1 Timothy 1

Luganda (BIBU1) (BIBULIYA ENTUKUVU)

Jump to: Chapter 2 →

1Pawulo, omutume wa Kristu olw'ekiragiro kya Katonda Mulokozi waffe n'ekya Kristu Yezu essuubi lyaffe;

2ya Timotewo, mutabani wange ddala mu kukkiriza: Eneema, okusaasira n'ekisa okuva ewa Katonda Taata ne Kristu Yezu Mukama waffe.

3Bwe nali ŋŋenda e Masedoniya, nakugamba osigale mu Efezi olagire abantu abamu baleke kuyigiriza njigiriza ndala,

4n'okwemalira ku nfumo n'okunonooza endyo ezitaggwa; bino byongera bwongezi kubuusabuusa mu kifo ky'entegeka ya Katonda ey'okununula esimbye ku kukkiriza.

5Sso ekigendererwa ekikulu ekiri mu kukubiriza kwe kwagala okuva mu mutima omutukuvu, emmeeme ennungi n'okukkiriza okwesimbu.

6Abamu olw'okuva ku bino bawabidde mu nkaayana ezitaliimu kantu,

7nga baagala okuba abayigiriza b'Etteeka, naye nga tebamanyi kye boogerako wadde ebyo bye bagenda bakakasa n'amaanyi.

8Weewaawo tumanyi nti etteeka ddungi, singa oli alyeyamba ng'agoberera amateeka,

9ng'amanyi nti etteeka teryateekebwawo lwa batuukirivu, wabula olw'ababi, n'abatawulira, n'abatatya Katonda, n'aboonoonyi, n'abatalina mpisa, n'aboonoonefu, n'abatemula bakitaabwe, n'abatemula bannyaabwe, n'abatta abantu,

10n'abagwagwa, n'abakabawala n'ab'oluse lwabwe, n'abawamba abantu, n'abalimba, n'abawaayiriza, na buli kyonna ekikontana n'enjigiriza ennamu

11egenda n'Evangili ey'ekitiibwa eya Katonda eyaweebwa omukisa, eyo eyankwasibwa.

12Neebaza oyo eyampa amaanyi, Kristu Yezu Mukama waffe, kubanga bwe yannonda ku mulimu guno, yantwala okuba omwesigwa,

13newandibadde ng'edda namujolonga, ne mmuyigganya ne mmuvuma; wabula nasaasirwa, kubanga ebyo nabikolanga mu butamanya na mu butakkiriza.

14Naye eneema ya Mukama waffe yanzijuzaamu okukkiriza n'okwagala ebiri mu Kristu Yezu.

15Ekyogerwa ekyo kya mazima era kisaanye okukwatibwa kyonna, nti Kristu Yezu yajja mu nsi okulokola aboonoonyi; ate mu bo nze mubereberye.

16Naye nasaasirwa olwa kino, nti Yezu Kristu asookere mu nze okwoleka obugumiikiriza bwe bwonna, mbeere ekyokulabirako eri abo abaali ab'okumukkiriza bafune obulamu obutaggwaawo.

17Eri Kabaka Ssewannaku, atafa, atalabika, Katonda yekka, ebeere ettendo n'ekitiibwa emirembe n'emirembe.

18Bino bye biragiro bye nkuwa, Timotewo mutabani wange, nga nsinziira ku bigambo abalanzi bye baayogera ku ggwe; nga bikufuuyiridde, olwane bulungi olutalo,

19ng'olina okukkiriza n'emmeeme ennungi. Abamu olw'okugaana emmeeme yaabwe ky'ebagamba, baleetedde okukkiriza kwabwe okutokomoka;

20mu abo nga mwe muli ne Yimenewo ne Alekisanduro, be nawaayo eri Sitaani bayige obutavuma Katonda.

Jump to: Chapter 2 →