1 John 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Mulabe okwagala Taata kwe yatwagalamu nga bwe kuli, bwe yatuwa okuyitibwa abaana ba Katonda, ate ddala bwe tutyo bwe tuli. Ensi kyeva tetumanya kubanga naye teyamumanya.

2Abaagalwa, tuli baana ba Katonda kati, naye ekyo kye tuliba tekinnayolekebwa; naye tumanyi nti bw'alyolekebwa, tulimufaanana, kubanga tulimulaba nga ye bw'ali.

3Na buli omu asuubira bw'atyo mu ye, yeetukuza nga ye bw'ali omutukuvu.

4Buli akola ekibi aba akoze bujeemu, kubanga ekibi bujeemu.

5Mumanyi nti yalabika lwa kuggyawo bibi, era nti mu ye temuli kibi.

6Ali mu ye takola kibi; buli akola ekibi aba teyamulaba oba nga teyamumanya.

7Bwana, wabulewo abalimba. Akola ekituufu aba mutuukirivu, ye nga bw'ali omutuukirivu.

8Akola ekibi aba wa Sitaani; kubanga Sitaani mwonoonyi okuva mu masooka. Omwana wa Katonda yalabika lwa kuzikiriza bikolwa bya Sitaani.

9Buli azaalibwa Katonda takola kibi, kubanga ensigo ya Katonda emubeeramu; tasobola kwonoona, kubanga yazaalibwa Katonda.

10Ku kino omuntu kwategeerera abaana ba Katonda n'abaana ba Sitaani: buli atakola kituufu taba wa Katonda, era kye kimu n'oyo atayagala muganda we.

11Buno bwe bubaka bwe mwawulira okuva mu masooka, nti tuteekeddwa okwagalana;

12si nga Kayini eyali ow'omubi, eyatemula muganda we. Yamutemulira ki? Lwa kubeera ng'ebikolwa ebibye byali bibi, sso ng'ebya muganda we bituukirivu.

13Temwewuunya, abooluganda, ensi bw'ebakyawa.

14Tumanyi nti tuvudde mu kufa ne tudda mu bulamu, kubanga twagala abooluganda. Oyo atayagala asigala mu kufa.

15Buli akyawa muganda we mutemu, ate mumanyi nti mpaawo mutemu alimu bulamu butaggwaawo.

16Okwagala kuno kwe tukumanyira, nti yawaayo obulamu bwe okubeera ffe, era naffe tusaanye tuweeyo obulamu bwaffe olwa baganda baffe.

17Naye singa oli aweza ku bintu by'ensi alaba muganda we ng'ali mu bwetaavu, naye n'atamussaako mwoyo, okwagala kwa Katonda kumubeeramu kutya?

18Bwana, okwagala kwaffe kuleme kubeera mu bigambo bugambo na mboozi, wabula kubeere mu bikolwa ne mu mazima.

19Kuno kwe tumanyira nti tuli ba mazima, ne tuba bagumu mu maaso ge,

20emmeeme yaffe buli lw'etulumiriza; kubanga Katonda mukulu okusinga emitima gyaffe, ye amanyi buli kintu.

21Abaagalwa, emmeeme yaffe bw'eba tetulumiriza, tuli bagumu mu maaso ga Katonda;

22ne buli kye tusaba tujja kukifuna okuva gy'ali, kubanga tukwata ebiragiro bye ne tukola ekimusanyusa.

23Ekiragiro kye kye kino, nti tukkirize erinnya ly'Omwana we Yezu Kristu, ate naffe twagalane nga bwe yatulagira.

24Buli akwata ebiragiro bye abeera mu Katonda, ne Katonda abeera mu ye. Kuno kwe tumanyira nti abeera mu ffe: Mwoyo gwe yatuwa.

← Chapter 2 Jump to: Chapter 4 →