1 Timothy 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Ekisookera ddala nkubiriza nti okwegayirira, essaala, okusabira n'okwebaza biweerezebwe olw'abantu bonna,

2olwa bakabaka n'olw'abo bonna abali mu buyinza, tusobole okubeera mu ddembe n'obuteefu, mu bulamu obusomi n'obuntubulamu.

3Kino kirungi ate kisiimibwa Katonda Mulokozi waffe,

4ayagala abantu bonna balokoke era batuuke ku kumanya amazima mu bujjuvu.

5Kubanga Katonda ali omu, n'omutabaganya wa Katonda n'abantu ali omu, yennyini omuntu Kristu Yezu,

6eyeewaayo ng'omutango olwa bonna; okujulirwa kwa kino okwaweebwa mu kaseera kaakwo akatuufu.

7Ekyo kye nalonderwa ng'omulangirizi era omutume – kino nkyogera mu mazima, sirimba, - okuba omuyigiriza w'ab'amawanga mu kukkiriza ne mu mazima.

8Awo nno njagala mu buli kifo abasajja beegayirire nga bawanise emikono gyabwe emitukuvu awatali busungu oba okuyomba.

9Mu ngeri ye emu, n'abakazi beewoomye mu nnyambala ensaamusaamu, ey'obuwombeefu, ey'ekintukiramu, si na nviiri nnyonde, ne zaabu, n'amalulu n'engoye ez'ebbeeyi,

10wabula beewoomye n'ebikolwa ebirungi nga bwe kisaanira abakazi abasomi.

11Mu kuyigirizibwa, omukazi abeere ng'asirise, nga muwombeefu.

12Sikkiriza mukazi n'omu kuyigiriza oba kukulira basajja; asaana asirike busirisi,

13Kubanga Adamu ye yasooka okutondebwa ne Eva n'alyoka atondebwa;

14ne Adamu si ye yalimbibwa, wabula omukazi ye yalimbibwa, n'afuuka omusobya.

15Kyokka omukazi aliwonyezebwa ng'ayita mu kuzaala abaana, bw'alisigala mu kukkiriza, okwagala, obutuukirivu n'obwetangize.

← Chapter 1 Jump to: Chapter 3 →