera kikirira wala; kubanga kino Katonda kye yayogera, kye yakakasa ku mwana we.

10Akkiriza Omwana wa Katonda alina obukakafu obwo mu ye. Oyo atakkiriza, Katonda amufudde mulimba, kubanga takkiriza bukakafu Katonda bwe yawa ku Mwana we.

11Obukakafu obwo bwe buno, nti Katonda yatuwa obulamu obutaggwaawo, ate obulamu obwo buli mu Mwana we.

12Alina Mwana aba alina obulamu; atalina Mwana wa Katonda talina bulamu.

13Mbawandiikidde bino mmwe abakkiriza erinnya ly'Omwana wa Katonda, mulyoke mumanye nti mulina obulamu obutaggwaawo.

14Kino kye kitugumya mu maaso ge, nti bwe tusaba ekintu kyonna, nga kituukanye ne ky'ayagala, atuwulira.

15Oba tumanyi nti atuwulira mu buli kye tumusaba, olwo tumanyi nga twafunye nadda kye tumusaba.

16Singa oli alaba muganda we ng'akola ekibi ekitali kya lumbe, asabenga, ne Katonda alimuwa obulamu ku lw'abo ekibi kyabwe ekitali kya lumbe. Waliwo ekibi eky'olumbe, sigamba nti oli yandisabye ku kino.

17Buli kwonoona kiba kibi, naye waliwo ekibi ekitaba kya lumbe.

18Tumanyi nti buli azaalibwa Katonda takola kibi, naye oyo azaalibwa Katonda yeekuuma, n'omubi tamukwatako.

19Tumanyi nti tuli ba Katonda, era nti ensi yonna eri mu buyinza bw'omubi.

20Era tumanyi nti Omwana wa Katonda yajja era n'atuwa okutegeera, tulyoke tumanye oyo omutuufu; ffe tuli mw'oyo omutuufu, mu Mwana we Yezu Kristu. Ono ye Katonda omutuufu era obulamu obutaggwaawo.

21Bwana, mwewale balubaale.

← Chapter 4 Jump to: