1 Peter 5

Luganda (BIBU1) (BIBULIYA ENTUKUVU)

← Chapter 4 Jump to:

1Nkubiriza abakadde abali mu mmwe, nze nga mukadde munnammwe omujulirwa w'ebibonoobono bya Kristu, era aligabana ku kitiibwa ekijja okwolekebwa,

2mulabirirenga eggana lya Katonda eryabakwasibwa, si na buwaze, wabula lwa kwagala nga Katonda yennyini bwe yandikoze. Temugobererangamu magoba agaswaza, wabula mukoze kwagala,

3buli omu ku baamukwasibwa n'atalaga buyinza; wabula mubeere kyakulabirako eri eggana.

4Omusumba Omukulu bw'alirabika, mufune engule ey'ekitiibwa etafuma.

5Nammwe abavubuka, muwulirenga abakadde. Mwambale buli omu okwetoowaliza munne, anti Katonda alwanyisa abeekuza, naye abeetoowaze abagirira ekisa.

6Mwetoowalize omukono gwa Katonda ogw'amaanyi, mu bbanga ttono alyoke abagulumize.

7Byonna ebibeeraliikiriza mubimukasukire, kubanga abafaako.

8Mubeere bakalangufu, mutunule, kubanga Sitaani omulabe wammwe ayitaayita ng'empologoma ewuluguma ng'enoonya gw'eneekavvula.

9Mumuziyize nga muli banywevu mu kukkiriza. Mutegeere ng'ennaku ezibalaba z'eziraba n'abooluganda lwammwe bonna abali ku nsi.

10Nga mumaze okubonaabonamu akabanga, Katonda nnyini kisa kyonna, eyatuyita okugabana ku kitiibwa ekitaggwaawo mu Yezu Kristu, ye ajja kubazzaawo, abanyweze, abagumye.

11Oyo obukulu bubeere bubwe emirembe n'emirembe. Amiina.

12Neeyambye Siluvano owooluganda omwesigwa okubawandiikira mu bimpimpi nga mbeegayirira, n'okukakasa nga bwe nkakasa, nti bino y'eneema ya Katonda. Muginywereremu.

13Oyo ali mu Babiloni, eyalondebwa nga mmwe, abatumidde; era ne mutabani wange Mariko.

14Mulamusaganye n'okunywegera okw'okwagala. Emirembe gibeere nammwe mwenna abali mu Kristu.

← Chapter 4 Jump to: