1 Thessalonians 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Ekisembayo, abooluganda, tubeegayiridde era tubakubiriza mu Mukama Yezu nti nga bwe mwatuyigirako bwe musaanye okuyisa okusanyusa Katonda, era kati nga bwe mukola, mweyongerere ddala okukola bwe mutyo.

2Anti mumanyi amateeka ge twabawa mu Mukama Yezu.

3Katonda kino ky'abaagaza, obutuukirivu bwammwe: mulekere ddala obuseegu;

4buli omu mu mmwe amanye okwewasiza omukazi mu butuukirivu ne mu kitiibwa,

5naye si mu kutwalirizibwa kwa maddu ng'ab'amawanga abatamanyi Katonda;

6wabulewo asobeza munne oba amulyakula mu by'obusuubuzi; kubanga Omukama awoolera eggwanga mu ebyo byonna, ng'era bwe twabagamba luli ng'atukakasiza ddala.

7Kubanga Katonda teyatuyitira buseegu, wabula butuukirivu.

8Oli nno agaya bino, tagaya muntu, wabula Katonda abawa Mwoyo we Omutuukirivu.

9Simwetaaga muntu kubawandiikira ku mpisa ya kwagalana kwe muteekwa okwagalanamu ng'ab'oluganda, anti Katonda yennyini yabayigiriza dda bwe musaanye okwagalana;

10ndaba mwagala abooluganda bonna wonna mu Masedoniya. Kye tubasaba nno, abooluganda, mwongere bwongezi.

11Muluubirire okuba mu ddembe, okufa ku bibakwatako, n'okukola n'emikono gyammwe nga bwe twabagamba;

12bwe mutyo mulabikire bulungi ab'ebweru mu neeyisa yammwe, mubeere nga temujula kantu.

13Abooluganda, tetwagala muwubwe ku abo abeebase, muleke kunakuwala ng'abantu abalala abatalina ssuubi.

14Oba tukkiriza nga Yezu yafa n'azuukira, awo nno ne Katonda ng'ayita mu Yezu, abeebase alibakomyawo wamu naye.

15Kino tukibagamba ng'Omukama bwe yakyogera nti: ffe abakyali abalamu, abakyasigaddewo okutuusa Omukama lw'alijja, si ffe tulisookayo bali abeebase.

16Anti Omukama yennyini aliva mu ggulu n'akka ekiragiro bwe kiriyita, Ssabamalayika bw'alireekaana n'ekkondeere lya Katonda nga linyaanyaagira. Olwo abafu abali mu Kristu be balisooka okuzuukira;

17awo naffe abaliba bakyali abalamu, tulikuŋŋunsibwa mu bire wamu nabo okugenda okusisinkana Kristu mu bbanga. Olwo tulibeera n'Omukama ennaku zonna.

18Kale nno buli omu agumye munne n'ebigambo ebyo.

← Chapter 3 Jump to: Chapter 5 →