1 Thessalonians 5

Luganda (BIBU1) (BIBULIYA ENTUKUVU)

← Chapter 4 Jump to:

1Abooluganda, temwetaaga muntu kubawandiikira ku bifa ku budde ne ku kaseera kennyini.

2Ndaba nammwe mumanyi ng'olunaku lw'Omukama lulijja ng'omubbi mu kiro.

3Baliba bakyawoza: “Kiri mulaala, kiri bulungi,” olwo okuzikirizibwa ne kubagwira ng'okulumwa bwe kugwira omukazi ow'olubuto, ate teriba kuwona.

4Sso mmwe abooluganda, temuli mu nzikiza, olunaku olwo okubazinduukiriza ng'omubbi.

5Mmwe mwenna muli baana ba kitangaala, muli baana ba misana; tetuli ba kiro oba ba nzikiza.

6Awo nno tuleme kwebaka ng'abalala bwe bakola; tutunule, nga tetuli batamiivu.

7Anti abeebaka beebaka kiro, n'abatamiira batamiira kiro.

8Naye ffe tuli ba misana, awo nno tuleme kuba batamiivu, twambale ekizibawo eky'okukkiriza n'okwagala, ate enkufiira nga lye ssuubi ery'okulokoka.

9Kubanga ffe Katonda teyatuteebeza busungu, wabula okufuna obulokofu ku bwa Mukama waffe Yezu Kristu,

10eyatufiirira tulyoke tubeere balamu naye, ne bwe tuba tutunula ne bwe tuba twebase.

11Kale nno buli omu akubagize munne, buli omu azimbe munne nga bwe mubadde mukola.

12Abooluganda, tubeegayiridde, ababafaabiinira, ababalabirira mu Mukama, abababuulirira mubategeere.

13Olw'okubeera omulimu gwabwe, mubasseemu nnyo ekitiibwa era mubaagale; mubeere mirembe ne mu mmwe mwennyini.

14Abooluganda, era tubakubiriza mukome ku balendera, muzze amaanyi mu baterebeterebe, abanafu mubayambe; bonna mubagumiikirize.

15Mulabe nti mu mmwe temuli awoolera ggwanga, wabula muluubirire bulijjo okukolera obulungi buli omu ne bonna.

16Mubeere basanyufu ennaku zonna.

17Mwegayirire obutasalako;

18mu byonna mwebaze, kubanga ekyo Katonda ky'abaagaza mu Kristu Yezu.

19Mwoyo muleke kumuzibiikiriza;

20temugayanga mulimu gwa bulanzi;

21kyokka byonna mubyekenneenye; ekirungi mukinywerereko;

22mwesammule buli kibi.

23Katonda yennyini ow'emirembe abafuule batuukirivu mwenna. Mwenna nga bwe muli: omutima, emmeeme, n'omubiri, bibeere biramu ebitaliiko musango Mukama waffe Yezu Kristu lw'alijja.

24Oyo abayita mwesigwa, era ajja kukikola.

25Abooluganda, nammwe mutusabire.

26Mulamuse abooluganda bonna n'okunywegeragana okutukuvu.

27Mbalayizza ddala Omukama nti ebbaluwa eno esomerwe abooluganda bonna.

28Eneema ya Mukama waffe Yezu Kristu ebeere nammwe.

← Chapter 4 Jump to: