1 Peter 1

Luganda (BIBU1) (BIBULIYA ENTUKUVU)

Jump to: Chapter 2 →

1Petero Omutume wa Yezu Kristu. Yaabo abalondemu abali ku ggwanga abasaasaanye mu Ponto, Galasiya, Kappadokiya, Aziya ne mu Bisiniya,

2Katonda Taata be yalobozaamu okuva edda n'abatukuza mu Mwoyo Mutuukirivu bagondere Yezu Kristu era bamansibweko omusaayi gwe. Eneema ebeere nammwe n'emirembe gyeyongere obungi.

3Katonda Kitaawe wa Mukama waffe Yezu Kristu agulumizibwe! Mu kisa kye ekingi yatuwa okuzaalibwa obuggya tufune essuubi eddamu olw'okuzuukira kwa Yezu Kristu mu bafu;

4tufune obusika obutagooka, obutaliiko bbala, obutafuma, obwabaterekerwa mu ggulu.

5Amaanyi ga Katonda gabakuumye mu kukkiriza, mulyoke mufune obulokofu obulyolekebwa ku nkomerero y'obudde.

6Ekyo kimala okubaleetera essanyu, yadde nga mukyalina okuyita mu kugezebwa okumala akaseera n'ebigezo eby'enjawulo,

7bigeze ensa eri mu kukkiriza kwammwe okw'omuwendo okusinga ne zaabu, newandibadde ng'alongoosebwa mu muliro, naye era aggwaawo, kusobole okugulumizibwa, okutendebwa n'okussibwamu ekitiibwa luli Mukama waffe Yezu Kristu lw'alirabika.

8Temumulabangako, sso mumwagala; na buli kati temunnamulaba, sso mumukkiriza ne mujaganya n'essanyu eritayogerekeka ery'ekitiibwa,

9ne mufuna ekigendererwa ky'okukkiriza kwammwe, anti kwe kulokoka kw'emyoyo gyammwe.

10Abalanzi abaalanga eneema gye mwali mujja okufuna, baanoonyereza ne beekebejja okulokoka kuno.

11Baanoonyereza obudde n'ebiseera Mwoyo wa Kristu eyabalimu lwe yali ow'okulaga ebibonoobono bya Kristu n'ekitiibwa ekiribiddirira.

12Baabikkulirwa ne bategeera ng'omulimu baali tebakola beeweereze, wabula baweereze mmwe okubatuusaako ebyo kati ababayigiriza Evangili bye bababuulirira ku bwa Mwoyo Mutuukirivu eyatumibwa ng'ava mu ggulu, ebintu ne bamalayika bye beegomba okutunulako.

13Kale nno mwesibe mubeere beetegefu mu myoyo gyammwe, temubaamu butamiivu; essuubi lyammwe lyonna mulimalire ku neema gye mulifuna luli Yezu Kristu lw'alirabika.

14Ng'abaana abawulize, muleme kudda mu by'amaddu ge mwagobereranga luli edda olw'obutamanya.

15Nga Katonda eyabayita bw'ali omutukuvu, nammwe mubeere batukuvu mu buli ngeri yonna gye muyisaamu,

16anti kyawandiikibwa nti: “Mubeere batukuvu, kubanga nange ndi mutukuvu.”

17Oba Katonda mumukowoola nti Taata, oyo alamula buli muntu nga teyeekubiira ng'asinziira ku by'akola, mweyise n'obwegendereza mu budde buno nga muli eyo ku ggwanga.

18Mumanyi nga mwanunulibwa okuva mu ngeri ezitaliimu kantu ze mwaggya ku bajjajjammwe, si na bintu ebiggwaawo nga zaabu oba ffeeza,

19wabula n'omusaayi gwa Kristu ogw'omuwendo ng'ogw'akaliga akataliiko bbala oba ekizigiro.

20Yamanyibwa dda nga n'ensi tennabangibwawo, kyokka yayolesebwa ku lwammwe mu biseera ebivannyuma.

21Mwayita mu ye ne mutuuka ku kukkiriza Katonda, oyo eyamuzuukiza mu bafu n'amugulumiza; olw'okubeera ekyo, mukkiriza Katonda ne musuubira mu ye.

22Olw'okugondera amazima, emyoyo gyammwe mwagitukuza, ne musobola okwagalana ng'abooluganda, mwagalanire ddala nga muggyira ddala mu mutima.

23Mwazaalibwa buggya, nga temuzaalibwa zzadde eriggwaawo, wabula ezzadde eritaggwaawo, kye kigambo kya Katonda ekiramu ekisigalawo.

24“Anti abantu bonna muddo, n'ekitiibwa kyabwe kyonna kiri ng'ekimuli ky'omuddo.” Omuddo gukala, n'ekimuli ne kigwa,

25sso ekigambo ky'Omukama kisigalawo emirembe gyonna. Ekigambo ekyo ge mawulire amalungi agaababuulirwa.

Jump to: Chapter 2 →