1 Peter 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Mwessammule buli ngeri embi yonna na buli bulimba, obukuusa, obuggya, na buli kuwaayiriza.

2Ng'amabujje agaakazaalibwa, muyayaanire mata meereere ag'omwoyo gabayambe okutuusa ku kulokoka,

3olw'okubanga mulezeeko ne mulaba Omukama nga mulungi.

4Musembere gy'ali, ejjinja eddamu, abantu lye baagaana, sso mu maaso ga Katonda eddondobe era ery'omuwendo;

5mmwe ng'amayinja amalamu muzimbibwemu ennyumba ey'omwoyo, obwakabona obutukuvu, muweereze ebitambiro eby'omwoyo ebisanyusa Katonda mu Yezu Kristu.

6Kyova osanga mu Biwandiiko nti: “Laba, nteeka ejjinja mu Siyoni, ejjinja ery'entabiro, eddondobe, ery'omuwendo; oli alimukkiriza, taliswala.”

7Ku mmwe nno abakkiriza, jjinja lya kitiibwa; naye eri abatakkiriza, “Ejjinja lyennyini abazimbi lye baagaana, lye lyafuuka lukulwe mu nsonda.”

8Era “Ejjinja abantu kwe beekoona, lwe lwazi kwe beesittala.” Beesittala kubanga tebagondera kigambo nga bwe baali basuubirwa okukola.

9Sso mmwe muli luse olulondobe, obwakabona obw'obwakabaka, eggwanga ettukuvu, abantu ba Katonda ab'obwebange, okulangirira ebyamagero by'oyo eyabayita n'abaggya mu kizikiza n'abatuusa mu kitangaala kye ekyewuunyizibwa.

10Edda temwali bantu abali awo, naye kati muli bantu ba Katonda; edda mwali temugiriddwa kisa, naye kati mugiriddwa ekisa.

11Abaagalwa, mbeegayiridde, nga mmwe abagenyi era abali ku ggwanga, mwetangirenga mu ebyo byonna omubiri bye gwegomba, ebirwanyisa omwoyo gwammwe.

12Mweyisenga bulungi nga muli mu b'amawanga; bwe banaaboogerangako ng'ababi, beerabireko bennyini ku bikolwa byammwe ebirungi batendereze Katonda ku lunaku olw'okulambulirwako.

13Olw'okubeera Katonda, mugonderenga buli bufuzi bwa bantu, abeere kabaka nga bwali asinga obukulu,

14oba abaamasaza, kubanga y'abatuma okujja okubonereza abakola obubi, n'okutenda abakola obulungi.

15Katonda ekyo ky'ayagala, anti bwe muyisa obulungi, musirisa obutamanya bw'abasiru.

16Mweyise ng'ab'eddembe, nga temwekwasa ddembe eryo kukola bubi, wabula mubeere ng'abaweereza ba Katonda.

17Abantu bonna mubawenga ekitiibwa; abooluganda mubaagalenga; Katonda mumutyenga; kabaka mumussengamu ekitiibwa.

18Abaweereza, mugonderenga bakama bammwe, mubaweerenga ddala ekitiibwa. Si abo bokka abalungi, abateefu, naye n'abakalubo.

19Okugumiikiriza ku bwa Katonda ennaku oli z'alaba awatali nsonga, ekyo eba neema.

20Bwe muyisa obubi ne bababonereza, ne mukigumiikiriza, mulimu kitiibwa ki? Naye singa muyisa obulungi, sso ne mubonerezebwa, naye ne mukigumiikiriza, ekyo Katonda akisiima.

21Ndaba ekyo kye kyabayisa; Kristu yabonaabona ku lwammwe n'abalekera ekyokulabirako, musimbe mu kisinde kye.

22Ye teyakola kibi na kimu, mu kamwa ke temwasangibwamu bulimba;

23bwe yavumibwa, teyavuma kwesasuza; bwe yabonaabona, teyawerera muntu; wabula yeereka mu mikono gy'oli alamula mu butuufu.

24Ebibi byaffe yabyetikka yennyini mu mubiri gwe ku muti, naffe ekibi tukibeerere bafu, tubeere balamu tukole eby'obutuukirivu. Ebiwundu bye bye byabawonya.

25Anti mwali muwabye ng'endiga; naye kati mukomyewo eri omusumba era omulabirizi w'emyoyo gyammwe.

← Chapter 1 Jump to: Chapter 3 →