1 Thessalonians 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1N'olwekyo kyaddaaki nga tetukyayinza kugumiikiriza, kwe kuteesa okusigala ffekka e Atena,

2ne tubatumira muganda waffe Timotewo, omuweereza wa Katonda ali ku mulimu gw'okuyigiriza Evangili ya Kristu, ajje abagumye era abanyweze mu kukkiriza kwammwe,

3ebizibu bino bibuleko gwe binyeenya; anti nammwe mumanyi nti kino kye kitulindiridde.

4Sso era bwe twali ewammwe, twabagambirawo nti ennaku twali ba kuziraba, ng'era bwe bibaddewo, nga nammwe bwe mumanyi.

5Nange nno nalaba sikyayinza kugumiikiriza, kwe kutuma gye muli, ntegeere okukkiriza kwammwe nga bwe kuli. Nali ntya nti sikulwa ng'omukemi yabakema omulimu gwaffe ne gufa busa.

6Kati Timotewo bw'akomyewo eno okuva ewammwe, atubuulidde amawulire amalungi ku kukkiriza kwammwe ne ku kwagala; era n'atugamba nti mukyatujjukira bulungi, nti bulijjo mwegomba okutulabako nga naffe bwe twegomba okubalaba.

7Ggwe wamma, abooluganda, olw'okukkiriza kwammwe, mutukubagizza mu bikalubo byonna ne mu bizibu bye tulimu.

8Kati naffe tuwulira ku bulamu, kubanga mugumye mutyo mu Mukama.

9Tunaayinza tutya okwebaza Katonda okubeera mmwe, olw'essanyu lino lyonna lye mutuleetedde mu maaso ga Katonda waffe?

10Twegayirira nga twesengereza emisana n'ekiro, tusobole okuddamu okubalabako ate, tumalirize ebikyabula ku kukkiriza kwammwe.

11Katonda yennyini oyo era Taata ne Mukama waffe Yezu Kristu baluŋŋamye olugendo lwaffe olutuleeta ewammwe.

12Omukama abawe mweyongere era musukkulume mu kwagalana mwekka na mwekka ne mu kwagala abantu bonna, kyenkana nga naffe bwe tubaagala,

13agumye bw'atyo emitima gyammwe mu butuukirivu, nga temuliiko musango mu maaso ga Katonda era Taata ku luli Mukama waffe lw'alijja wamu n'abatuukirivu be bonna.

← Chapter 2 Jump to: Chapter 4 →